КУЗНИНГ САРБАЛАНД “ОҚ ОЛТИН” ХИРМОНЛАРИ КЎЗНИ ҚУВОНТИРМОҚДА

Куз – ғалвир сувдан кўтариладиган, деҳқонларнинг йил мобайнида далаларда қилган машаққатли меҳнатлари сарҳисоб қилинадиган  фасл. Айни кунларда йиғим-терим ишлари давом этмоқда. Далаларда етиштирилган ҳосилни нест-нобуд қилмай, йиғиштириб олишга интилиш тобора қизғин тус олмоқда. Боиси сўнгги кунлар об-ҳавоси кузакнинг қуёшли кунлари ғанимат эканлигидан далолат бераётир.
Шуниси эътиборлики, жорий йилнинг кўклами анча инжиқ келганлигига қарамай, кўп йиллик тажрибаларига таянган деҳқонларимиз пахта далаларида мўл ҳосил етиштиришга эришдилар. Йиғим-терим ишлари уюшқоқлик билан ташкил этилганлиги боис, йиллик маррадан ошган фермер хўжаликлари сони кун сайин кўпаймоқда.
Қангли овулида фаолият юритаётган “Айтимбетов Қурбонбой” фермер хўжалигида  бу йил 51 гектар майдонга чигит экилган эди. Бир текис униб чиққан ниҳолларни 22 нафар ижарачи ўз вақтида сифатли парвариш қилганлиги, агротехник қоидалар асосида озиқлантириб, суғорганлиги натижасида юқори ҳосил етиштирилди. Шу кунгача хўжалик далаларидан 120 тонна ҳосил йиғиштириб олиниб, йиллик режа ортиғи билан уддаланди.
Хўжалик пахтачиликдан ташқари 3 гектар боғ, 8 гектар буғдой, 70 сотихлик балиқчилик кўлига эга. Ушбу тармоқлардан ҳам мўл даромад олинаётганлиги хўжалик ишчилари турмуши фаровонлашувига хизмат қилмоқда.
Қипчоқ овулидаги “Ўрозбоев Достонбек” фермер хўжалигида эса кўкламда 25 гектар ерга “Султон” ҳосилдор пахта нави экилган эди. Шу кунгача хўжалик далаларидан 70 тоннадан зиёд ҳосил йиғиштириб олинди ва йиллик режа ортиғи билан уддаланди. Айни кунларда хўжаликнинг 15 нафар ижарачилари ҳалол меҳнатлари эвазига етиштирилган ҳосилни териб олишда давом этишмоқда.
Ҳали пахталари оппоқ чамандай бўлиб очилиб турган далаларда ҳосил жуда мўл.
Хўжалик раиси Руслан Айтбоев ишчиларга етарли шароит яратиб беришга алоҳида эътибор қаратганлиги сабабли иш унуми янада ортмоқда. Хўжалик аъзолари теримни кўтаринки руҳда жадал тарзда давом эттиришмоқда ва етиштирган ҳосилни нест-нобуд қилмай йиғиб олиб, сарбаланд хирмон яратишга ҳаракат қилишмоқда.
Ҳакимбой Алламберганов раҳбарлик қилаётган “Эгамберганов Бунёдбек” фермер хўжалиги ишчиларининг ҳам кузги сарҳисобда юзлари ёруғ бўлди. 45 гектар пахта майдонидан шу кунгача 110 тоннадан зиёд ҳосил йиғиштириб олиниб, давлат хирмонига топширилди. Хўжалик ишчиларига терим ҳақлари ўз муддатида бериб борилаётганлиги иш суръатини янада оширди. Эътибор ва рағбатдан руҳланган ишчилар мавсум охиригача режадагидан зиёд, юқори навли ҳосил йиғиштириб олиб, кўпроқ даромадга эга бўлиш учун бор куч-ғайратини ишга солишмоқда.
Эътиборли жиҳати, бу йилги мавсумда хўжаликларда ҳосил йиғим-теримида мажбурий меҳнатга йўл қўйилмади. Ўқувчилар, ўқитувчилар ва корхона-ташкилотлар ходимлари ҳашарга чақирилмай, далалардаги мўл ҳосил хўжалик ишчиларининг ўз кучлари билан йиғиб-териб олдилар. Уларнинг унумли ишлашлари учун дала бошида етарли шароит яратилиб, ҳар куни иссиқ овқат, чой ташкил этилмоқда. Иш ҳақлари ҳам ўз вақтида ҳисоб-китоб қилиб борилмоқда. Бу кунлик терим суръати юқори бўлишини таъминламоқда.

Ойгул РАЖАБОВА.