KUZNING SARBALAND “OQ OLTIN” XIRMONLARI KOʻZNI QUVONTIRMOQDA

Kuz – gʻalvir suvdan koʻtariladigan, dehqonlarning yil mobaynida dalalarda qilgan mashaqqatli mehnatlari sarhisob qilinadigan  fasl. Ayni kunlarda yigʻim-terim ishlari davom etmoqda. Dalalarda yetishtirilgan hosilni nest-nobud qilmay, yigʻishtirib olishga intilish tobora qizgʻin tus olmoqda. Boisi soʻnggi kunlar ob-havosi kuzakning quyoshli kunlari gʻanimat ekanligidan dalolat berayotir.
Shunisi eʼtiborliki, joriy yilning koʻklami ancha injiq kelganligiga qaramay, koʻp yillik tajribalariga tayangan dehqonlarimiz paxta dalalarida moʻl hosil yetishtirishga erishdilar. Yigʻim-terim ishlari uyushqoqlik bilan tashkil etilganligi bois, yillik marradan oshgan fermer xoʻjaliklari soni kun sayin koʻpaymoqda.
Qangli ovulida faoliyat yuritayotgan “Aytimbetov Qurbonboy” fermer xoʻjaligida  bu yil 51 gektar maydonga chigit ekilgan edi. Bir tekis unib chiqqan nihollarni 22 nafar ijarachi oʻz vaqtida sifatli parvarish qilganligi, agrotexnik qoidalar asosida oziqlantirib, sugʻorganligi natijasida yuqori hosil yetishtirildi. Shu kungacha xoʻjalik dalalaridan 120 tonna hosil yigʻishtirib olinib, yillik reja ortigʻi bilan uddalandi.
Xoʻjalik paxtachilikdan tashqari 3 gektar bogʻ, 8 gektar bugʻdoy, 70 sotixlik baliqchilik koʻliga ega. Ushbu tarmoqlardan ham moʻl daromad olinayotganligi xoʻjalik ishchilari turmushi farovonlashuviga xizmat qilmoqda.
Qipchoq ovulidagi “Oʻrozboyev Dostonbek” fermer xoʻjaligida esa koʻklamda 25 gektar yerga “Sulton” hosildor paxta navi ekilgan edi. Shu kungacha xoʻjalik dalalaridan 70 tonnadan ziyod hosil yigʻishtirib olindi va yillik reja ortigʻi bilan uddalandi. Ayni kunlarda xoʻjalikning 15 nafar ijarachilari halol mehnatlari evaziga yetishtirilgan hosilni terib olishda davom etishmoqda.
Hali paxtalari oppoq chamanday boʻlib ochilib turgan dalalarda hosil juda moʻl.
Xoʻjalik raisi Ruslan Aytboyev ishchilarga yetarli sharoit yaratib berishga alohida eʼtibor qaratganligi sababli ish unumi yanada ortmoqda. Xoʻjalik aʼzolari terimni koʻtarinki ruhda jadal tarzda davom ettirishmoqda va yetishtirgan hosilni nest-nobud qilmay yigʻib olib, sarbaland xirmon yaratishga harakat qilishmoqda.
Hakimboy Allamberganov rahbarlik qilayotgan “Egamberganov Bunyodbek” fermer xoʻjaligi ishchilarining ham kuzgi sarhisobda yuzlari yorugʻ boʻldi. 45 gektar paxta maydonidan shu kungacha 110 tonnadan ziyod hosil yigʻishtirib olinib, davlat xirmoniga topshirildi. Xoʻjalik ishchilariga terim haqlari oʻz muddatida berib borilayotganligi ish surʼatini yanada oshirdi. Eʼtibor va ragʻbatdan ruhlangan ishchilar mavsum oxirigacha rejadagidan ziyod, yuqori navli hosil yigʻishtirib olib, koʻproq daromadga ega boʻlish uchun bor kuch-gʻayratini ishga solishmoqda.
Eʼtiborli jihati, bu yilgi mavsumda xoʻjaliklarda hosil yigʻim-terimida majburiy mehnatga yoʻl qoʻyilmadi. Oʻquvchilar, oʻqituvchilar va korxona-tashkilotlar xodimlari hasharga chaqirilmay, dalalardagi moʻl hosil xoʻjalik ishchilarining oʻz kuchlari bilan yigʻib-terib oldilar. Ularning unumli ishlashlari uchun dala boshida yetarli sharoit yaratilib, har kuni issiq ovqat, choy tashkil etilmoqda. Ish haqlari ham oʻz vaqtida hisob-kitob qilib borilmoqda. Bu kunlik terim surʼati yuqori boʻlishini taʼminlamoqda.

Oygul RAJABOVA.