СУД МАЖЛИСИДА ПРОБАЦИЯ ҲИСОБИДАГИ 5 НАФАР МАҲКУМГА ДОИР ИШ МУҲОКАМА ҚИЛИНДИ
Пробация бўлинмалари ички ишлар органларининг озодликдан маҳрум қилиш билан боғлиқ бўлмаган жазоларни ижро этиш бўйича фаолиятини бошқа давлат органлари ва ташкилотлари, шунингдек, жамоат тузилмалари билан ўзаро ҳамкорликда ташкил этади. Шартли ҳукм қилинган ва жазони ўташдан муддатидан илгари шартли озод қилинган шахсларнинг хулқ-атвори устидан таъсирчан назоратни амалга оширади.
Назорат остидагиларнинг қайта жиноят содир этиш хавфини аниқлаш ва бунга йўл қўймаслик бўйича ҳам мунтазам равишда профилактик чора-тадбирлар кўрилади. Шу қатори судларга тақдимномалар киритиш орқали муносиб хулқ-атворда бўлган ва тегишли тартиб-қоидага риоя этган маҳкумларнинг муддатидан илгари жазодан озод этилишига кўмаклашилади.
Соҳада ижобий самара кўрсатаётган бу каби инсонпарварлик тамойилларига, тегишли тартиб-қоидаларга туман ички ишлар органлари Пробация гуруҳи ва Жиноят ишлари бўйича туман суди томонидан ҳам доимий тарзда амал қилиниб борилмоқда.
Шу йилнинг 11 август куни Жиноят ишлари бўйича туман судида очиқ сайёр суд мажлиси бўлиб ўтди. Унда Жиноят ишлари бўйича туман суди раиси Султонмурод Давлетмуродов, туман прокурори ёрдамчиси Санжар Ёрмуҳаммедов ҳамда туман ички ишлар органлари Пробация гуруҳи катта инспектори Ислом Жабборбергановлар қатнашишди.
Суд мажлисида туман ички ишлар органлари Пробация гуруҳи томонидан келтирилган 3 та тақдимнома кўриб чиқилди. Тақдимномаларга асосан муқаддам Жиноят ишлари бўйича туман судининг ўтган йилги ҳукми бўйича, валюта қимматликларини қонунга хилоф равишда ўтказиш жиноятини содир қилганлиги сабабли Ўзбекистон Республикаси Жиноят кодексининг 177-моддаси 3-қисмига кўра 3 йил муддатга озодликни чеклаш жазоси тайинланган 1 нафар, муқаддам, яъни 2015 йилда Жиноят ишлари бўйича Шуманой туман суди томонидан давлат мулкини талон –тарож қилиш жиноятини содир қилганлиги учун Жиноят кодексининг 167-моддаси 3-қисми “а” банди билан 3 йил муддатга 20 фоиз ахлоқ тузатиш ишлари жазосига ҳукм қилинган 1 нафар, муқаддам Жиноят ишлари бўйича Хўжайли туман судининг ўтган йилги ҳукми бўйича қасддан баданга енгил тан жароҳатини етказиш жиноятини содир қилганлиги туфайли Жиноят кодексининг 109-моддаси 2-қисми билан 1 йил муддатга 10 фоиз ахлоқ тузатиш ишлари жазосига тортилган яна 1 нафар маҳкумга доир иш кўрилиб, кенг муҳокама қилинди.
Суд иши якунида уларнинг ўрнатилган тартиб-қоидалар талабларини бажарганлиги ва меҳнатга ҳалол муносабатда бўлганлиги эътиборга олиниб, ўталмаган жазо муддатидан Ўзбекистон Республикаси Жиноят кодексининг 73-моддасига асосан муддатидан илгари шартли равишда озод қилинди.
14 август очиқ сайёр суд мажлиси яна давом эттирилди ва туман ички ишлар органлари Пробация гуруҳи томонидан келтирилган 2 та тақдимнома кўриб чиқилди. Унда Жиноят ишлари бўйича туман суди раиси Султонмурод Давлетмуродов, туман прокурори ёрдамчиси Санжар Ёрмуҳаммедов ҳамда туман ички ишлар органлари Пробация гуруҳи катта инспектори Ислом Жабборбергановлар қатнашишди.
Суд мажлисида Жиноят ишлари бўйича туман судининг ўтган йилги ҳукми бўйича, валюта қимматликларини қонунга хилоф равишда ўтказиш жиноятини содир қилганлиги учун Ўзбекистон Республикаси Жиноят кодексининг 177-моддаси 3-қисми билан 3 йил муддатга озодликни чеклаш жазосига тортилган 2 нафар фуқарога доир иш кўриб чиқилди.
Ўтган давр мобайнида ушбу маҳкумларнинг ҳам ўрнатилган тартиб-қоидаларга амал қилганлиги, муносиб хулқ-атворда бўлганлиги ва меҳнатга ҳалол муносабатда бўлганлиги эътиборга олинди. Суд иши якунида улар ҳам ўталмаган жазо муддатидан Ўзбекистон Республикаси Жиноят кодексининг 73-моддасига асосан муддатидан илгари шартли равишда озод қилинди.
Бу саъй-ҳаракатлар олижаноб халқимизнинг меҳр-оқибатлилиги, ҳар доим эзгуликка мойиллиги, давлатмизнинг фуқароларга ғамхўрлиги намунасидир. Эндиликда улар одамлар орасида юксак ишончни оқлаш баробарида шу озод ва обод юртга дахлдорлик туйғусини намоён этиб яшашса, жамиятда муносиб ўрнини топиб, юртимиз равнақи йўлида ҳамиша ҳалол меҳнат қилишга интилишса мақсадга мувофиқ бўлади.
С.Давлетмуродов, Жиноят ишлари бўйича Амударё туман суди раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
