SUD MAJLISIDA PROBATsIYa HISOBIDAGI 5 NAFAR MAHKUMGA DOIR ISh MUHOKAMA QILINDI

Probatsiya boʻlinmalari ichki ishlar organlarining ozodlikdan mahrum qilish bilan bogʻliq boʻlmagan jazolarni ijro etish boʻyicha faoliyatini boshqa davlat organlari va tashkilotlari, shuningdek, jamoat tuzilmalari bilan oʻzaro hamkorlikda tashkil etadi. Shartli hukm qilingan va jazoni oʻtashdan muddatidan ilgari shartli ozod qilingan shaxslarning xulq-atvori ustidan taʼsirchan nazoratni amalga oshiradi.

Nazorat ostidagilarning qayta jinoyat sodir etish xavfini aniqlash va bunga yoʻl qoʻymaslik boʻyicha ham muntazam ravishda profilaktik chora-tadbirlar koʻriladi. Shu qatori sudlarga taqdimnomalar kiritish orqali munosib xulq-atvorda boʻlgan va tegishli tartib-qoidaga rioya etgan mahkumlarning muddatidan ilgari jazodan ozod etilishiga koʻmaklashiladi.

Sohada ijobiy samara koʻrsatayotgan bu kabi insonparvarlik tamoyillariga, tegishli tartib-qoidalarga tuman ichki ishlar organlari Probatsiya guruhi va Jinoyat ishlari boʻyicha tuman sudi tomonidan ham doimiy tarzda amal qilinib borilmoqda.

Shu yilning 11-avgust kuni Jinoyat ishlari boʻyicha tuman sudida ochiq sayyor sud majlisi boʻlib oʻtdi. Unda Jinoyat ishlari boʻyicha tuman sudi raisi Sultonmurod Davletmurodov, tuman prokurori yordamchisi Sanjar Yormuhammedov hamda tuman ichki ishlar organlari Probatsiya guruhi katta inspektori Islom Jabborberganovlar qatnashishdi.

Sud majlisida tuman ichki ishlar organlari Probatsiya guruhi tomonidan keltirilgan 3 ta taqdimnoma koʻrib chiqildi. Taqdimnomalarga asosan muqaddam Jinoyat ishlari boʻyicha tuman sudining oʻtgan yilgi hukmi boʻyicha, valyuta qimmatliklarini qonunga xilof ravishda oʻtkazish jinoyatini sodir qilganligi sababli Oʻzbekiston Respublikasi Jinoyat kodeksining 177-moddasi 3-qismiga koʻra 3-yil muddatga ozodlikni cheklash jazosi tayinlangan 1 nafar, muqaddam, yaʼni 2015-yilda Jinoyat ishlari boʻyicha Shumanoy tuman sudi tomonidan davlat mulkini talon –taroj qilish jinoyatini sodir qilganligi uchun Jinoyat kodeksining 167-moddasi 3-qismi “a” bandi bilan 3-yil muddatga 20 foiz axloq tuzatish ishlari jazosiga hukm qilingan 1 nafar, muqaddam Jinoyat ishlari boʻyicha Xoʻjayli tuman sudining oʻtgan yilgi hukmi boʻyicha qasddan badanga yengil tan jarohatini yetkazish jinoyatini sodir qilganligi tufayli Jinoyat kodeksining 109-moddasi 2-qismi bilan 1-yil muddatga 10 foiz axloq tuzatish ishlari jazosiga tortilgan yana 1 nafar mahkumga doir ish koʻrilib, keng muhokama qilindi.

Sud ishi yakunida ularning oʻrnatilgan tartib-qoidalar talablarini bajarganligi va mehnatga halol munosabatda boʻlganligi eʼtiborga olinib, oʻtalmagan jazo muddatidan Oʻzbekiston Respublikasi Jinoyat kodeksining 73-moddasiga asosan muddatidan ilgari shartli ravishda ozod qilindi.

14-avgust ochiq sayyor sud majlisi yana davom ettirildi va tuman ichki ishlar organlari Probatsiya guruhi tomonidan keltirilgan 2 ta taqdimnoma koʻrib chiqildi. Unda Jinoyat ishlari boʻyicha tuman sudi raisi Sultonmurod Davletmurodov, tuman prokurori yordamchisi Sanjar Yormuhammedov hamda tuman ichki ishlar organlari Probatsiya guruhi katta inspektori Islom Jabborberganovlar qatnashishdi.

Sud majlisida Jinoyat ishlari boʻyicha tuman sudining oʻtgan yilgi hukmi boʻyicha, valyuta qimmatliklarini qonunga xilof ravishda oʻtkazish jinoyatini sodir qilganligi uchun Oʻzbekiston Respublikasi Jinoyat kodeksining 177-moddasi 3-qismi bilan 3-yil muddatga ozodlikni cheklash jazosiga tortilgan 2 nafar fuqaroga doir ish koʻrib chiqildi.

Oʻtgan davr mobaynida ushbu mahkumlarning ham oʻrnatilgan tartib-qoidalarga amal qilganligi, munosib xulq-atvorda boʻlganligi va mehnatga halol munosabatda boʻlganligi eʼtiborga olindi. Sud ishi yakunida ular ham oʻtalmagan jazo muddatidan Oʻzbekiston Respublikasi Jinoyat kodeksining 73-moddasiga asosan muddatidan ilgari shartli ravishda ozod qilindi.

Bu saʼy-harakatlar olijanob xalqimizning mehr-oqibatliligi, har doim ezgulikka moyilligi, davlatmizning fuqarolarga gʻamxoʻrligi namunasidir. Endilikda ular odamlar orasida yuksak ishonchni oqlash barobarida shu ozod va obod yurtga daxldorlik tuygʻusini namoyon etib yashashsa, jamiyatda munosib oʻrnini topib, yurtimiz ravnaqi yoʻlida hamisha halol mehnat qilishga intilishsa maqsadga muvofiq boʻladi.

S.Davletmurodov, Jinoyat ishlari boʻyicha Amudaryo tuman sudi raisi.