Либосингиз - маънавий оламингиз кўзгуси
Инсоннинг юриш-туришига, кийинишига қараб баҳо беришади. Бу гапда жон бор. Негаки, инсоннинг кийган кийими унинг қандай эканлигини кўрсатиб туради. Инсониятнинг онги ўсиши билан унинг кийиниши ҳам ўзгариб боради. Бугунги кунда кийиниш услублари тубдан ўзгарган. Кийиниш маданияти эса инсонларнинг қай даражада шаклланганлигини кўрсатиб туради. Атрофга назар ташласак, турли кийим кийган одамларни кўрамиз.
Уларнинг кийинишлари қай даражада бизнинг менталитетимизга тўғри келади? Тарихга назар ташлайдиган бўлсак, аёллар кўзни қувонтирадиган даражада юз, қад-қомат гўзалликларини ўз либослари билан безаб, янада чиройли бўлиб юришган.
Аммо у замонлардаги аёллар кийими билан бугунги кийимлар ўртасида ер билан осмончалик фарқ бор. Мен бу билан юз йиллар ортга қайтиб, аёлларимиз классик услубдаги кийимларни кийишсин, демоқчи эмасман. Мен ўша замонлардаги аёллар кийимида акс этиб турган ибо-ҳаёни кийимларда намоён қилиш тарафдориман, холос.
Афсуски, ҳозирги кунда қизлар ҳам, йигитлар ҳам чет эл кийимларидан андоза олиб кийинмоқдалар. Ҳар ўн қиздан 3 нафари тор шимда, яна 3 нафари эса ўзига мос бўлмаган кийимларни кийиб олишади. Йигитларни ҳам бундай ўзгаришлар четлаб ўтаётгани йўқ, албатта.
Миллатимиз - ўзбек. Қон-қонимизга сингиб кетган ибо ва ҳаё, ўзига хос назокатимиз бизни бошқа миллатлардан ажратиб туради. Аммо бугунги ёшларнинг кийимларига эътибор берсак, қизларнинг кийимлари ҳаддан ташқари очиқ-сочиқ эканлиги ва тор шим кийиб юрганлиги дилни хира қилади. Бу, албатта кўзга хунук кўринадиган ҳолат ҳисобланади. Шифокорларнинг фикрларига қараганда танага ёпишиб турадиган, сунъий матодан тикилган кийимлар инсон танасининг нафас олишини қийинлаштирар экан. Ҳа, ҳар томонлама қулай, кийса, ўзини яхши ҳис қиладиган, унча тор бўлмаган кийимни кийиш энг аввало инсон саломатлиги, қолаверса, унинг ташқи кўриниши учун ҳам яхши. Йигитларнинг эгнидаги ўзига ҳаддан ташқари тор ёки йиртиқ-ямоқ жинси шимлари инсон кайфиятига ёмон таъсир қилади. Тенгдошларимизнинг бундай услубда кийиниши энг аввало саломатликка зарар бўлса, бундай тор кийимлар уларнинг жисмоний ривожланишига салбий таъсир қилади.
Қанчадан-қанча ёшлар бор, ҳавас қилса арзигудек. Уларнинг юриш-туриши, ақл-заковати, маданияти таҳсинларга арзийди. Аммо биз юқорида айтиб ўтгандай кийинишлар дилни хира қилади.
Шуни унутмаслик керакки, оммавий маданият - маънавият кушандаси. Маънан етук, соғлом фикрли инсонлар ҳеч қачон ўзлигини йўқотмайди.
Юлдуз ТУРСУНБОЕВА,
3-сонли Амударё академик лицейи ўқувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
