ЯНГИОБОД МАҲАЛЛАСИДА 30 КИШИЛИК ТЎЙ ЎТКАЗИЛДИ

Республика махсус комиссияси қарорига кўра, коронавирус пандемияси туфайли бир қатор фаолият турлари, тўйлар, оилавий тантаналар, оммавий байрамлар ўтказиш, аҳолининг бир жойда йиғилиши таъқиқлаб қўйилган эди. 1 июндан бошлаб “яшил” ҳудудларда айрим фаолият турларига, шунингдек, оилавий тантана, тўй, маърака ва маросимларни ўтказишга рухсат берилди. Фақат бундай тадбирлар фуқароларнинг ўз яшаш ҳовли ва уй-жойида, 30 кишидан кўп бўлмаган ҳолда ўтказилиши мажбурийлиги белгиланди. Оилавий тантана ва тўй-маърака, маросимларни ўтказишда санитария ва гигиена қоидаларига қатъий амал қилиш талаб этилади. Белгиланган талабларга риоя қилмаслик эса ўрнатилган тартибда маъмурий жавобгарликка тортишга сабаб бўлади.

Неча йиллардан бери тўйларимиз ҳақида, тўйларни камчиқим, исрофгарчиликсиз, тартибли ўтказиш ҳақида айтиб келинарди, бу борада махсус тавсияномалар ишлаб чиқилди, ҳатто қарорлар қабул қилинди. Бироқ аксарият юртдошларимиз ким ўзарга, “мен сендан кам эмасман”, дегандек, биров-бировдан ошириб тўй қилди, икки ёшнинг бир оила бўлиб бирлашадиган қутлуғ куни дабдабабозлик ва исрофгарчилик маросимларига айланди.

Ҳар ишда бир ҳикмат бўлади, деганларидай коронавирус пандемияси туфайли ўрнатилган карантин қоидалари бизга бу бефойда одатлардан тийилиб, ўз ҳаётимиз ҳақида чуқурроқ мулоҳаза қилишга, қайси амалларимиз хайрли-ю, қайсиси инсонийликка тўғри келмаслиги ҳақида теранроқ ўйлаб кўришга, ўз-ўзимизни ислоҳ қилишга имкон яратди.

Мамлакатимизнинг “яшил” тоифадаги ҳудудларида 30 кишидан ошмаган ҳолда ўтказилаётган тўйлар аввал бу борада қанчалик ноўрин ҳолатларга йўл қўйиб келганлигимизни кўрсатмоқда. Ахир ҳар қанча дабдабали тўй, сеплар икки ёшнинг бахтига кафолат беролмаслиги барчага бирдек аён эди. Аксинча, тўйга сарфланган харажатларнинг қарзини узолмай, қийин ҳолатга тушиб қолган оилалар кўп учрар эди.

29 июнь куни Янгиобод маҳалласи, Янгиобод кўчасида истиқомат қилувчи Баҳром Ражабов ва Гулжон ҳожи она Янгибоевалар хонадонида ҳам бугунги кун талабларига мувофиқ тўй бўлиб ўтди. Оиланинг кенжа ўғли уйланди. Тўй-маслаҳат, кенгаш, қўниқларсиз, бир кунда ўз хонадонида бўлиб ўтди ва унда энг яқин қариндошлар, келин-куёвнинг энг яқин дўстлари ва қўшнилар иштирок этдилар.

Аввалги тўйлардагидек турнақатор машиналарда “гулянка”, тўйхонада ёшлар базмига чек қўйилиб, базм ҳам хонадон эгаларининг ҳовлисида нишонланди. Тадбиркор йигит ва ҳамширалик мутахассислигига эга қизнинг тақдир ришталари боғланган, уларни оқ ювиб, оқ тараб вояга етказган ота-оналарининг орзу-армонлари ушалган кун тантанаси - тўй оқшоми жуда файзли ўтди.

Айниқса, қайнона Гулжон ҳожи она Янгибоева кенжатой ўғлига исрофгарчиликларсиз, ихчам ва жуда мазмунли тўй қилишганидан жуда қувонди, ҳатто ташриф буюрувчиларга тўёнасиз келишларини, ўғил ўйлантириш ота-она бурчи эканлигини уқтиришга ҳаракат қилди, барчани пандемия бартараф этилганидан сўнг ҳам тўй-тантаналардаги ушбу тартибни сақлаб қолишга чақирди.

Тантанада иштирок этган нуронийлар ёшларга мустаҳкам соғлик, бахт, узоқ умр тилаб дуолар қилдилар ва тўй-тантаналарни ихчам ҳамда исрофгарчиликлардан холи ҳолда ўтказиш лозимлигини таъкидлаб ўтдилар.

Ойгул РАЖАБОВА.