Олий Мажлис Қонунчилик палатаси депутатлари туманимизга ташриф буюрди

Жорий йилнинг 19 июнь санасида Амударё туманида аҳоли турмуш даражаси ва сифатини яхшилаш, камбағалликни қисқартиш, аҳоли бандлигини таъминлаш, тадбиркорларни қийнаб келаётган муаммоларни ҳал этиш борасида секторларда амалга оширилаётган ишларнинг ҳолатини ўрганиш мақсадида ишчи гуруҳ ташриф буюрди.

Ишчи гуруҳ аъзолари – Ўзбекистин Республикаси Олий Мажлиси Қонунчилик палатаси депутатлари Абдураҳим Қурбонов ва Шерзод Кулматов, шунингдек, Қорақалпоғистон Республикаси Жўқорғи Кенгесининг қўмита раиси Абу-Бакир Ибрагимовлар туман ҳокимлигида сектор ҳамда соҳалар раҳбарлари, депутатлар, туман фаоллари билан йиғилиш ўтказиб, кун тартибидаги масалалар юзасидан суҳбатлашдилар.

Йиғилиш мобайнида Олий Мажлис Қонунчилик палатаси депутатлари ҳудудларда ижтимоий-иқтисодий масалалар қай даражада самарали ҳал этилаётганини таҳлил этиш, тадбиркорлик субъектлари, аҳоли вакиллари билан бевосита мулоқот қилиб, уларни ўйлантираётган муаммоларни жойига чиқиб ўрганиш, амалий кўмак бериш масалаларига эътибор қаратдилар.

Шунингдек, йиғилиш мобайнида ҳозирги пандемия шароитида туманда барча соҳалардаги мавжуд муаммо ҳамда камчиликлар юзасидан мутасадди раҳбарларнинг фикрлари тингланди. Хусусан, туман санитария-эпидемиологик осойишталик маркази бош шифокори Тўрамурод Бобониёзов ҳамда туман тиббиёт бирлашмаси бошлиғи вазифасини бажарувчи Зариф Ўразимбетовлар бугунги кунда туманимиздаги эпидемиологик ҳолат ҳамда пандемия кириб келиши ва тарқалишининг олдини олиш юзасидан амалга оширилаётган чора-тадбирлар юзасидан маълумот бердилар.

Шундан сўнг, мутасаддилар ҳокимлик биносидаги депутатлар хонасида туман Кенгаши депутатлари билан шу кунга қадар амалга оширган ишлари хусусида суҳбатлашдилар. Шунингдек, секторларда юритилаётган кам таъминланган, эҳтиёжманд оилалар рўйхати билан танишдилар.

Ишчи гуруҳ аъзолари тумандаги бугунги кунда тадбиркорлар учун яратилаётган имконият ҳамда шарт-шароитлар, имтиёзлардан оқилона фойдаланиб, ўзининг самарали тадбиркорлик фаолиятини олиб бораётган тадбиркорлик субъектлари фаолияти билан ҳам танишдилар.

Хусусан, янгидан ўз фаолиятини бошлаган “Behruz Market” супермаркетига ташриф буюриб, савдо дўконининг ҳолати, иш жараёни билан танишиб, тадбиркор билан яқиндан суҳбатлашдилар. Ёш тадбиркор Aброр Матякубовдан тадбиркорлик фаолиятини олиб боришда қандай муаммо ҳамда камчиликлари борлиги, қандай ёрдам кераклиги билан қизиқдилар.

Шунингдек, туманимизда 2016 йилдан бери ўз тадбиркорлигини давом эттираётган Мақсад Собиров раҳбарлигидаги “Дўстлик-Чойкўл савдо” масъулияти чекланган жамиятидаги иш жараёнларининг ташкил этилиши ҳам мутасаддиларда катта таассурот қолдирди. Мазкур ташкилот “Artel” маиший техникалар ишлаб чиқариш заводининг туман филиали бўлиб, ҳозирда у ерда 12 нафар ишчи ходимлар хизмат қилишади. Филиалда иш жараёнлари барча карантин қоидаларига амал қилган ҳолда ташкил қилинган.

Сўнгра меҳмонлар туманимиздаги ип-калава ишлаб чиқаришга ихтисослашган “Amudaryo tex” хорижий корхонасининг фаолиятини ўргандилар. Ташриф чоғида мазкур корхонада барча ишчи ходимлар тўлиқ карантин қоидаларига амал қилган ҳолда иш олиб бораётганининг ҳамда корхона иш фаолияи натижасида кўплаб ёшларининг бандлиги таъминланаётганининг гувоҳи бўлишди. Корхона раҳбари билан суҳбат чоғида ўзларини қизиқтирган барча саволларга жавоблар олдилар. Шунингдек, хорижий корхонанинг келгусидаги фаолиятига янги муваффақиятлар тиладилар.

Aйтиш керакки, туманимизда ёшлар бандлигини таъминаш борасида ҳам самарали ишлар амалга оширилмоқда. Aна шундай ёшларимизнинг олиб бораётган иш фаолияти ҳам ишчи гуруҳ аъзолари эътибори марказида бўлди. Хусусан, ўзининг бандлигини таъминлаш мақсадида Ўзбекистон Ёшлар иттифоқи Амударё туман Кенгашига мурожаат қилиб, туман ҳокимлиги тасарруфидаги заҳира ерларида ўз деҳқончилигини бошлаган Бегзод Эркаев билан суҳбат чоғида ёш тадбиркор бу иш орқали нафақат ўзи балки бутун оила аъзоларининг бандлиги таъминланганини таъкидлади.

Пандемия шароитида ижтимоий ҳимояга муҳтож инсонларни қўллаб-қувватлаш, ишсиз фуқароларнинг бандлигини таъминлаш, камбағалликни қисқартириш борасидаги ишлар тизимли равишда давом эттирилмоқда.

Туман ҳокимлигининг Ахборот хизмати.