Oliy Majlis Qonunchilik palatasi deputatlari tumanimizga tashrif buyurdi

Joriy yilning 19-iyun sanasida Amudaryo tumanida aholi turmush darajasi va sifatini yaxshilash, kambagʻallikni qisqartish, aholi bandligini taʼminlash, tadbirkorlarni qiynab kelayotgan muammolarni hal etish borasida sektorlarda amalga oshirilayotgan ishlarning holatini oʻrganish maqsadida ishchi guruh tashrif buyurdi.

Ishchi guruh aʼzolari – Oʻzbekistin Respublikasi Oliy Majlisi Qonunchilik palatasi deputatlari Abdurahim Qurbonov va Sherzod Kulmatov, shuningdek, Qoraqalpogʻiston Respublikasi Joʻqorgʻi Kengesining qoʻmita raisi Abu-Bakir Ibragimovlar tuman hokimligida sektor hamda sohalar rahbarlari, deputatlar, tuman faollari bilan yigʻilish oʻtkazib, kun tartibidagi masalalar yuzasidan suhbatlashdilar.

Yigʻilish mobaynida Oliy Majlis Qonunchilik palatasi deputatlari hududlarda ijtimoiy-iqtisodiy masalalar qay darajada samarali hal etilayotganini tahlil etish, tadbirkorlik subʼektlari, aholi vakillari bilan bevosita muloqot qilib, ularni oʻylantirayotgan muammolarni joyiga chiqib oʻrganish, amaliy koʻmak berish masalalariga eʼtibor qaratdilar.

Shuningdek, yigʻilish mobaynida hozirgi pandemiya sharoitida tumanda barcha sohalardagi mavjud muammo hamda kamchiliklar yuzasidan mutasaddi rahbarlarning fikrlari tinglandi. Xususan, tuman sanitariya-epidemiologik osoyishtalik markazi bosh shifokori Toʻramurod Boboniyozov hamda tuman tibbiyot birlashmasi boshligʻi vazifasini bajaruvchi Zarif Oʻrazimbetovlar bugungi kunda tumanimizdagi epidemiologik holat hamda pandemiya kirib kelishi va tarqalishining oldini olish yuzasidan amalga oshirilayotgan chora-tadbirlar yuzasidan maʼlumot berdilar.

Shundan soʻng, mutasaddilar hokimlik binosidagi deputatlar xonasida tuman Kengashi deputatlari bilan shu kunga qadar amalga oshirgan ishlari xususida suhbatlashdilar. Shuningdek, sektorlarda yuritilayotgan kam taʼminlangan, ehtiyojmand oilalar roʻyxati bilan tanishdilar.

Ishchi guruh aʼzolari tumandagi bugungi kunda tadbirkorlar uchun yaratilayotgan imkoniyat hamda shart-sharoitlar, imtiyozlardan oqilona foydalanib, oʻzining samarali tadbirkorlik faoliyatini olib borayotgan tadbirkorlik subʼektlari faoliyati bilan ham tanishdilar.

Xususan, yangidan oʻz faoliyatini boshlagan “Behruz Market” supermarketiga tashrif buyurib, savdo doʻkonining holati, ish jarayoni bilan tanishib, tadbirkor bilan yaqindan suhbatlashdilar. Yosh tadbirkor Abror Matyakubovdan tadbirkorlik faoliyatini olib borishda qanday muammo hamda kamchiliklari borligi, qanday yordam kerakligi bilan qiziqdilar.

Shuningdek, tumanimizda 2016-yildan beri oʻz tadbirkorligini davom ettirayotgan Maqsad Sobirov rahbarligidagi “Doʻstlik-Choykoʻl savdo” masʼuliyati cheklangan jamiyatidagi ish jarayonlarining tashkil etilishi ham mutasaddilarda katta taassurot qoldirdi. Mazkur tashkilot “Artel” maishiy texnikalar ishlab chiqarish zavodining tuman filiali boʻlib, hozirda u yerda 12 nafar ishchi xodimlar xizmat qilishadi. Filialda ish jarayonlari barcha karantin qoidalariga amal qilgan holda tashkil qilingan.

Soʻngra mehmonlar tumanimizdagi ip-kalava ishlab chiqarishga ixtisoslashgan “Amudaryo tex” xorijiy korxonasining faoliyatini oʻrgandilar. Tashrif chogʻida mazkur korxonada barcha ishchi xodimlar toʻliq karantin qoidalariga amal qilgan holda ish olib borayotganining hamda korxona ish faoliyai natijasida koʻplab yoshlarining bandligi taʼminlanayotganining guvohi boʻlishdi. Korxona rahbari bilan suhbat chogʻida oʻzlarini qiziqtirgan barcha savollarga javoblar oldilar. Shuningdek, xorijiy korxonaning kelgusidagi faoliyatiga yangi muvaffaqiyatlar tiladilar.

Aytish kerakki, tumanimizda yoshlar bandligini taʼminash borasida ham samarali ishlar amalga oshirilmoqda. Ana shunday yoshlarimizning olib borayotgan ish faoliyati ham ishchi guruh aʼzolari eʼtibori markazida boʻldi. Xususan, oʻzining bandligini taʼminlash maqsadida Oʻzbekiston Yoshlar ittifoqi Amudaryo tuman Kengashiga murojaat qilib, tuman hokimligi tasarrufidagi zahira yerlarida oʻz dehqonchiligini boshlagan Begzod Erkayev bilan suhbat chogʻida yosh tadbirkor bu ish orqali nafaqat oʻzi balki butun oila aʼzolarining bandligi taʼminlanganini taʼkidladi.

Pandemiya sharoitida ijtimoiy himoyaga muhtoj insonlarni qoʻllab-quvvatlash, ishsiz fuqarolarning bandligini taʼminlash, kambagʻallikni qisqartirish borasidagi ishlar tizimli ravishda davom ettirilmoqda.

Tuman hokimligining Axborot xizmati.