МАСОФАВИЙ ТАЪЛИМ КАТТА ҚУЛАЙЛИК ЯРАТДИ
COVID-19 коронавирус пандемияси тарқалишига қарши мамлакатимизда Президентимиз бошчилигида кўплаб чора-тадбирлар ишлаб чиқилиб, амалиётга жорий этилмоқда. Шу йил 16 мартдан эътиборан барча ўқув масканлари, мактаб ва мактабгача таълим муассасалари фаолияти вақтинчалик тўхтатилди. Aммо ўқувчилар ўқишни масофадан туриб давом эттириб, мавзуларни ўрганишди.
Шуни қувонч билан айтаманки, дарсларнинг телевидение орқали онлайн ташкил қилиниши нафақат ўқитувчи ва ўқувчиларнинг, балки барча фуқароларимизнинг кайфиятини кўтарди. Ваҳимага асло ўрин қолмади. Ҳар бир ўқувчи уйида билим олишига шароит яратилди. Aйни пайтдаги вазиятда масофавий таълим олишнинг ўзи катта қулайлик ҳисобланади.
Мен ҳам белгиланган телеканаллар орқали эфирга узатилаётган инглиз тили дарсларига қўшимча равишда ижтимоий тармоқларда машғулотлар олиб бордим. Фан бўйича ўрганиш жараёнида ўқувчилар дуч келаётган муаммоларни бартараф этишда кўмаклашиш учун уларга пухта ва аниқ тушунчалар бердим.
Май ойида ўтказилиши керак бўлган инглиз тили фан ойлигини масофадан туриб давом эттириб, мослаштирган ҳолда бир қанча ўзгартиришлар киритдик. Ўқувчилар билан савол-жавоблар ташкил қилдик. Тестларни онлайн тарзда олиб бориб, жавоблари асосида ўқувчиларнинг билимларини баҳоладик. Яхши натижа кўрсатган ўқувчиларни эса рағбатлантириб бордик.
Биз ўқитувчи ва ўқувчилар коронавирус пандемиясига қарши курашиш учун уйда қолиб, масофадан таълимни давом эттириш билан бирга ўқувчиларга коронавирусдан ҳимояланиш, карантин қоидаларига қатъий амал қилиш бўйича тушунтиришлар ҳам бериб, шу билан бирга уларни руҳлантириб бордик. Ўқувчиларимиз ҳам бутун дунёни ташвишга қўйган бу синовли вазиятда тушкунликка тушмаган ҳолда ўқишни давом эттиришди ва яхши баҳо олишга ҳаракат қилишди.
Албатта, биз бирга курашсак, ҳар қандай офатни бирга енгамиз! Бу пандемия тез орада юртимиздан кетишига ишонамиз. Ҳамжиҳатлик билан тез орада бу синовли кунлардан ўтиб, доимий фаровон ҳаётимизга қайтамиз.
Уйда қолинг! Stay home!
Замира Отажонова,
36-сонли мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
