ПАНДЕМИЯ ШАРОИТИДА ҲАМ АГРАР СОҲА ХОДИМЛАРИ МЎЛ ҚИШЛОҚ ХЎЖАЛИК МАҲСУЛОТЛАРИ ЕТИШТИРМОҚДАЛАР

Туманимизда 32570 томорқа ер эгалари, 62 та деҳқон хўжаликлари мавжуд бўлиб, уларнинг томорқа ер майдони 5217,3 гектарни ташкил қилади.

Аграр соҳа ходимлари пандемия шароитида карантин режими жорий этилган бўлса-да, мўл ҳосил етиштириб, озиқ-овқат маҳсулотлари хавфсизлигини таъминлаш, тақчиллигининг олдини олишда жонбозлик кўрсатмоқдалар.

Шароитга кўра, деҳқон хўжаликлари ва томорқа ер эгалари замонавий технологиялардан унумли фойдаланиб, юқори ҳосил олишни, сув сарфини камайтиришни асосий вазифа қилиб олдилар.

Ўзбекистон қишлоқ хўжалигида кўп йиллик бой тажриба ва юксак илмий салоҳиятга эга мамлакат. Хусусан, Амударё тумани йиллар давомида озиқ-овқат маҳсулотлари билан наинки, ўзини ўзи тўла боқиб келган, балки қўшни туманларимизни ҳам таъминлаб келмоқда. Туман аграр сектори эртапишар ва кечпишар мева-сабзавот маҳсулотларини етиштириш ва қайта ишлашда катта салоҳиятга эга. Кейинги йилларда замонавий иссиқхоналарда барча фаслларда ҳам сабзавотлар етиштирилиб, экспорт қилиш ҳам йўлга қўйилди.

2020 йил январь-март ойларида 4 та сектор раҳбарлари бошчилигида аҳоли хонадонларига кириб, эрта баҳорда камида 5-10 тадан мевали дарахт кўчатлари, эртаки сабзавотлар экиш, ердан самарали фойдаланиш бўйича тарғибот ишлари олиб борилди. Фермер, деҳқон хўжаликлари ва томорқа ер эгалари фаолиятини янада ривожлантириш, уларнинг экин майдонларидан самарали фойдаланишини ташкил этиш бўйича чора-тадбирлар дастури ишлаб чиқилиб, амалга оширилмоқда.

Бугунги кунда ишчи гуруҳ аъзолари билан биргаликда мавжуд аҳоли томорқаларини хатловдан ўтказиш жараёнида деҳқон хўжаликлари, аҳоли томорқаларида эртаки сабзавотлар экинлари экилиб, яхши парвариш қилинаётгани аниқланди. Дастлабки етилган сабзавотлардан карам, пиёз, бодринг, картошка ҳосиллари бозорларга чиқарилди.

2020 йилда 3141,9 гектар ўртаки, яъни такрорий экинлар экиш режалаштирилган. Жумладан, 945,9 гектарга сабзавотлар, 318,3 гектарга картошка, 304,5 гектарга полиз экинлари, 413,5 гектарга озуқабоп экинлар ҳамда 1160,2 гектарга бошқа экинлар экиш ва улардан 41235,8 тонна ҳосил олиниши режалаштирилган эди. Шу кунгача шолидан ташқари, деярли барча экинлар экиб бўлинди.

Аҳоли томорқаларида 1183 та иссиқхоналар мавжуд бўлиб, шундан 450 таси жорий йилда янгидан ташкил этилди.

Аҳоли хонадонлари ва томорқаларидан самарали фойдаланиш, 2-3 марта ҳосил олиш тўғрисида тушунтириш-тарғибот ишлари тизимли равишда олиб борилмоқда. Натижада 694,3 гектар майдонга эртаки картошка экилди, ўртаки (такрорий) мавсумда 318,3 гектар томорқа ер майдонига картошка экиш режалаштирилган, 158 гектар майдонга эртаки сабзи экилди, ўртаки (такрорий) мавсумда 85,1 гектар томорқа ер майдонига экиш, 180,5 гектар майдонга эртаки, ўртаки (такрорий) мавсумда эса 56,8 гектар томорқа ер майдонига карам экиш, 477,3 гектар майдондаги  эртаки полиз экинларидан 7 159,5 тонна ҳосил олиш, ўртаки (такрорий) мавсумда эса  304,5 гектар томорқа ер майдонига полиз экинлари экиш ҳамда 4 480,2 тонна ҳосил, жами 11 600 тонна ҳосил олиш, дуккакли экинлардан 700 тонна ҳосил олиш режалаштирилган. 389 та фермер хўжаликлари 3377 та хонадонларнинг томорқа ер майдонларини ҳайдаш, мевали дарахтлар, сабзавот уруғ ва кўчатларини етказиб беришда кўмаклашиш бўйича бириктирилди. Шунингдек, “Саховат ва кўмак” умумхалқ ҳаракат доирасида ҳар бир фермер хўжаликлари раҳбарлари ўзлари яшаб турган ҳудуддаги кам таъминланган ижтимоий ҳимояга муҳтож оилаларга саховат кўрсатиб, ҳомийлик ёрдамларини бериб келмоқда.

Бундан ташқари, туман ҳокимининг жорий йил 27 апрель кунги фармойишига асосан 354 та кам таъминланган оилаларга помидор, бодринг, бақлажон кўчатлари етказиб берилди.

Шунингдек, туман ҳокими қарори билан “Мева-сабзавот қишлоқ хўжалик кооперативи” ташкил этилиб, умумий 45,3 гектар ер майдони Рустам Тўраевга ажратиб берилди ва ишсиз ёшлар кооператив аъзолигига қабул қилиниб, аҳолининг иш билан банд бўлмаган қатламидан 50 нафар фуқаронинг бандлиги таъминланди.

Хулоса қилиб айтадиган бўлсак, пандемия  оқибатларидан жаҳонда иқтисодий ва озиқ-овқат инқирози тобора чуқурлашаётган бир даврда мамлакатимизда озиқ-овқат хавфсизлигини таъминлаш учун етарли даражада чора-тадбирлар амалга оширилмоқда.
Бу мамлакатимиз аҳолиси турмуш даражасининг ошишини таъминлайди.

Илҳом ПОЛВОНОВ,
туман Фермер, деҳқон хўжаликлари ва томорқа ер эгалари Кенгаши раиси.