PANDEMIYa ShAROITIDA HAM AGRAR SOHA XODIMLARI MOʻL QIShLOQ XOʻJALIK MAHSULOTLARI YeTIShTIRMOQDALAR

Tumanimizda 32570 tomorqa yer egalari, 62 ta dehqon xoʻjaliklari mavjud boʻlib, ularning tomorqa yer maydoni 5217,3 gektarni tashkil qiladi.

Agrar soha xodimlari pandemiya sharoitida karantin rejimi joriy etilgan boʻlsa-da, moʻl hosil yetishtirib, oziq-ovqat mahsulotlari xavfsizligini taʼminlash, taqchilligining oldini olishda jonbozlik koʻrsatmoqdalar.

Sharoitga koʻra, dehqon xoʻjaliklari va tomorqa yer egalari zamonaviy texnologiyalardan unumli foydalanib, yuqori hosil olishni, suv sarfini kamaytirishni asosiy vazifa qilib oldilar.

Oʻzbekiston qishloq xoʻjaligida koʻp yillik boy tajriba va yuksak ilmiy salohiyatga ega mamlakat. Xususan, Amudaryo tumani yillar davomida oziq-ovqat mahsulotlari bilan nainki, oʻzini oʻzi toʻla boqib kelgan, balki qoʻshni tumanlarimizni ham taʼminlab kelmoqda. Tuman agrar sektori ertapishar va kechpishar meva-sabzavot mahsulotlarini yetishtirish va qayta ishlashda katta salohiyatga ega. Keyingi yillarda zamonaviy issiqxonalarda barcha fasllarda ham sabzavotlar yetishtirilib, eksport qilish ham yoʻlga qoʻyildi.

2020-yil yanvar-mart oylarida 4 ta sektor rahbarlari boshchiligida aholi xonadonlariga kirib, erta bahorda kamida 5-10 tadan mevali daraxt koʻchatlari, ertaki sabzavotlar ekish, yerdan samarali foydalanish boʻyicha targʻibot ishlari olib borildi. Fermer, dehqon xoʻjaliklari va tomorqa yer egalari faoliyatini yanada rivojlantirish, ularning ekin maydonlaridan samarali foydalanishini tashkil etish boʻyicha chora-tadbirlar dasturi ishlab chiqilib, amalga oshirilmoqda.

Bugungi kunda ishchi guruh aʼzolari bilan birgalikda mavjud aholi tomorqalarini xatlovdan oʻtkazish jarayonida dehqon xoʻjaliklari, aholi tomorqalarida ertaki sabzavotlar ekinlari ekilib, yaxshi parvarish qilinayotgani aniqlandi. Dastlabki yetilgan sabzavotlardan karam, piyoz, bodring, kartoshka hosillari bozorlarga chiqarildi.

2020-yilda 3141,9 gektar oʻrtaki, yaʼni takroriy ekinlar ekish rejalashtirilgan. Jumladan, 945,9 gektarga sabzavotlar, 318,3 gektarga kartoshka, 304,5 gektarga poliz ekinlari, 413,5 gektarga ozuqabop ekinlar hamda 1160,2 gektarga boshqa ekinlar ekish va ulardan 41235,8 tonna hosil olinishi rejalashtirilgan edi. Shu kungacha sholidan tashqari, deyarli barcha ekinlar ekib boʻlindi.

Aholi tomorqalarida 1183 ta issiqxonalar mavjud boʻlib, shundan 450 tasi joriy yilda yangidan tashkil etildi.

Aholi xonadonlari va tomorqalaridan samarali foydalanish, 2-3-marta hosil olish toʻgʻrisida tushuntirish-targʻibot ishlari tizimli ravishda olib borilmoqda. Natijada 694,3 gektar maydonga ertaki kartoshka ekildi, oʻrtaki (takroriy) mavsumda 318,3 gektar tomorqa yer maydoniga kartoshka ekish rejalashtirilgan, 158 gektar maydonga ertaki sabzi ekildi, oʻrtaki (takroriy) mavsumda 85,1 gektar tomorqa yer maydoniga ekish, 180,5 gektar maydonga ertaki, oʻrtaki (takroriy) mavsumda esa 56,8 gektar tomorqa yer maydoniga karam ekish, 477,3 gektar maydondagi  ertaki poliz ekinlaridan 7 159,5 tonna hosil olish, oʻrtaki (takroriy) mavsumda esa  304,5 gektar tomorqa yer maydoniga poliz ekinlari ekish hamda 4 480,2 tonna hosil, jami 11 600 tonna hosil olish, dukkakli ekinlardan 700 tonna hosil olish rejalashtirilgan. 389 ta fermer xoʻjaliklari 3377 ta xonadonlarning tomorqa yer maydonlarini haydash, mevali daraxtlar, sabzavot urugʻ va koʻchatlarini yetkazib berishda koʻmaklashish boʻyicha biriktirildi. Shuningdek, “Saxovat va koʻmak” umumxalq harakat doirasida har bir fermer xoʻjaliklari rahbarlari oʻzlari yashab turgan hududdagi kam taʼminlangan ijtimoiy himoyaga muhtoj oilalarga saxovat koʻrsatib, homiylik yordamlarini berib kelmoqda.

Bundan tashqari, tuman hokimining joriy yil 27-aprel kungi farmoyishiga asosan 354 ta kam taʼminlangan oilalarga pomidor, bodring, baqlajon koʻchatlari yetkazib berildi.

Shuningdek, tuman hokimi qarori bilan “Meva-sabzavot qishloq xoʻjalik kooperativi” tashkil etilib, umumiy 45,3 gektar yer maydoni Rustam Toʻrayevga ajratib berildi va ishsiz yoshlar kooperativ aʼzoligiga qabul qilinib, aholining ish bilan band boʻlmagan qatlamidan 50 nafar fuqaroning bandligi taʼminlandi.

Xulosa qilib aytadigan boʻlsak, pandemiya  oqibatlaridan jahonda iqtisodiy va oziq-ovqat inqirozi tobora chuqurlashayotgan bir davrda mamlakatimizda oziq-ovqat xavfsizligini taʼminlash uchun yetarli darajada chora-tadbirlar amalga oshirilmoqda.
Bu mamlakatimiz aholisi turmush darajasining oshishini taʼminlaydi.

Ilhom POLVONOV,
tuman Fermer, dehqon xoʻjaliklari va tomorqa yer egalari Kengashi raisi.