ИПАК ҚУРТИ БОҚИШ ҲАМ ЗАВҚЛИ МЕҲНАТ

Пиллачилик машаққатли ва кўп меҳнат талаб қилувчи соҳа. Бироқ узоқ йиллар давомида ҳар йили кўкламни – ипак қурти боқиш мавсумини соғиниб кутадиганлар ҳам оз эмас.

Ҳа, кун сайин эмас, соат сайин улғайиб, пиллакорларнинг меҳнатидан қимматбаҳо хом ашёга айланадиган ипак қуртларини парваришлашнинг ўзгача завқи ҳам бор. Ундан келадиган даромад эса оилалар иқтисоди юксалишига муносиб ҳисса бўлиб қўшилади.

Жорий йилги ипак қурти боқиш мавсумида Дўрман овул фуқаролар йиғини раиси, таълим фахрийси Отамурод Юсупов йиғин биносида ўзига хос бир тажрибани қўллади: 11 қути ипак қурти олиб, боқиш учун овулдаги ишсиз фуқаролар Роҳатой Абдуллаева, Манзура Олламова, Ҳусния Йўлдошева, Бегзод Ражабов, Шоҳиста Йўлдошева, Умида Аҳмедова, Қадамбой Жуматов, Роза Собирова, Рашид Жуматов, Нилуфар Раҳимбоева, Ёқутжон Болтабоеваларни вақтинча иш билан таъминлади. Ҳозир улар парваришлаётган ипак қуртлари бешинчи ёшининг тўртинчи кунида, яхши ривожланмоқда.

Аҳил жамоа 11 қути ипак қуртидан 600 килограмм ҳосил етиштиришга ҳаракат қилишаяпти. Улар учун барча шароитлар яратилган, яъни барг ўриб келиш учун транспорт ажратилиб, иш ҳам енгиллаштирилган. Иш бошида ишчиларнинг барчаси тушлик, иссиқ овқат билан таъминланиб, дам олишларига ҳам шароит яратилган.

Овулнинг 11 нафар фуқароси  ҳам вақтинча бўлса-да, иш билан таъминланганидан, ҳам фойдали меҳнат қилаётганидан хурсанд. Мавсум охирида улар 1-1,5 млн. сўмдан ойлик олишади.

Куюк кўпир овулида яшовчи Париза Ўрозбоева кўп йиллардан бери ҳар йили кўкламда ипак қурти парваришлаб, режадагидан зиёд ҳосил етиштириб келади. Бу йилги  мавсумда у 19 грамм ипак қуртини сифатли парвариш қилмоқда. Бу йил 56 килограмм аъло сифатли пилла етиштиришни кўзлаётган Париза мавсум бошида 240 000 сўм бўнак пули олди. Топширган ҳосили миқдорига қараб, ҳали яна яхшигина даромад олишни кўзламоқда. Чунки қарамоғидаги ипак қуртлари яхши ривожланаяпти.
Куюк кўпир овули бўйича жами 20 хонадонда 19 қути ипак қурти парвариш қилинмоқда. Режа эса юксак, ҳар бир қути ипак қуртидан 56 килограммдан  қимматбаҳо хом ашё етиштирилиши лозим.

Овулдаги ипак қуртлари парваришланаётган хонадонларни кўздан кечирсангиз – бир текис, соғлом ривожланаётган ипак қуртларини кўриб, кўнгилингизда бу марра ортиғи билан адо этилишига ишонч уйғонади.

Бу йилги мавсумда туманимиз бўйича 3768 қути ипак қурти парвариш қилинаяпти. 208 тонна пилла етиштириш режалаштирилган. Ипак  қуртларини тўйимли озуқа билан таъминлаш учун ҳар йили тут плантациялари кенгайтирилиб, янги тутзорлар барпо этилаяпти ва яхши ривожланиши учун агротехника қоидаларига мувофиқ парвариш қилинаяпти.

Пиллачилик сердаромад соҳа. Қишлоқ хўжалигининг бошқа тармоқлари каби бу соҳада ҳам ишнинг сирини пухта биладиган миришкорлар кўп. Тармоқда амалга оширилган ислоҳотлар туфайли пиллакорлар халқимиз фаровонлиги йўлида меҳнат қилаётган қишлоқ хўжалиги ходимлари қаторидан муносиб ўрин олишмоқда. Айниқса, кейинги йилларда эътибор тобора кучайтирилиб, пиллакорларнинг моддий манфаатдорлиги оширилмоқда. Бу эса вақтинча ишсиз фуқароларнинг оиласи бағрида бўлиб, даромад топишига имконият яратмоқда.

Ойгул РАЖАБОВА.