IPAK QURTI BOQISh HAM ZAVQLI MEHNAT

Pillachilik mashaqqatli va koʻp mehnat talab qiluvchi soha. Biroq uzoq yillar davomida har yili koʻklamni – ipak qurti boqish mavsumini sogʻinib kutadiganlar ham oz emas.

Ha, kun sayin emas, soat sayin ulgʻayib, pillakorlarning mehnatidan qimmatbaho xom ashyoga aylanadigan ipak qurtlarini parvarishlashning oʻzgacha zavqi ham bor. Undan keladigan daromad esa oilalar iqtisodi yuksalishiga munosib hissa boʻlib qoʻshiladi.

Joriy yilgi ipak qurti boqish mavsumida Doʻrman ovul fuqarolar yigʻini raisi, taʼlim faxriysi Otamurod Yusupov yigʻin binosida oʻziga xos bir tajribani qoʻlladi: 11 quti ipak qurti olib, boqish uchun ovuldagi ishsiz fuqarolar Rohatoy Abdullayeva, Manzura Ollamova, Husniya Yoʻldosheva, Begzod Rajabov, Shohista Yoʻldosheva, Umida Ahmedova, Qadamboy Jumatov, Roza Sobirova, Rashid Jumatov, Nilufar Rahimboyeva, Yoqutjon Boltaboyevalarni vaqtincha ish bilan taʼminladi. Hozir ular parvarishlayotgan ipak qurtlari beshinchi yoshining toʻrtinchi kunida, yaxshi rivojlanmoqda.

Ahil jamoa 11 quti ipak qurtidan 600 kilogramm hosil yetishtirishga harakat qilishayapti. Ular uchun barcha sharoitlar yaratilgan, yaʼni barg oʻrib kelish uchun transport ajratilib, ish ham yengillashtirilgan. Ish boshida ishchilarning barchasi tushlik, issiq ovqat bilan taʼminlanib, dam olishlariga ham sharoit yaratilgan.

Ovulning 11 nafar fuqarosi  ham vaqtincha boʻlsa-da, ish bilan taʼminlanganidan, ham foydali mehnat qilayotganidan xursand. Mavsum oxirida ular 1-1,5 mln. soʻmdan oylik olishadi.

Kuyuk koʻpir ovulida yashovchi Pariza Oʻrozboyeva koʻp yillardan beri har yili koʻklamda ipak qurti parvarishlab, rejadagidan ziyod hosil yetishtirib keladi. Bu yilgi  mavsumda u 19 gramm ipak qurtini sifatli parvarish qilmoqda. Bu yil 56 kilogramm aʼlo sifatli pilla yetishtirishni koʻzlayotgan Pariza mavsum boshida 240 000 soʻm boʻnak puli oldi. Topshirgan hosili miqdoriga qarab, hali yana yaxshigina daromad olishni koʻzlamoqda. Chunki qaramogʻidagi ipak qurtlari yaxshi rivojlanayapti.
Kuyuk koʻpir ovuli boʻyicha jami 20 xonadonda 19 quti ipak qurti parvarish qilinmoqda. Reja esa yuksak, har bir quti ipak qurtidan 56 kilogrammdan  qimmatbaho xom ashyo yetishtirilishi lozim.

Ovuldagi ipak qurtlari parvarishlanayotgan xonadonlarni koʻzdan kechirsangiz – bir tekis, sogʻlom rivojlanayotgan ipak qurtlarini koʻrib, koʻngilingizda bu marra ortigʻi bilan ado etilishiga ishonch uygʻonadi.

Bu yilgi mavsumda tumanimiz boʻyicha 3768 quti ipak qurti parvarish qilinayapti. 208 tonna pilla yetishtirish rejalashtirilgan. Ipak  qurtlarini toʻyimli ozuqa bilan taʼminlash uchun har yili tut plantatsiyalari kengaytirilib, yangi tutzorlar barpo etilayapti va yaxshi rivojlanishi uchun agrotexnika qoidalariga muvofiq parvarish qilinayapti.

Pillachilik serdaromad soha. Qishloq xoʻjaligining boshqa tarmoqlari kabi bu sohada ham ishning sirini puxta biladigan mirishkorlar koʻp. Tarmoqda amalga oshirilgan islohotlar tufayli pillakorlar xalqimiz farovonligi yoʻlida mehnat qilayotgan qishloq xoʻjaligi xodimlari qatoridan munosib oʻrin olishmoqda. Ayniqsa, keyingi yillarda eʼtibor tobora kuchaytirilib, pillakorlarning moddiy manfaatdorligi oshirilmoqda. Bu esa vaqtincha ishsiz fuqarolarning oilasi bagʻrida boʻlib, daromad topishiga imkoniyat yaratmoqda.

Oygul RAJABOVA.