“УСТОЗ-ШОГИPД” АНЪАНАСИ БЎЙИЧА ТУМАН ЁШЛАPИ ҲУНАP ЎPГАНИШМОҚДА

Халқимизнинг бой маданий мероси ва тарихий анъаналарини тўлиқ сақлаб қолиш ва ривожлантириш, миллий ҳунармандчилик, халқ бадиий ва амалий санъатини юксалтиришга алоҳида эътибор қаратилаётганлиги ўзининг ижобий самараларини бермоқда. Соҳага аҳоли, айниқса, ёшлар, аёлларни жалб этиш орқали  бандлиги таъминланиб, “Устоз-шогирд” анъанаси тобора оммалашмоқда. Ҳунармандчилик фаолияти билан шуғулланиш истагидаги ишсиз фуқароларга тижорат банкларидан имтиёзли кредитлар ажратилиб, уларнинг лойиҳалари қўллаб-қувватланаяпти.

Ҳунармандчиликнинг бир тури кулолчилик  ҳам кишидан ўзига хос иқтидор ва сабр-тоқат талаб этади. Бу ҳунар неча минг йиллардан бери авлоддан авлодга ўтиб, тобора сайқал топиб бормоқда. Мамлакатимизда, айниқса, Pиштон кулолчилик мактаби тажрибаси жуда машҳур.

Қорақалпоғистонда ҳам мазкур мактаб тажрибасини кенг тарғиб қилиш, соҳага қизиқувчиларга уларнинг тажрибасини ўргатиш ва иш билан бандлигига эришиш борасида саъй-ҳаракатлар бошлаб юборилди.

Ҳар биримиз учун энг тотли ва бебаҳо неъмат – ноннинг хуштаъм ва яхши пишган ҳолда дастурхонга тортиқ қилиниши тандирларнинг ихчам, қулай, тежамли қилиб қурилганлигига ҳам боғлиқ.

Шу йил 13 май куни Нукус шаҳридаги ёшлар марказида бўлиб ўтган риштонлик кулолчи уста Ғанижон Элибоев иштирокидаги давра суҳбатида ҳам бу ҳақда батафсил сўз  юритилди. Кулолчилик анъаналарини сақлаб қолиш, Pиштон кулолчилик мактаби тажрибаларини қорақалпоғистонлик ёшларга ўргатиш мақсадида ташриф буюрган Ғанижон Элибоев, ҳунармандлардан ташқари давра суҳбатида “Ўзсаноатқурилишбанк” вакили Pавшан Обоқулов, Pеспублика “Ҳунарманд” уюшмаси Қорақалпоғистон Pеспубликаси бошқармаси бошлиғи Дилфуза Алламбергановалар ҳам иштирок этдилар. Тадбирда кулоллар ўзаро тажриба алмашдилар, шу йўналишда фаолият юритишни хоҳловчилар рўйхати шакллантирилиб уларга ўз фаолиятларини ташкил этиш бўйича тегишли маслаҳатлар берилди.

Бу борада туманимизда ҳам маҳорат дарслари бўлиб ўтди. Ғанижон Элибоев Манғит шаҳрининг  Чордара маҳалласида истиқомат қилувчи тандирчи тадбиркор Озодбой Бойжонов хонадонида бўлиб, у ясаган тандирларни кўрди, ўз тажрибалари билан ўртоқлашди.

2013 йилдан бери туманимиздаги 21-сонли Болалар мусиқа ва санъат мактабида амалий санъат йўналишида ўқувчи-ёшларга зардўзлик, каштачилик сир-асрорларини ўргатиб келаётган Хонимжон Исмоилова ҳам шу кунгача 20 нафардан зиёд шогирдларини ҳунарли қилди. 2019 йилда Президент соврини учун ўтказилган “Ташаббус 2019” кўрик-танловида ўз маҳсулотлари билан иштирок этиб, “Энг яхши ҳунарманд” номинациясида 3-ўринни эгаллади.

У ишсиз ёшларга ўргатиш мақсадида гиламдўзлик, зардўзлик, каштачилик бўйича  бепул ўқув курслари ташкил этиб, ўз ҳунарларини ўргатмоқда.

Хонимжон Исмоилова тўқиётган гиламларни кўрсангиз, худди санъат асарига ўхшайди. Нақшлар ва ранглар асло бир-бирини такрорламайди. Ҳунарманд аёл ўз устида ишлашдан, изланишдан эринмайди, интернет тармоқларида бу борадаги янгиликларни тинмай ўқиб, маҳоратини ошира боради. Гиламдаги нақшларнинг бир-бирига уйғунлиги, рангларнинг мутаносиблиги ана шундай изланишлар самараси.

У аёл-қизларнинг ҳунарли бўлиши ва интилиб ишлаши оилалар даромади ошиб, фаровонлашувига муносиб ҳисса бўлиб қўшилади, деб ҳисоблайди. Ҳунарига қизиқиб келган ёшларни ҳаракатчан бўлишга, ўз ҳаётларини ўзлари гўзал қилишга тарғиб этади.
Ҳунарманд аёл Хонимжон Исмоилова Ўзбекистон Миллий тикланиш демократик партияси аъзоси сифатида партиянинг “Хизмат – беминнат” лойиҳаси доирасида ишсиз ёшларга ҳунар ўргатиб, даромад топишларига эришаётганидан хурсанд.

Ойгул PАЖАБОВА.