Ҳар бир фарзанд учун бир кўчат
Ўзбекистон Республикаси Вазирлар Маҳкамасининг 2014 йил 6 мартдаги фармойишига биноан жорий йилнинг март-апрель ойлари мамлакатимизда ободонлаштириш ва кўкаламзорлаштириш ойлиги деб эълон қилинди.
Шу муносабат билан туманимиз маҳаллаларида кенг кўламдаги ободонлаштириш ва кўкаламзорлаштириш юмушлари жадал олиб борилаяпти.
Бундай тадбирларда теварак-атрофни саранжом-саришталаш, дарахтларга шакл бериш билан бирга, ҳудудларга манзарали ва мевали дарахт кўчатлари экишга алоҳида эътибор қаратиляпти. Зеро, қуёш ҳамал буржига очган паллада ўтказилган ҳар бир туп кўчат бехато униб чиқса, ерга сепилган уруғ тезда илдиз отиб, палак ёзади. Халқимиз "Ҳамал кирди, амал кирди”, дея бежиз айтмайди-да.
Кўчат экиб, боғ яратиш - халқимизга хос эзгу фазилатлардан бири. Миллий удумлармизга кўра, оилада ўғил бола туғилса, унга атаб ниҳол экилган. Фарзанд вояга етгунча, ёш ниҳоллар улкан дарахтларга айланган-ки, уй қуриш чоғида ёғоч муаммоси бўлмаган. "Соғлом бола йили”да ушбу эзгу анъана янада кенг кўлам касб этиб, янгича маъно-мазмун билан бойиди, десак, айни ҳақиқатни айтган бўламиз.
Гап шундаки, «Ҳар бир фарзанд учун бир кўчат» шиори остида туманимизнинг барча ҳудудларида янги боғ ва гулзорлар барпо этилмоқда. Бу хайрли тадбирни уюшқоқлик билан ташкил этиш мақсадида ҳамма ўзининг муносиб ҳиссасини қўшишга интилаётгани қувонарли холдир. Шу боис аҳоли турар жойлари, маҳаллалар, кўчаларнинг чети ва хиёбонларга оиладаги ҳар бир фарзанд учун бир туп мевали ва бир туп манзарали кўчат ва қаламчалар экилмоқда.
Аслида ниҳол қадаш ободликнинг энг муҳим белгиларидан бири саналади. Зотан, дов-дарахт бор жойда гўзаллик, мусаффо ҳаво, ризқ-насиба бор. Шу боис ота-боболаримиз кафтдек ерга ҳам дарахт етиштириш пайидан бўлишган. Бу эзгу қадрият истиқлол йилларида қайта тикланиб, янгича маъно-мазмун билан бойиди. Бунинг исботини ҳар кўкламда янги боғларга асос солинаётгани, шаҳримиз қишлоқларимиз яшилликка бурканиб бораётгани мисолида кўриб-билиб турибмиз.
"Маҳалла” хайрия жамоат фонди туман бўлинмаси ҳам «Ҳар бир фарзанд учун бир кўчат» шиори остида ўтказилаётган ободонлаштириш ва кўкаламзорлаштириш ишларига ўз ҳиссасини қўшиш ва кам таъминланган ёш оилаларни қўллаб-қувватлаш мақсадида туманимиз маҳаллаларидаги 150дан ортиқ ёш оилаларга 600 тупдан ортиқ мевали, 150 тупдан ортиқ гул кўчатлари булардан ташқари "Намунали кўча”ларга 1000 тупдан ортиқ манзарали кўчатлари фонд томонидан тарқатиб берилди.
Зеро, бугун қадалаётган ниҳоллар, ҳадемай, бўй кўрсатиб, юртимизни боғларга буркаши шубҳасиз. Уларга боққан кишининг бахри-дили очилиб, кўнгли осмон қадар юксалиши турган гап, бу ажиб боғлар яхшиларнинг меҳнати билан яралиб, уларнинг меҳридан яшнамоқда.
Гавҳар Чимбайчиева,
«Маҳалла» хайрия жамоат фонди туман бўлинмаси бош мутахассиси.
(Фото - turkistonpress.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
