Har bir farzand uchun bir koʻchat

Oʻzbekiston Respublikasi Vazirlar Mahkamasining 2014 yil 6-martdagi farmoyishiga binoan joriy yilning mart-aprel oylari mamlakatimizda obodonlashtirish va koʻkalamzorlashtirish oyligi deb eʼlon qilindi.

Shu munosabat bilan tumanimiz mahallalarida keng koʻlamdagi obodonlashtirish va koʻkalamzorlashtirish yumushlari jadal olib borilayapti.

Bunday tadbirlarda tevarak-atrofni saranjom-sarishtalash, daraxtlarga shakl berish bilan birga, hududlarga manzarali va mevali daraxt koʻchatlari ekishga alohida eʼtibor qaratilyapti. Zero, quyosh hamal burjiga ochgan pallada oʻtkazilgan har bir tup koʻchat bexato unib chiqsa, yerga sepilgan urugʻ tezda ildiz otib, palak yozadi. Xalqimiz "Hamal kirdi, amal kirdi”, deya bejiz aytmaydi-da.

Koʻchat ekib, bogʻ yaratish - xalqimizga xos ezgu fazilatlardan biri. Milliy udumlarmizga koʻra, oilada oʻgʻil bola tugʻilsa, unga atab nihol ekilgan. Farzand voyaga yetguncha, yosh nihollar ulkan daraxtlarga aylangan-ki, uy qurish chogʻida yogʻoch muammosi boʻlmagan. "Sogʻlom bola yili”da ushbu ezgu anʼana yanada keng koʻlam kasb etib, yangicha maʼno-mazmun bilan boyidi, desak, ayni haqiqatni aytgan boʻlamiz.

Gap shundaki, «Har bir farzand uchun bir koʻchat» shiori ostida tumanimizning barcha hududlarida yangi bogʻ va gulzorlar barpo etilmoqda. Bu xayrli tadbirni uyushqoqlik bilan tashkil etish maqsadida hamma oʻzining munosib hissasini qoʻshishga intilayotgani quvonarli xoldir. Shu bois aholi turar joylari, mahallalar, koʻchalarning cheti va xiyobonlarga oiladagi har bir farzand uchun bir tup mevali va bir tup manzarali koʻchat va qalamchalar ekilmoqda.

Aslida nihol qadash obodlikning eng muhim belgilaridan biri sanaladi. Zotan, dov-daraxt bor joyda goʻzallik, musaffo havo, rizq-nasiba bor. Shu bois ota-bobolarimiz kaftdek yerga ham daraxt yetishtirish payidan boʻlishgan. Bu ezgu qadriyat istiqlol yillarida qayta tiklanib, yangicha maʼno-mazmun bilan boyidi. Buning isbotini har koʻklamda yangi bogʻlarga asos solinayotgani, shahrimiz qishloqlarimiz yashillikka burkanib borayotgani misolida koʻrib-bilib turibmiz.

"Mahalla” xayriya jamoat fondi tuman boʻlinmasi ham «Har bir farzand uchun bir koʻchat» shiori ostida oʻtkazilayotgan obodonlashtirish va koʻkalamzorlashtirish ishlariga oʻz hissasini qoʻshish va kam taʼminlangan yosh oilalarni qoʻllab-quvvatlash maqsadida tumanimiz mahallalaridagi 150dan ortiq yosh oilalarga 600 tupdan ortiq mevali, 150 tupdan ortiq gul koʻchatlari bulardan tashqari "Namunali koʻcha”larga 1000 tupdan ortiq manzarali koʻchatlari fond tomonidan tarqatib berildi.

Zero, bugun qadalayotgan nihollar, hademay, boʻy koʻrsatib, yurtimizni bogʻlarga burkashi shubhasiz. Ularga boqqan kishining baxri-dili ochilib, koʻngli osmon qadar yuksalishi turgan gap, bu ajib bogʻlar yaxshilarning mehnati bilan yaralib, ularning mehridan yashnamoqda.

Gavhar Chimbaychiyeva,

«Mahalla» xayriya jamoat fondi tuman boʻlinmasi bosh mutaxassisi.

(Foto - turkistonpress.uz)