ЎҚУВЧИЛАРИМИЗ ИЛМДА ЮКСАК ЧЎҚҚИЛАР САРИ ИНТИЛМОҚДАЛАР

Муҳтарам Президентимиз Ш.Мирзиёев юртимиз таянчи ва келажаги  ёшлар эканлигини алоҳида таъкидлаб, ёшларимиз учун мисли кўрилмаган даражада имкониятлар эшигини очмоқда. Бу имкониятларни Юртбошимиз илгари сурган 5 ташаббус мисолида ҳам кўришимиз мумкин.

Беш ташаббуснинг асосий бўғини ҳам ёшларга қаратилганлиги бежиз эмас. 5 ташаббус доирасида юртимизда барча соҳаларда ўзгаришлар бисёр.

Шу қаторда бизнинг 48-сонли ўрта умумтаълим мактабимизда ҳам  кенг кўламли ишлар амалга оширилмоқда. Ўқувчиларимиз фан олимпиадалари, билимлар беллашуви ва спорт мусобақаларида яхши натижаларга эришмоқда. Хусусан, февраль ойида Ёшлар иттифоқи туман Кенгаши томонидан ўтказилган “Шахмат тахтаси” мусобақасида мактабимизнинг 7-синф ўқувчиси Асадбек Ўринбоев туман миқёсида фахрли иккинчи ўринни эгаллади. Фанлар олимпиадасида ҳам мактабимизнинг олти нафар ўқувчиси ҳудуд босқичида ғолиб бўлишиб, туман босқичида ҳам фахрли ўринларни эгалладилар.

“Маҳаллам – менинг тақдиримда” номли кўрик-танловда ҳам мактабимизнинг 11-синф ўқувчиси Машҳура Абдуллаева ва 10-синф ўқувчиси Диёрбек Маҳмудов туман босқичида ғолиб бўлди. Қорақалпоғистон Республикаси босқичида ҳам фаол қатнашиб қайтди. Бу натижаларга эришишда устозларнинг меҳнати катта, албатта. Шу билан бирга  ўқувчиларга кенгроқ имконият яратиш мақсадида мактабимизда алоҳида 9-11-синф ўқувчилари учун дарсдан ташқари бепул тўгараклар ҳам ташкил қилинган. Бундан мақсад ўқувчиларимизнинг олий ўқув юртларига ўқишга кириш даражасини ошириш ва бўш вақтини мазмунли ўтказишдир.

Биз таълим-тарбия соҳасидаги ишларимиз билан давлатимиз раҳбари амалга ошираётган хайрли ишларга ўз ҳиссамизни қўшаётганимиздан фахрланамиз. Ёшларимиз Президентимизнинг “Янги  Ўзбекистонни, албатта, ёшлар билан бирга қурамиз”, - деган сўзларига жавобан илм-ирфон чўққиларини эгаллаш сари далил интилмоқдалар. Чунки муҳтарам Президентимизнинг бу сўзлари ҳар бир ёш авлоднинг қалбидан жой олиб, олға қадам ташлашга ундайди.

Сардор РАЖАБОВ,
48-сонли мактаб ўқитувчиси.