Ўзбекистон “Миллий тикланиш” демократик партияси туман Кенгашининг пленуми бўлиб ўтди

Туман ҳокимлигининг кичик мажлислар залида Ўзбекистон “Миллий тикланиш” демократик партияси туман Кенгашининг навбатдаги II пленуми бўлиб ўтди. Пленумда ЎзМТДП туман Кенгаши ходимлари, ЎзМТДП Қорақалпоғистон Республикаси Кенгашининг етакчи мутахассиси - партия фракциясининг ижрочи котиби Мажит Мурзамбетов, Халқ депутатлари туман Кенгаши депутатлари, партия етакчилари, фаоллари ҳамда туман оммавий ахборот воситалари ходимлари иштирок этдилар.

Пленумни Халқ депутатлари туман Кенгаши депутати Баҳодир Болтабаев очди ва олиб борди.

Пленумда партиянинг туман Кенгаши ва партия депутатлик гуруҳининг 2019 йилдаги фаолияти якунлари ва 2020 йилдаги фаолиятининг асосий йўналишлари тўғрисидаги масалалар кўрилди.

Кун тартибидаги биринчи масала, 2019 йил 22 декабрдаги сайловлар натижалари таҳлили юзасидан партиянинг туман Кенгаши раиси Гулзода Эшимбетова сўзга чиқиб, ҳар қандай сиёсий партия сиёсий майдонга чиқар экан, халқ орасида ўз обрў-эътиборига ҳамда ўрнига эга бўлишга ҳаракат қилиши кераклиги, ўз ғоялари, Дастури, амалий ишлари билан жамият ва халққа фойда келтиришни ўз олдига мақсад қилиб қўйиши лозимлигига алоҳида тўхталди.

Партиянинг туман Кенгаши раиси таъкидлаганидек, ўтган сайловларда мазкур партия ўзининг барча имкониятларидан фойдаланган ҳолда муносиб қатнашишга ҳаракат қилди. Партия аъзолари орасидан халқ ичида обрў-эътиборга эга бўлган муносиб номзодлар танлаб олиниб, сайловолди тарғибот ишлари олиб борилди. Сайлов натижаларига кўра партиядан номзоди қўйилган Зумрад Бекатова 4-Амударё сайлов округидан Ўзбекистон Республикаси Олий Мажлис Қонунчилик Палатаси депутатлигига, Янгибой Ешмуродов 35-Қипчоқ сайлов округидан Қорақалпоғистон Республикаси Жўқорғи Кенгеси депутатлигига, Халқ депутатлари Амударё туман Кенгашига эса 6 нафар депутатлар сайланди.

Шунингдек, кун тартибидаги иккинчи масала 2019 йилнинг 12 ойи давомида Ўзбекистон “Миллий тикланиш” демократик партияси Халқ депутатлари туман Кенгашидаги депутатлик гуруҳи аъзоларининг олиб борган фаолияти юзасидан депутат Адилбой Юсуповнинг ҳисоботи ҳамда келгусидаги вазифаларни белгилаш бўйича депутатлик гуруҳи аъзоларининг таклифлари, фикр-мулоҳазалари тингланди.

Адилбой Юсуповнинг ҳисоботида таъкидланганидек, ЎзМТДП туман Кенгаши депутатлик гуруҳи аъзолари томонидан киритилган таклифлар асосида Халқ депутатлари туман Кенгаши сессиясига 2 та масала киритилди. Ўтган давр мобайнида Халқ депутатлари туман Кенгаши депутатлари ўз сайловчилари билан ўтказган учрашувлари натижасида фукароларнинг мурожаатлари асосида ҳудудлардаги мавжуд муаммолар, жумладан, табиий газ, электр энергияси, тоза ичимлик суви, йўл қурилиши, аҳоли яшаш жойларини тозалаш ва ободонлаштириш, ишга жойлашиш, кредит олиш каби масалаларни ҳал қилишда амалий ёрдам бериш билан бир қаторда ҳукуматимиз томонидан жорий этилган қонунлар, қарорлар ва бошқа норматив-ҳуқуқий хужжатлар ижроси юзасидан ҳам самарали ишлар қилингани таъкидланди.

Қолаверса, депутатлар ЎзМТДП туман Кенгашининг “Ёшлар қаноти” томонидан ташкил этилган “Уйма-уй”, “Депутат билан юзма-юз” лойиҳалари доирасида аҳоли билан учрашиб, уларнинг муаммо ва мурожаатларига ечим топишда кўмакдош бўлаётганлари ҳам алоҳида этироф этилди.

Пленум давомида партиянинг 2020 йил учун мўлжалланган иш-режаси тасдиқланди ҳамда ЎзМТДП туман Кенгаши Ижроия Қўмитаси ва Кенгаш аъзолари таркибига ўзгартириш киритилди. Партиянинг “Хизмат-беминнат” лойиҳаси доирасида беминнат хизмат кўрсатган ўқитувчилар Азимбой Сапарбоев, Хушнуд Чаршамов, Нафосат Тиловбоева ҳамда партия фаолиятида самарали меҳнат қилган фаолларга фахрий ёрлиқлари ва эсдалик совғалари топширилди.
  Пленум сўнггида кун тартибидаги масалалар тўлиқ кўриб чиқилиб, тегишли қарорлар қабул қилинди.

Чарос Арслонова, туман ҳокимлигининг Ахборот хизмати.