НАВОИЙ ҚАЛБЛАРДА МАНГУ ЯШАЙДИ
Айни кунларда туманимиздаги ўқув муассасаларида ғазал мулкининг султони Алишер Навоий таваллудининг 579 йиллиги кенг нишонланмоқда. Бўлиб ўтаётган тадбирларда Навоий асарларининг умумжаҳон миқёсидаги аҳамияти, халқимиз маънавиятини юксалтириш борасидаги беқиёс катта ўрни ҳақида маънавий-маърифий маърузалар ўқилиб, суҳбатлар ташкил этилмоқда.
Мир Алишер Навоий бобомизнинг маънавиятга тўла ижодини ўрганиш ва тарғиб қилиш орқали ёшларни ватанпарварлик руҳида тарбиялаш мақсадида 38-сонли умумтаълим мактабида ҳам маънавий-маърифий тадбир ўтказилди.
“Навоий қалбларда мангу яшайди” деб номланган адабий-бадиий кечада ўқувчи-ёшлар ўзларининг Навоий асарларини нечоғлик билишларини амалда намоён этишди.
Улуғ бобокалонимиз Алишер Навоий ўзбек мумтоз адабиётининг тенгсиз намоёндаси сифатида юксак эҳтиромга сазовор бўлган инсон. Дарҳақиқат, ўзбек тили ва адабиётини Алишер Навоийсиз тасаввур қилиш қийин. Нафақат ўзбек адабиёти балки туркий халқлар адабиёти Алишер Навоий бобомизнинг ижоди билан бевосита боғлиқдир. Шеърият мулкининг султони ҳазрат Навоий тарихда номлари олтин ҳарфлар билан ёзиб қўйилган шоир ва олимлар сирасига кириб, у зотнинг ёзган асарлари ҳам дунё адабиётида шоҳ асарлар қаторидан ўрин олган. Ҳазратнинг пурмаъно шеър ва ғазалларида илоҳий ишқ, ҳалоллик, поклик, ростгўйлик, инсоний улуғ фазилатлар, инсонпарварлик, диёнатлилик, сахийлик, камтаринлик, мулойимлик ва ҳоказо инсоният учун қанча манфаатлар бўлса, барчаси асарларда ўз аксини топган.
Мактабнинг ўзбек тили ва адабиёт фани ўқитувчиси Муҳаррам Собирова мазкур адабий-бадиий кечада Алишер Навоий ҳақидаги маърузасида мана шу маълумотларни келтириб ўтди. Ўқувчилар ҳам ҳазрат Навоий ижодидан намуналар, яъни ғазаллар ва рубоийларни ифодали ёд айтиб бердилар. Навоий яратган “Хамса” асарининг дунё халқлари қалбида ҳамон ҳам ҳавас, ҳам ҳайрат уйғотаётгани, “Хазойин ул-маъоний”, “Муҳокамат ул-луғатайн”, “Маҳбуб ул-қулуб” каби асарлари, айниқса, “Ҳайрат ул-аброр” достонидаги фалсафий фикрлари ҳар бир инсон учун энг қимматли ҳаётий сабоқлар бериши ҳақида тўлқинланиб сўзладилар.
Кеча давомида бобокалонимиз яшаган давр руҳи акс эттирилган саҳна кўринишларини ҳам намойиш этишди. Саҳна кўринишлари ва кеча иштирокчилари томонидан ижро этилган ғазал ва рубоийлар барчага жуда манзур бўлди.
Бўлиб ўтган адабий-бадиий кеча ўқувчи-ёшлар қалбида улуғ мутафаккир асарларини янада пухта, мукаммал ўрганиш истагини ва буюк аждодимиз маънавий меросига чексиз меҳр уйғотди. Шу билан бирга миллат маънавиятининг порлоқ қуёши Мир Алишер Навоий ҳақида ўз билимларини янада бойитишди.
Муяссар ХАЛИЛЛАЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
