Амударё тумани ҳокими ёшлар билан иссиқхонага ташриф буюрди

Юртимизда ёшларнинг барча соҳаларда юқори марраларни егаллашлари учун кенг имкониятлар яратилмоқда. Ёшларга оид давлат сиёсати бугунги кунда янгича кўриниш касб етмоқда. Ёшлар масалалари, уларнинг муаммолари, қизиқишларини ўрганиш ҳамда яқиндан кўмак бериш устувор вазифага айланди. Ёшлар сиёсатига қонун ҳужжатларли билан ҳуқуқий жиҳатдан мустаҳкамлаб борилмоқда. Хусусан, мамлакатимизда ўтган уч йил давомида ёшларга оид давлат сиёсатининг ҳуқуқий асосларини мустаҳкамлаш бўйича 43 та қонун ва бошқа меъёрий ҳужжатлар қабул қилинди. 70 га яқин норматив-ҳуқуқий ҳужжатга ўзгартириш ва қўшимчалар киритилди.

Ушбу йўналишдаги ваколатли идоралар фаолиятини мувофиқлаштириш мақсадида Ёшлар масалалари бўйича республика идоралараро кенгаши тузилди. Ўзбекистонда 30 июнь – Ёшлар куни деб эълон қилинди.

Туманимизда ҳам ёшлар масалаларига алоҳида эътибор қаратилмоқда. Эртамиз эгалари билан яқиндан алоқа ўрнатиш, уларнинг таклифлари, қизиқишларини, муаммоларини ўрганиш ҳамда ҳал қилиш мақсадида жойларда ёшлар билан учрашувлар ташкил қилинмоқда. Хусусан, 6 февраль куни туман ҳокими Султонбой Йўлдашев туманимиздаги барча соҳаларда фаолият юритаётган ёшлар билан учрашувлар ўтказди.

Дастлаб туман ҳокими Амударё қишлоқ хўжалик касб-ҳунар коллежининг бир гуруҳ ўқувчилари билан биргаликда Тошёп овули ҳудудида жойлашган “Манғит инвест плюс” МЧЖга қарашли иссиқхонага ташриф буюрди.

Шу ўринда маълумот тариқасида айтиш керакки, “Манғит инсвест плюс” МЧЖ 2018 йил октабрь ойида МЧЖ раҳбари Жалғас Боймуратовнинг ташаббуси билан ташкил қилинган. Жалғас Боймуратов Жаҳон тараққиёт-тикланиш банкидан кредит маблағи олиб, ўз тадбиркорлик фаолиятини йўлга қўйган. 1 га майдондаги иссиқхонада помидор етиштирилиб, аҳолини арзон ва сифатли маҳсулот билан таъминлаб келинмоқда.

Таъкидлаш керакки, “Манғит инвест плюс” МЧЖ ташкил қилиниши билан 16 та янги иш ўринлари яратилиб, ёшларимизнинг бандлигини таъминлашга ҳисса қўшди.

Учрашувда туман ҳокими бугунги кунда юртимизда қишлоқ хўжалиги соҳаларининг ривожланишига алоҳида эътибор қаратилаётганлиги ҳақида алоҳида тўхталиб ўтди.

Султонбой Йўлдашев ўз нутқида, мамлакатимизда қишлоқ ва сув хўжалигини ривожлантириш учун зарур иқтисодий ва ташкилий-ҳуқуқий асослар яратиш бўйича кенг кўламли ишлар олиб борилаётганлиги, таркибий ўзгаришларни амалга ошириш ва бозор муносабатлари механизмларини жорий қилишда фермер хўжаликлари учун қўшимча шарт-шароитлар яратишга алоҳида эътибор қаратилаётганлини эътироф этди.

Шунингдек, туман фермер, деҳқон хўжаликлари ва томорқа ер егалари Кенгаши раиси Илҳом Полвонов ўз соҳаси юзасидан йиғилганларга қизиқарли маълумотларни келтириб ўтди.

Илҳом Полвонов ўз сўзида туманда 32570 та томорқа ер эгаларида 5217 гектар экин ерлари мавжуд бўлиб, 2019 йилда тумандаги 49 та ОФЙ, МФЙларда аҳоли томорқаларида 1-1,5 сотихли 3,5 гектар ер майдонида 425 та ихчам иссиқхоналар ташкил қилинганлигини таъкидлади.

Учрашувда иштирок этган Aмударё тумани касб-ҳунар коллежи ўқувчи ёшларининг қалбида қишлоқ хўжалиги соҳаларига, айниқса, деҳқончилик соҳасига катта қизиқиш уйғонди.

Чарос Арслонова, туман ҳокимлигининг ахборот хизмати.