АДЛИЯ БЎЛИМИДА ОВУЛ ВА МАҲАЛЛАЛАР РАИСЛАРИ ИШТИРОКИДА ЙИҒИЛИШ ЎТКАЗИЛДИ
Туман Адлия бўлими томонидан халқимизнинг ҳуқуқий маданиятини юксалтириш, айниқса, Президент Фармон ва Қарорлари ҳамда ҳукумат Қарорларининг ижросини таъминлашда кенг жамоатчилик иштироки ва назоратини таъминлаш мақсадида ҳуқуқий-тарғибот тарзидаги ўқув-семинарлар, давра суҳбатлари, овул ва маҳаллалар раислари ҳамда мутахассислари иштирокида маънавий-маърифий ҳамда ҳуқуқий тадбирлар тез-тез ўтказилиб келинмоқда.
Туман ҳокимлиги биносида фуқароларнинг ўзини-ўзи бошқариш органлари фаолиятини мувофиқлаштириш бўйича туман Кенгашида овул ва маҳалла фуқаролар йиғинлари раислари иштирокида бўлиб ўтган йиғилишда ҳам Адлия бўлими мутахассислари томонидан янгидан қабул қилиниб, ҳаётга жорий этилган Президент Фармонлари ва Қарорларининг мазмун ва моҳияти юзасидан тушунчалар берилди.
Хусусан, Ўзбекистон Республикаси Президентининг 2019 йил 9 декабрдаги 4546-сонли “Бюрократик тўсиқларни янада қисқартириш ҳамда давлат органлари ва ташкилотлари фаолиятига замонавий бошқарув тамойилларини жорий қилиш чора-тадбирлари тўғрисида”ги Қарори ва ушбу Қарордан келиб чиқиб, ўзини ўзи бошқариш органлари раҳбарлари томонидан амалга ошириладиган энг муҳим вазифалар, бинобарин, халқимиз ҳаётига доир ижтимоий муаммоларга барҳам беришда жамоатчилик назоратини кучайтириш бўйича туман Адлия бўлими мутахассиси Жамшид Бекимбетов батафсил тўхталиб ўтди.
Шунингдек, Ўзбекистон Олий Мажлис палаталарининг қўшма Қарори билан тасдиқланган “Тўйлар, оилавий тантаналар, маърака ва маросимлар ўтказилишини тартибга солиш чора-тадбирлари тўғрисида”ги Низомнинг мазмун-моҳияти, халқимиз ҳаётидаги аҳамияти бўйича йиғилиш иштирокчиларига кенг тушунчалар берилди. Шу баробарида 2020 йилнинг 1 январидан эътиборан амалиётга жорий этилган мазкур қўшма Қарор билан тасдиқланган Низомда белгиланган талабларга овул ва маҳалла фуқаролар йиғинлари раислари, кўча бошчилари томонидан етарли аҳамият берилмаётганига эътибор қаратилди. Тўй-тантаналар, оилавий маросимларни ўтказишда ортиқча дабдабабозликка йўл қўйилаётгани, жойлардаги тўйхоналарга тўй эгалари томонидан 2 соатлик тўй тадбири учун тўланадиган нархлар асоссиз ошириб юборилаётгани, санъаткорларнинг аксарияти ҳамон кучли овоз кучайтиргич ускуналари, фонограмма асосида хизмат кўрсатаётганлари аниқ назоратга олиниши зарурлиги таъкидланди.
Йиғилиш якунида ҳар иккала муҳим ҳужжат юзасидан иштирокчилар ўзларини қизиқтирган саволлар билан мурожаат қилдилар. Барча саволларга туман Адлия бўлими мутахассиси Жамшид Бекимбетов атрофлича жавоб берди.
Р.ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
