Юртимизда Наврўз нафаси

Наврўз... Баҳор фаслининг энг улуғ ва энг нуфузли тантанаси,  мингйилликлар оша, асрлар оша яшаб келаётган миллий, анъанавий айём!

Бу байрам халқимизнинг юрагидан жой олган бўлиб, тўкин-сочинликдан, фаровонликдан дарак олиб келади. Донишманд боболаримизнинг, нуроний момоларимизнинг асрлар оша яшаб келаётган нақлларидан бири: "яхши одам кўзидан, янги йил Наврўзидан билинади”, дегани ҳам шундан.

Дарҳақиқат, бу йилги Наврўз юртимизга ҳар йилгидан ҳам ҳароратлироқ порлаб турган қўёши-ю, назм ва наво шукуҳи уфуриб турган миллий анъаналар таровати билан файзли. Ёшларимиз Наврўздай яшнаб-яшариб, яратиш ишқи билан яшамоқда. Мустақилликдан кейин давлатимизнинг ва Юртбошимизнинг ёшларга қаратаётган эътиборлари ва кўрсатаётган ғамхўрликлари туфайли юртимизда қанчадан-қанча коллеж ва академик лицейлар, мактаблар, спорт саройлари ҳамда мактабдан ташқари таълим муассасалари, шунингдек "Баркамол авлод” болалар марказлари қайта таъмирланиб ва такомиллаштирилиб, бу масканларда юксак маънавий ва миллий-тарбиявий руҳда фаолият юритилмоқда.

Туманимиздаги "Баркамол авлод” болалар марказида таҳсил олиб, касб-ҳунар ўрганаётган ёшларимиз бу йилги Наврўз байрамини ўзгача руҳда қутиб олмоқдалар. Айниқса, "Юмшоқ ўйинчоқлар”, "Ёш рассомлар”, "Бошланғич техник моделлаштириш” ҳамда "Ёш журналист ва нотиқ” тўгаракларининг аъзолари ўзларининг қўл меҳнатлари ила ишлаган ўйинчоқлари, қушлари, ҳаво шарлари ва ижодий шеърлари билан чиқсалар, "Фолкьлор” тўгараги аъзолари рақслари билан байрамга файз киритадилар.

Халқимиз азалдан янги йилнинг омадли ва саховатли бўлиши Наврўзнинг қандай келишига, унинг қандай кутиб олинишига боғлиқ, деб бежиз айтмайдилар. Фасллар келинчаги Баҳоройнинг юртимизга ҳароратли кириб келиши, ёшларимизнинг қалбига илиқлик, эзгулик, ижодий жўшқинлик бағишлади. Юртимизнинг ҳар бир гўшасида ана шундай тоза ва эзгу ниятлар билан Наврўзга пешвоз чиққан ҳамюртларимиз, фарзандларимиз байрам сайлларини давом эттирмоқда.

Зулфия ОЛЛАЁРОВА,

"Баркамол авлод” болалар маркази ходими.