“ЯХШИЛИКЛАР ОЛАМИ” – ЁШ ТОМОШАБИНЛАРГА МАНЗУР БЎЛМОҚДА

Қиличбой маданият маркази ходимлари аҳолининг маданий дам олишлари, бўш вақтларини кўнгилли ўтказишлари учун кўпгина тадбирлар ташкил қилишиб, томошабинлар эътиборига ҳавол этишаяпти. Марказда учта тўгарак – ашула, драма ва доира тўгараклари ташкил қилинган бўлиб, овулнинг санъатсевар ёшларини қамраб олган. Тўгаракларга Ўктам Бозорбоев, Мирсаид Қодиров ва Дониёрбек Бобожоновлар раҳбарлик қилишади.

Яқинда Мирсаид Қодиров яна бир эзгу ишга қўл урди. Иқтидорли ва санъатсевар ёшларни жамлаб, “Ёш томошабинлар театр жамоаси” ташкил этди ва улкан режалар билан ижодий ишларни бошлаб юборди.

Муҳтарам Юртбошимизнинг ёшлар маънавиятини юксалтириш ва бўш вақтларини мазмунли ташкил этиш борасида белгилаб берган бешта ташаббуси ижросини таъминлаш мақсадида жамоа тарбиявий аҳамиятга эга бўлган ўзбек халқ эртаклари асосида “Яхшиликлар олами” деб номланган томоша саҳналаштиришди.

Асосан кичкинтой болажонларга мўлжалланган томоша шу кунгача туманимизнинг 12 та мактабгача таълим ташкилотларида намойиш этилди ва томошабинларга жуда манзур бўлди.

Томошаларда болажонлар “Ёш томошабинлар театр жамоаси” аъзолари Қадамбой Матсафоев ижро этган ялмоғиз, Диёрбек Худойберганов ижросидаги масхарабоз, Оғабек Ўрозматов ижросидаги қароқчи, Дамир Шуҳратов ижросидаги қуёнча, Ўлмасбек Худойберганов ижросидаги арслон оброзлари орқали гавдалантирилган яхшиликнинг ёвузлик устидан ғалаба қозонишини, бунинг учун мардлик ва олижаноблик кераклигини чуқур англаб етдилар.

Томошанинг “Яхшиликлар олами” деб номланиши ҳам рамзий маънога эга.

Мактабгача таълим ташкилотларида намойиш этилган бу томошанинг илиқ кутиб олингани ижодкорларни янги-янги ижодий ишларга руҳлантирмоқда.

Қиличбой Маданият марказида яқинлашиб келаётган янги йил байрамига бағишлаб тайёрланаётган улкан мусиқали дастурда ҳам “Ёш томошабинлар театр жамоаси” чиқишлари жой олган. Илк меҳнати меваси - “Яхшиликлар олами” томошаси кичкинтойларгагина эмас, уларнинг ота-оналарига ҳам манзур бўлаётгани жамоа аъзоларини янги-янги ижодий ишларга руҳлантирмоқда.

Ойгул РАЖАБОВА.