Сайлов участкалари биноларида ёнғин хавфсизлигини таъминлаш бўйича чора-тадбирлар кўрилди
Туманимизда барча ҳудудлардаги сайлов участкалари мамлакатимиз сиёсий ҳаётида муҳим аҳамият касб этувчи сайлов кунига тайёр қилиб қўйилмоқда. Тайёргарлик жараёнида биноларнинг яроқлилиги, санитария ҳолати, ёнғин хавфсизлиги каби жиҳатларга ҳам алоҳида эътибор қаратилмоқда. Тегишли масъуллардан иборат бўлган ишчи гуруҳ томонидан сайлов участкаларида яратилган шарт-шароитлар ўрганилмоқда.
Шу қаторда сайлов участкалари жойлашган биноларда ёнғин хавфсизлигини таъминлаш, ўт чиқиши оқибатида содир бўлиши мумкин бўлган фавқулодда вазиятларнинг олдини олиш, бу борада белгиланган махсус чора-тадбирларни амалга ошириш мақсадида туман Ёнғин хавфсизлиги бўлими томонидан тарғибот-ташвиқот тадбирлари олиб борилди. Газ, электр таъминоти корхоналари ҳамда бошқа мутасадди ташкилотлар мутахассислари билан ҳамкорликда сайлов округи ва участкаларидаги ёнғин хавфсизлиги ҳолати кўздан кечирилди. Сайлов ўтадиган биноларда уларнинг ёритилиши, фуқароларнинг эркин ҳаракатланиши учун шароитларнинг яратилганлиги, видеокузатув ускуналари, қутқарув йўлаклари ва бирламчи ёнғин ўчириш воситалари билан тўлиқ таъминланганлиги текширилди.
Бўлим ходимлари биноларда ёнғин хавфсизлиги бўйича стандартлар, нормалар, қоидалар, йўриқномалар ва бошқа норматив ҳужжатлар талабларига риоя қилинганлигини кўриб чиқишди. Шунингдек, носоз электр асбоб-ускуналардан, иситиш жиҳозларидан фойдаланмаслик, газ ускуналарини ишлатганда ёнғин хавфсизлиги қоидаларига қатъий риоя қилиш, салбий оқибатларга олиб келувчи нохуш ҳодисаларнинг олдини олиш кераклигини ҳаётий мисоллар билан тушунтиришди.
Сайлов ўтказиладиган биноларда амалга оширилган профилактик тадбирлар давомида электр ва газ тармоқларида аниқланган камчиликлар бартараф этилди. Ёнғин келиб чиқишининг олдини олиш бўйича хавфсизлик қоидаларини тарғиб қилувчи ёнғинга қарши бурчак, кўргазма ва йўриқномалар ташкил қилинди.
Ёнғин хавфсизлиги бўлими томонидан ташкил этилган профилактик тадбирлар сайлов округ ва участкаларига яқин ҳудуддаги аҳоли яшаш жойларида ҳам ўтказилди. Тадбирлар давомида хонадонлардаги газ ва электр ускуналар, жиҳозлар, иситиш печлари, мўриконларнинг ҳолати кўздан кечирилди. Хонадон эгаларига ёнғин хавфсизлиги қоидаларига мунтазам амал қилиш лозимлиги, носоз электр ва газ асбобларидан фойдаланиш нохуш ҳодисалар келтириб чиқариши, уларни соз ҳолатда ишлатиш, доим эътиборли бўлиш кераклиги яна бир бор эслатилди. Ундан ташқари, фуқароларга уйларидаги электр тизимини ўзлари билганча хавфсизлик қоидаларига риоя қилмай таъмирлашлари, газ плитасининг ёқилган ҳолда ташлаб кетилиши хатарлилиги тушунтирилди ва бепарволик ис газидан заҳарланишга олиб келиши айтилиб, огоҳлантирилди.
Ёнғин нафақат бинолар ва уй жиҳозларини яроқсиз ҳолатга келтиради, балки инсонлар ҳаёти, саломатлигига ҳам таҳдид солади. Ёнғин хавфсизлиги бўлими ходимлари бу каби ҳолатларнинг олдини олиш мақсадида профилактик тадбирлар давомида сайлов участкалардаги масъулларни, маҳалла фаоллари ва барча хонадон эгаларини огоҳликка чақирдилар. Чунки, содир бўлган ёнғин ҳодисасини бартараф этишдан кўра, унинг олдини олиш осон.
Ҳамро Матякубов, туман Ёнғин хавфсизлиги бўлими бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
