АЁЛ ҚАДРИ - МИЛЛАТ ҚАДРИДИР

Мана, она табиатимизга ўзгача зеб берувчи уйғониш, яшариш фасли - баҳор ҳукмронлиги бошланди. Ҳар биримизни баҳорий жўшқинлик, бунёдкорлик ишларига иштиёқ, меҳр-оқибат, ўзаро ҳамжиҳатлик каби эзгу амалларга чорлагувчи кўклам байрамлар фасли бўлганлиги билан ҳам қадрлидир.

Юртимизда 8 март - Халқаро хотин-қизлар куни ўзгача шукуҳ билан нишонланади. Бу дунё тамаддунига муносиб ҳисса қўшган, ақлу закоси ила дунё илм-фанига асос солган буюк бобокалонларимизнинг муносиб издошларини тарбиялаб, вояга етказаётган онахонларимизга, ҳар жабҳада ўз қобилият ва интеллектуал салоҳиятларини ишга сафарбар этаётган аёлларга, илм, касб-ҳунар сирларини қунт билан эгаллаётган қизларимизга ҳурмат-эҳтиром рамзидир.

Байрам муносабати билан ўқув муассасаларида, меҳнат жамоаларида ўтказилаётган тадбирларда ҳам жамиятимизда хотин-қизларнинг тутган ўрнига юксак баҳо берилмоқда, онахонларимиз, дилбар қизларимиз шаънига энг эзгу тилаклар айтилмоқда.

Яратганнинг буюк мўъжизаси саналмиш аёл – бутун умримизга мазмун бахш этувчи, ҳаёт йўлимизни ёритувчи чироқдир. Аёл – эзгулик, меҳр-муҳаббат, садоқат тимсолидир. Бу таърифни адо қилиб бўлмайди.

Одамзот онгли ҳаёт бошлаган кундан бери инсоният аёл зотини севиб, ардоқлаб келади. Аёлни эъзозлаш, унга эҳтиром кўрсатиш ўзбек халқига хос олижаноб фазилатлардан биридир.

Мамлакатимизда истиқлол йилларида хотин-қизларни эъзозлаш, уларнинг жамиятдаги ролини ошириш давлат сиёсатининг устувор йўналишларидан бирига айланди. Юртимизда аёлларнинг жамиятдаги ўрни ва ролига юқори баҳо берилиб, уларнинг ҳуқуқ ва манфаатларини ҳимоя қилиш, хотин-қизларимизнинг билимдон, замонавий мутахассис, малакали касб эгалари бўлишлари ҳамда соғлом ва мустаҳкам оила қуришлари учун зарур шарт-шароитлар яратиш, биринчи навбатда, соғлом бола туғилиши ва уни тарбиялаш, оналар ва болалар соғлигини муҳофаза қилиш давлатимиз ва жамиятимизнинг доимий эътиборида бўлиб келмоқда.

Мамлакатимизда аёлларни ҳимоялашга қаратилган 80 га яқин миллий ва халқаро ҳужжатларнинг қабул қилинганлиги, муҳтарам Юртбошимиз томонидан "Соғлом бола йили” Давлат Дастурида ҳам соғлом бола тарбиясида оиланинг ва аёлнинг ўрнини янада ошириш бўйича устувор вазифалар белгилангани, мамлакатимизда фуқаролик жамиятини шакллантириш ва оилани мустаҳкамлашда хотин-қизларнинг ролини кучайтириш, уларнинг давлат ва жамият қурилишидаги кенг иштирокини таъминлаш бўйича 2013-2014 йилларга мўлжалланган Ҳаракат Дастурининг қабул қилинганлиги фикримизнинг далилидир.

Мана шундай юксак эътибор боис бугунги кунда юртимиз аёллари оилада уй бекаси, меҳрибон она, фарзанд тарбиячиси, жамиятда эса ўз ўрнига эга тўлақонли шахс, малакали мутахассис сифатида фаол иштирок этмоқдалар.

Бугунги кунда туманимиз аҳолисининг 88,3 минг нафарини хотин-қизлар, шулардан 28659 нафарини 16 ёшгача бўлган қизлар ташкил этади. 16 ёшдан 55 ёшгача бўлган аёллар 51503 нафар бўлиб, шулардан туманимиздаги ўрта махсус, касб-ҳунар таълими муассасаларида 4091 нафар қизлар таълим олмоқда.

Халқ таълими тизимида эса 2967 нафар аёллар самарали меҳнат қилишмоқда. Шунингдек, ўрта махсус касб-ҳунар таълими муассасаларида, соғликни сақлаш, қишлоқ ҳўжалиги, саноат, банк-молия ва шу каби турли соҳаларда ҳам туманимиз аёллари самарали меҳнат қилмоқдалар. Туманимизда тадбиркор аёллар ҳам кўпчиликни ташкил этади. Айниқса хотин-қизлар тадбиркорлигини йўлга қўйишда тижорат банклари томонидан берилаётган кредитлар натижасида кўпгина хотин-қизларнинг бандлиги таъминланаётганлигини алоҳида атаб ўтсак арзийди. Ўтган йилда 250 дан зиёд хотин-қизлар банк кредитлари ҳисобига ўз тадбиркорлигини йўлга қўйишди. Бунда касб-ҳунар коллежи битирувчи қизларига берилаётган имтиёзли кредитлар алоҳида аҳамият касб этди.

Ўтган 2013 "Обод турмуш йили”да ҳам туманимиз хотин-қизлари жамият ривожида ўзларининг фаолликларини намоён этдилар. Жумладан, мустақиллигимизнинг 22 йиллиги байрами муносабати билан туманимизнинг турли соҳаларида фидойи меҳнат қилаётган 5 нафар аёл-қизлар Ўзбекистон Хотин-қизлар қўмитасининг "Фахрий ёрлиғи” билан тақдирландилар. Ушбу байрам арафасида ўтказилган "Аёллар спорт фестивали”нинг Қорақалпоғистон Республикаси босқичида туманимиз жамоаси спортнинг волейбол туридан 2-ўринни эгаллашди, гимнастрада туридан эса рағбатлантирувчи совғага эга бўлишди. 2013 йилда ўтказилган "Энг намунали Хотин-қизлар қўмитаси бошланғич ташкилоти раиси” кўрик-танловининг Қорақалпоғистон Республикаси босқичида 1-ўринни эгаллаган туман маданият ва спорт ишлари бўлимининг Хотин-қизлар қўмитаси бошланғич ташкилоти раиси Насиба Эшчанова танловнинг Ўзбекистон Республикаси босқичида фахрли 2-ўринни қўлга киритди.

"Ораста қизлар” кўрик-танловининг академик лицей ва касб-ҳунар коллежлари қизлари ўртасида Амударё маиший хизмат кўрсатиш касб-ҳунар коллежи ўқувчиси Нафосат Ражабова танловнинг Қорақалпоғистон Республикаси босқичида фахрли 1-ўринни эгаллаб, Ўзбекистон Республикаси босқичида фаол қатнашиб келди.

Мамлакатимизда 12 йиллик мажбурий, бепул таълим жорий этилган бўлиб, унда қизлар таълим-тарбиясига алоҳида аҳамият қаратилмоқда. Юртбошимиз Ўзбекистон Республикаси Конституцияси қабул қилинганлигининг 21 йиллигига бағишланган тантанали маросимда 2014 йилни "Соғлом бола йили” деб эълон қилишни таклиф қилар эканлар, соғлом боланинг дунёга келиши, бақувват бўлиб ўсиб-улғайиши учун ўта муҳим, ҳал қилувчи мезонларга, жумладан фарзанд тарбиясида оиланинг ўрни, биринчи навбатда онанинг ролига, онанинг соғлигига, аёлни қадрлаш, оғир ишлардан халос этиш, турли касалликлардан ҳимоя қилиш, айниқса қиз болалар тарбиясига, уларнинг замонавий билим ва касб-ҳунарларни эгаллашига ёрдам бериш, эрта никоҳларнинг олдини олиш, оилавий низоларни бартараф этиш каби долзарб вазифаларга тўхталиб ўтдилар. Бу ишлар бизнинг зиммамизга катта масъулият юклайди.

Фурсатдан фойдаланиб хотин-қизлар байрами билан барча нуроний онахонларимизни, опа-сингилларимизни, дилбар қизларимизни чин қалбимдан самимий табриклайман. Доимо баҳорий жўшқинлик, бахт-иқбол ёр бўлишини тилайман.

М.АҲМЕДОВА,

туман ҳокими ўринбосари, хотин-қизлар қўмитаси раиси.

(http://uza.uz)