ХАЛҚ ДЕПУТАТЛАРИ АМУДАРЁ ТУМАН КЕНГАШИНИНГ 75-СЕССИЯСИ ҲАҚИДА АХБОРОТ

2019 йил 23 ноябрь куни халқ депутатлари Амударё туман Кенгашининг 75-сессияси бўлиб ўтди.

Сессия мажлисида туман ҳокими ўринбосарлари, ҳокимлик масъул ходимлари, ҳуқуқ-тартибот органлари, бўлимлар, корхона-ташкилотлар раҳбарлари, фуқаролар йиғинлари раислари ҳамда оммавий ахборот воситалари вакиллари иштирок этдилар. Мажлисни туман ҳокими Султонбой Йўлдошев очиб берди ва олиб борди.

Сессияда туманни ижтимоий-иқтисодий ривожлантиришга доир 6 та масала муҳокама қилинди.

Хусусан, кун тартибидаги биринчи масала – Ўзбекистон Республикаси Президентининг “2017-2021 йилларда кўп хонадонли уй-жой фондини сақлаш ва ундан фойдаланиш тизимини янада такомиллаштириш чора-тадбирлари тўғрисида”ги қарори ижроси бўйича туманда амалга оширилаётган ишлар юзасидан туман уй-жой коммунал хизмат кўрсатиш бўлими бошлиғи Санжар Муратовнинг ҳисоботи тингланди.  

Таъкидланганидек, туманида жами 50 та кўп хонадонли уй-жойлар бўлиб, уларнинг 8 таси 2015-2018 йиллар оралиғида янгидан қурилган. Бундан ташқари, бугунги кунда 2 та 4 қаватли, 24 хонадонли уй-жойлар қурилиш ишлари олиб борилмоқда.

Туманда кўп хонадонли уй-жойларга хизмат кўрсатиш мақсадида 3 та – “Давумов”, “Манғит бино таъмир”, Амударё бино таъмир” хусусий уй-жой мулкдорлар ширкатлари ташкил қилинди. Бугунги кунда ширкатлар томонидан кўп хонадонли уй-жойлардаги мумаммоларни ўрганиш, уларни ҳал этиш чораларини кўриш, аҳолидан мажбурий бадал маблағларини йиғиш ишлари олиб борилмоқда ҳамда тижорат банкларнининг кредит маблағларини ўз вақтида ундириш ишлари амалга оширилиб келмоқда.

Қолаверса, 2020 йил учун мўлжалланган дастур асосида 7 та кўп хонадонли уй-жойларда таъмирлаш ишлари амалга оширилиши режалаштирилган.

Сессия мажлисидаги иккинчи масала – ҳуқуқбузарликларнинг олдини олиш ва уларнинг профилактикаси ҳолати тўғрисида туман ички ишлар бўлими бошлиғининг ёшлар масалалари бўйича ўринбосари – ҳуқуқбузарликлар профилактикаси бўлинмаси бошлиғи Азиз Қурбониязовнинг ҳисоботи тингланди.

Ҳисоботда таъкидланганидек, Амударё туманида жиноятчилик ва ҳуқуқбузарликларнинг олдини олиш бўйича амалга оширилган ишлар натижасида жорий йилнинг шу кунигача барча йўналишлар бўйича жиноятлар сони 22 тага камайган. Профилактика инспекторларнинг иш юритувидаги жиноят бўлиши мумкин бўлган 32 та иш бўйича тарафлар билан профилактик суҳбатлар ўтказилиб, жиноятнинг олдини олишга эришилган. Шунингдек, ҳуқуқбузарликлар учун жами 6 минг 438 та маъмурий баённомалар расмийлаштирилиб, белгиланган тартибда жарималар солинган.

Сессияда Ўзбекистон Республикаси Президентининг Фармони билан тасдиқланган давлат дастурининг ижтимоий йўналишларда белгиланган вазифалари ижросини таъминлаш юзасидан туманда амалга оширилган ишлар тўғрисидаги масала бўйича туман ҳокими ўринбосари Алишер Йўлдашев ҳисобот берди.

Таъкидланганидек, туманда аҳоли ижтимоий ҳолатини яхшилаш, саломатлигини тиклаш, бандлигини таъминлаш юзасидан қатор ишлар қилинмоқда. Хусусан, жорий йилда 5 та хусусий тиббиёт муассасалари ташкил қилиниб, ҳозирги кунда уларнинг сони 17 тага етди.

Шунингдек,  ҳисоботда хотин-қизларни ва оилаларни қўллаб-қувватлаш жамоат фонди орқали 6 нафар оғир ижтимоий вазиятга тушиб қолган ногиронлиги бўлган кам таъминланган, уй-жой шароитини яхшилашга муҳтож хотин-қизлар уй-жой билан таъминлангани таъкидланди.

Кун тартибидаги навбатдаги масала – Ўзбекистон Республикаси Президентининг “Сув ресурсларини бошқариш тизимини янада такомиллаштириш чора-тадбирлари тўғрисида” қарорига асосан туманда сув хўжалиги объектларининг техник ҳолатини яхшилаш, шунингдек сув тежовчи суғориш технологияларини жорий этиш ҳолати юзасидан туман ирригация бўлими бошлиғи Худаяр Қаландаров ҳисобот берди.

Таъкидланганидек, тумандаги сув хўжалиги объектларининг техник ҳолатини яхшилаш мақсадида хўжаликлараро ва ички хўжалик каналларини тозалаш, улардаги гидрогтехник иншоотларни, гидропостларни таъмирлаш бўйича чора-тадбирлар амалга оширилиб, туман бўйича жорий йилда амалда 64 км узунликдаги хўжаликлараро каналлар қазиб тозаланди. “Обод қишлоқ” дастури асосида хўжаликлараро “Бўзсув” каналининг 5 км қисмида давлат маблағлари ҳисобидан капитал реконструкция қилинди. 2020 йилда 150 гектар майдонда қишлоқ хўжалиги экинларини суғоришда сув тежовчи технлогияларини жорий қилиш режалаштирилди.

Ҳисоботда сув тежовчи технологияларнинг афзалликлари ва уни жорий қилишнинг иқтисодий асослари ҳақида батафсил маълумотлар берилди.

Сессия кун тартибидаги “Ер ажратиш, эгалик қилиш, фойдаланишга ва ижарага бериш масалаларини кўриб чиқувчи доимий комиссия қарорини кўриб чиқиш ҳақида”ги масала бўйича туман ҳокимининг қишлоқ ва сув хўжалиги масалалари бўйича ўринбосари Файзулла Садуллаев ахборот берди.

Ахборотда таъкидланганидек, жорий йил туманимизда 15 минг 250 гектар майдонга чигит экилиб, давлатимиз хирмонига режадаги 32 минг 250 тонна ўрнига,  36 минг 669 тонна пахта ҳом ашёси этказиб берилиб, бу борадаги шартномавий режа 113,7 фоизга бажарилди.

Қолаверса, туманимиз ғаллакорлари шартномавий режаларини республикамизда олдингилар қаторида ортиғи билан бажариб, давлатимиз хирмонига 9 минг 749 тоннадан ортиқ дон топширди.

Кун тартибидаги сўнгги масала жорий йилги сайловлар ҳақида бўлди. Депутатлар тумандаги округ ва участка сайлов комиссиялари аъзолигига янги номзодларни тавсия қилиш ҳақидаги қарорни бир овоздан маъқулладилар. Мазкур қарор Ўзбекистон Республикаси Олий Мажлиси Қонунчилик палатаси депутатлари сайловини ўтказувчи 1-Нукус ва 4-Амударё округ сайлов комиссияларига, Қорақалпоғистон Республикаси Марказий сайлов комиссиясига ҳамда туман сайлов комиссиясига юборилди.

Кун тартибидаги масалалар бўйича музокараларда депутатлар, тегишли доимий комиссиялар аъзолари, муассаса, корхона ва ташкилотлар раҳбарлари ва бошқа мутасаддилар сўзга чиқдилар. Билдирилган таклифлар, фикр ва мулоҳазалар инобатга олиниб, барча масалалар бўйича халқ депутатлари туман Кенгашининг тегишли қарорлари қабул қилинли. Шунинг билан сессия ўз ишини якунлади.

Чарос АРСЛОНОВА, туман ҳокимлиги ахборот хизмати раҳбари.