ҲАР БИР БЕМОР ЭЪТИБОРДА

Ўзбекистон Республикаси Президентининг 1998 йил 10 ноябрдаги 2107-сонли “Соғликни сақлаш тизимини ислоҳ қилиш тўғрисида”ги Фармони ижросини таъминлаш мақсадида туман марказий шифохонаси маъмурияти буйруғига кўра, 2000 йилда 15 та ўринга эга Шошилинч тиббий ёрдам бўлими ташкил қилинди. Айни кунга келиб бўлимда ўринлар сони 40 тага етказилди.

Бўлимда жами 20 нафар олий, 5 нафар 1 тоифали ва 6 нафар 2-тоифали шифокорлар халқ саломатлиги йўлида фидойилик билан меҳнат қилишмоқда.

Бўлим биносида 2013 йилда реконструкция ишлари, 2018 йилда эса жорий таъмирлаш ишлари бажарилган бўлиб, беморларга ўз вақтида ташхис қўйиш ва самарали даволаш учун барча шарт-шароитлар етарли. Бўлим эндоскоп, УЗИ, ЭКГ жиҳозлари билан таъминланган. Бўлим қошида замонавий рақамли рентген ускунаси билан жиҳозланган хона, барча зарур лаборатор анжомлар, реактивлар билан таъминланган экспресс лаборатория кеча-ю кундуз фаолият олиб боради. Иккинчи қаватда жарроҳлик бўлими жойлашган бўлиб, стерил материаллар сақлаш хоналари ва жарроҳлик зали бор. Шошилинч жарроҳлик амалиётлари ва барча турдаги жарроҳлик ишларини амалга ошириш учун зарур замонавий асбоб-анжомлар билан таъминлангани шифокорларимиз учун қулайлик яратмоқда.

Бўлимда шошилинч тиббий ёрдамга муҳтож беморларга ўз вақтида малакали ёрдам кўрсатиш учун етарлича шарт-шароитлар мавжуд бўлиб, 2018 йил давомида жами 6124 нафар, 2019 йилнинг 9 ойи давомида эса жами 4584 нафар бемор даволаниб, соғ-саломат оилалари бағрига қайтдилар.

Бўлим шифокорлари тун-у кун, ҳар қандай вазиятда халқ саломатлиги йўлида фидойилик билан хизмат қилиб, ўзларининг зиммаларидаги вазифаларини шараф билан уддалашмоқда. Бу ерга нажот истаб келган инсонларнинг қалбларида умид ва ишонч уйғотиб, оилалари бағрига соғ-саломат кузатиб қолиш ҳар бир шифокор учун энг олий мақсаддир.

Мен фурсатдан фойдаланиб, барча ҳамкасб дўстларимизни, устоз шифокорларни анъанавий касб байрамлари билан чин дилдан табриклайман.

О.ШОМУРОДОВ,

ТТБ Шошилинч тиббий ёрдам бўлими мудири.