ТЎЙ ЛИБОСИ – МАЪНАВИЯТИМИЗ ЗИЙНАТИ
Ўзбек халқи шарқ халқлари орасида ўзининг бой миллий урф-одатлари, анъаналари, асрлар оша ўз зийнатини, салобатини йўқотмай, бугунги кунгача етиб келган миллий маросимлари билан бошқа халқлардан ажралиб туради. Мана шундай миллий маросимларимиздан бири бу – тўй маросимидир. Ўзбек оилаларида бу маросим кенг шодиёна сифатида нишонланади. Мен бу ўринда, тўй маросими ҳақида эмас, балки мана шу маросимнинг сабабчилари бўлмиш, келин ва куёвнинг тўй куни киядиган тўй либослари ҳақида гапирмоқчиман.
Бугунги кунда, мамлакатимизга Европа маданияти кириб келиши билан келин-куёвларимизнинг киядиган тўй либослари ҳам тубдан ўзгариб кетди. Яъни, бир кунлик тўй учун фалон минг сўмлик келин кўйлаги, куёв учун дабдабали костюм-шим - буларнинг ҳаммаси пешона тери эвазига топган пулимизни ҳавога совуриш билан баробар. Айниқса, келинларимиз қимматбаҳо, башанг келин кўйлакларини кийиб, даврада ўзини маликалардек ҳис қилиб ўтиришни ёқтиришади. Тўғри, оппоқ тўй либосини кийиш ҳар бир қиз боланинг юрагидаги ягона орзу. Лекин қимматбаҳо келин кўйлаги-ю, қимматбаҳо соч турмаги ва бошқа зеб-зийнатлар кўпинча қиз боланинг ҳақиқий гўзаллигини яшириб қўяди. Зеро, бу нарсаларнинг барчаси бахт олиб кела олмайди. Ҳақиқий гўзаллик эса бу – қиз боланинг қалб гўзаллиги, одоби ва эплилиги ҳисобланади.
Юқорида айтиб ўтилган сохта гўзалликни биз пулга сотиб олмайлик, бунинг ўрнига бу пулларни фойдали ишларга, фойдали нарсаларга сарф қилайлик. Келин кўйлаги ўрнига эса ўзимизнинг миллий шойи-атлас, адрасларимизни кияйлик. Момоларимиз кийган бу матолар келин қизнинг ҳуснига-ҳусн, назокатига-назокат қўшиб туради.
Ўзбек қизини қадимдан момоларимиз ўн тўрт кунлик тўлин ойга қиёслашган. Биз, "ўн тўрт кунлик ой” номини оқлаб иш тутайлик. Юзимизни ювишимиз билан асар ҳам қолмайдиган юқоридаги каби сохта гўзалликни эмас, балки, бутун умр бизга зийнат бўла оладиган қалб гўзаллигини қалбимизга жо этайлик. Ана шундагина биз мустаҳкам оила ва обод турмушни бунёд эта оламиз.
Азиза МАДРАҲИМОВА,
Манғит иқтисодиёт касб-ҳунар коллежи талабаси.
(Фото - http://kelin-kuyov.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
