НАВОИЙ ВА БОБУР МАЪНАВИЙ МЕРОСИ – ҚАЛБЛАР ЗИЙНАТИ

Биринчи Президентимиз Ислом Каримов “Юксак маънавият – енгилмас куч” китобида таъкидлаганидек:  “маънавият – инсонни руҳан покланиш,  қалбан улғайишга чорлайдиган,  одамнинг ички дунёси,  иродасини бақувват,  иймон-эътиқодини бутун қиладиган,  виждонини уйғотадиган беқиёс куч,  унинг барча қарашларининг мезонидир”. Бу фазилат инсонда ўзини англаши, аждодлари меросини ўрганиши ва ўқиши билангина шаклланади.  

Шу кунларда мамлакатимизда улуғ мутафаккир аждодларимиз Алишер Навоийнинг 579 йиллиги ва Заҳириддин Муҳаммад Бобурнинг 537 йиллиги кенг нишонланаётганида ҳам ушбу фикр яна бир бор ўз исботини топмоқда.

Улуғ алломалар орамизда бир умр яшайдилар.  Қиёфалари тасаввурларда, дилларда,  номлари эса тилларда мангу қолади.  Атрофга қарасангиз боболаримиз номига ҳавас қилиб, уларга ўхшашини истаб қўйилган Алишер,  Бобур исмлик инсонлар беҳисоб.  Мамлакатимизда шаҳар-у  илм даргоҳлари,  кўчалар,  хиёбонлар,  театр,  метро бекатлари ҳам боболаримиз Мир Алишер Навоий ва Мирзо Бобур номи билан аталади. Буларнинг ҳаммаси улуғ шоир,  олим ва мутафаккир,  буюк давлат арбоби, улуғ ҳазрат – доноларнинг доноси Мир Алишер Навоий бобомиз ва ўзбек мумтоз адабиётининг йирик вакили,  буюк шоир,  тарихчи,  моҳир саркарда,  бобурийлар сулоласи асосчиси,  ўзининг сермазмун ижоди билан адабиётимиз хазинасига улкан ҳисса қўшган улуғ сиймо – Заҳириддин Муҳаммад Бобур бобомизнинг ҳурматлари учундир.  

Ҳар йили февраль – мактабларда адабиёт фан ойлиги деб белгиланади.  Адабиёт фани ойлиги доирасида айни кунларда буюк бобокалонларимиз Алишер Навоий ҳамда Заҳириддин Муҳаммад Бобур ижодий меросига бағишланган адабий кечалар,  маънавият соатлари,  маърифий тадбирлар ташкил этилмоқда.
Холимбег овулидаги 17-сонли умумий ўрта таълим мактабида ҳам “Алишер Навоий ва Заҳириддин Муҳаммад Бобур ғазалиёти мухлисиман” мавзусида адабий-мусиқий тадбир ташкил этилди.  Ўқувчилар Навоий ва Бобур ғазалларини ўқишди,  саҳна кўринишлари ижро этишди.  Айниқса, 9-синф ўқувчилари томонидан ижро этилган мақом йиғилганларда катта таассурот қолдирди.  Тадбир ҳақиқий зиё,  маърифат ва маънавият кечасига айланиб кетди.

Дарҳақиқат,  ўлмас истеъдод соҳиблари Алишер Навоий ва Заҳириддин Муҳаммад Бобурнинг бой адабий мероси орадан беш асрдан зиёд вақт ўтса ҳамки,  ҳамон халқимиз маънавий дунёсини бойитиб келмоқда.  Уларнинг бебаҳо асарлари ва порлоқ сиймоси халқимиз қалбида абадий яшайверади.

Инобат РАЖАБОВА, 17-сонли мактаб ўқитувчиси.