ОТАХОН ЖУPНАЛИСТДАН ЯНГИ ТУҲФА: “ШУНАҚА ДУНЁ БУ...”

Бир файласуф ҳаётни театр саҳнасига, турфа тақдирли одамларни эса театрда роль ижро этаётган актёрларга менгзаган эди. Шуниси ҳам борки, актёр фаолияти давомида неча ўнлаб образлар яратса, инсонлар ҳаёт саҳнасига бир мартагина чиқадилар ва уларнинг йўллари турличадир. Умрни мазмунли ва элга манфаатли қилиб яшаш – ҳар кимнинг ўз қўлида.

Саксон ёш остонасида, аниғи 77 ёшида ҳам жамият олдида хайрли ишлар қилишга ўзида мажбурият сезиб, туманимиз адабий муҳитида устозлик қилиб, ижодкорлар сафининг олдида келаётган Саъдулла ака Хўжаниёзовнинг янги тўпламини қўлимга олиб, кўнглимдан шундай хаёллар ўтди.

42 йил туман газетасида адабий ходим, масъул котиб, муҳаррир ўринбосари бўлиб ишлаб нафақага чиққан устоз журналист кексайдим, деб қўл қовуштириб ўтиришни ўзига эп кўрмади. Турли мавзуларда мақолалар, шеърлар ёзиш билан чекланмай, 2014 йилда “Тўрт томирда жўш урган туғён”, 2015 йилда “Ҳаёт ҳадялари”, 2017 йилда “Минг бир фард” шеърий тўпламларини нашрдан чиқарди, амударёлик ижодкорларни бирлаштириш, ижодини рағбатлантириш, ёш ижодкорларни аниқлаб, қўллаб-қувватлаш мақсадида “Тараққиёт кўзгуси” газетаси қошида ташкил этилган “Жайхун илҳомлари” нодавлат нотижорат ташкилотининг аъзоси сифатида фаол ҳаракат қилиб, тез-тез адабий кечалар, шеърият кечалари ўтказилишига бош бўлаётир, ёш қаламкашларга йўл-йўриқлар бераётир. 42 йиллик журналистик фаолияти чарчоғини писанд қилмай, яқинда яна бир эзгу ишнинг уддасидан чиқдилар. Турли йилларда, асосан, истиқлолдан аввалги йилларда ёзган ҳикояларини тўплаб, “Шунақа дунё бу...” номли китоб нашр эттирдилар. 18 та ҳикоядан иборат китобни мутолаа қилган киши инсон ички оламининг ранг-баранглиги, умр моҳияти ҳақида ўйга толади. Содда, ортиқча безакларсиз, равон тилда ёзилган ҳикояларнинг ҳар бири мутолаа жараёнида кўнглингизга ўрнашиб қолади, гоҳ севинасиз, гоҳ ачинасиз, гоҳ ўйга толасиз.

Яқин ўтмишимизнинг бир лаҳзаси акс эттирилган “Биканинг бувиси нега йиғлади”, ё муаллиф ўз болалик хотираларини акс эттирган “Икки тарсаки” ҳикоялари гўё ҳаётдан бизга сабоқ бераётгандай. “Мактуб эгаси ким?”, “Айтилмаган сўзлар” ҳикоялари ҳаётдаги салгина хатолар, оний лаҳзалар ҳам инсон ҳаётини ўзгартириб юборишга қодир эканлигини уқтиради, ҳушёр тортишга чорлайди.

Азиз устозимиз, Қорақалпоғистонда хизмат кўрсатган журналист, ҳамон қўлидан қалами тушмай, ижод қилаётган Саъдулла ака Хўжаниёзовни ўқувчиларига атаган навбатдаги туҳфаси билан қутлайман ва янада баракали ижод қилаверишини тилаб қоламан.

Ойгул PАЖАБОВА.