OTAXON JUPNALISTDAN YaNGI TUHFA: “ShUNAQA DUNYo BU...”

Bir faylasuf hayotni teatr sahnasiga, turfa taqdirli odamlarni esa teatrda rol ijro etayotgan aktyorlarga mengzagan edi. Shunisi ham borki, aktyor faoliyati davomida necha oʻnlab obrazlar yaratsa, insonlar hayot sahnasiga bir martagina chiqadilar va ularning yoʻllari turlichadir. Umrni mazmunli va elga manfaatli qilib yashash – har kimning oʻz qoʻlida.

Sakson yosh ostonasida, anigʻi 77 yoshida ham jamiyat oldida xayrli ishlar qilishga oʻzida majburiyat sezib, tumanimiz adabiy muhitida ustozlik qilib, ijodkorlar safining oldida kelayotgan Saʼdulla aka Xoʻjaniyozovning yangi toʻplamini qoʻlimga olib, koʻnglimdan shunday xayollar oʻtdi.

42-yil tuman gazetasida adabiy xodim, masʼul kotib, muharrir oʻrinbosari boʻlib ishlab nafaqaga chiqqan ustoz jurnalist keksaydim, deb qoʻl qovushtirib oʻtirishni oʻziga ep koʻrmadi. Turli mavzularda maqolalar, sheʼrlar yozish bilan cheklanmay, 2014-yilda “Toʻrt tomirda joʻsh urgan tugʻyon”, 2015-yilda “Hayot hadyalari”, 2017-yilda “Ming bir fard” sheʼriy toʻplamlarini nashrdan chiqardi, amudaryolik ijodkorlarni birlashtirish, ijodini ragʻbatlantirish, yosh ijodkorlarni aniqlab, qoʻllab-quvvatlash maqsadida “Taraqqiyot koʻzgusi” gazetasi qoshida tashkil etilgan “Jayxun ilhomlari” nodavlat notijorat tashkilotining aʼzosi sifatida faol harakat qilib, tez-tez adabiy kechalar, sheʼriyat kechalari oʻtkazilishiga bosh boʻlayotir, yosh qalamkashlarga yoʻl-yoʻriqlar berayotir. 42-yillik jurnalistik faoliyati charchogʻini pisand qilmay, yaqinda yana bir ezgu ishning uddasidan chiqdilar. Turli yillarda, asosan, istiqloldan avvalgi yillarda yozgan hikoyalarini toʻplab, “Shunaqa dunyo bu...” nomli kitob nashr ettirdilar. 18 ta hikoyadan iborat kitobni mutolaa qilgan kishi inson ichki olamining rang-barangligi, umr mohiyati haqida oʻyga toladi. Sodda, ortiqcha bezaklarsiz, ravon tilda yozilgan hikoyalarning har biri mutolaa jarayonida koʻnglingizga oʻrnashib qoladi, goh sevinasiz, goh achinasiz, goh oʻyga tolasiz.

Yaqin oʻtmishimizning bir lahzasi aks ettirilgan “Bikaning buvisi nega yigʻladi”, yo muallif oʻz bolalik xotiralarini aks ettirgan “Ikki tarsaki” hikoyalari goʻyo hayotdan bizga saboq berayotganday. “Maktub egasi kim?”, “Aytilmagan soʻzlar” hikoyalari hayotdagi salgina xatolar, oniy lahzalar ham inson hayotini oʻzgartirib yuborishga qodir ekanligini uqtiradi, hushyor tortishga chorlaydi.

Aziz ustozimiz, Qoraqalpogʻistonda xizmat koʻrsatgan jurnalist, hamon qoʻlidan qalami tushmay, ijod qilayotgan Saʼdulla aka Xoʻjaniyozovni oʻquvchilariga atagan navbatdagi tuhfasi bilan qutlayman va yanada barakali ijod qilaverishini tilab qolaman.

Oygul PAJABOVA.