2019 йилда ёшлар иттифоқи туман Кенгаши ёрдами билан 85 та лойиҳа амалга оширилади ва 505 та янги иш ўрни яратилади

Бугунги кунда Ўзбекистон ёшлар иттифоқи мамлакатимизда барча соҳаларда олиб борилаётган ислоҳотларнинг нафақат фидойи иштирокчиси ва ташаббускори, балки буюк келажак сари илҳомлантирувчи қудратли кучга айланди. Ўз сафларида 113 минг 461 нафар ёшларни бирлаштирган Ўзбекистон ёшлар иттифоқи Амударё туман Кенгаши томонидан амалга оширилаётган ишлар бунга яққол мисол бўлади. Бу ҳақда жорий йилнинг 29 январь санасида ЎзЁИ туман Кенгаши томонидан 2018 йилда амалга оширлган ишлар ва 2019 йил учун белгиланган янги режавий-тадбирлар муҳокамасига бағишланган ҳисобот йиғилишида сўз юритилди.

Йиғилишда Ўзбекистон ёшлар иттифоқи туман Кенгаши раиси М.Шерметов “2018 йил якунлари ва 2019 йилда амалга ошириладиган вазифалар тўғрисида” маъруза қилди.

Маърузада қайд этилишича, ёшлар иттифоқи туман Кенгаши томонидан Ижтимоий ҳимоя, фуқаролар мурожаатлари, иқтидорли ёшларни қўллаб-қувватлаш, ёшлар тадбиркорлигини ривожлантириш, ёш оилалар билан ишлашиш, ёшлар ўртасида жиноятчиликнинг олдини олиш, маънавий-маърифий йўналишлар бўйича кенг қамровли ишлар амалга оширилган. Хусусан, ижтимоий ҳимояга муҳтож, 4 нафар ёшларга ногиронлик аравачаси, 4 нафарига касаначилик фаолиятини йўлга қўйишлари учун тикув машиналари, 3 нафарига велосипед, 5 нафарига ўқув қуроллари жамланмаси берилиб, 10 та ёш оила хонадонларининг фасад қисми таъмирланди. 33 марта республикамизнинг тарихий шаҳар ва музейларига саёҳатлар уюштирилиб, 3 та ёш оилага кўп қаватли уйлардан 2 хонали квартиралар ажратилди.

Ёшлар томонидан туман Кенгашига келиб тушган 53 та мурожаат қаноатлантирилди.

Иқтидорли ёш мутахассисларни қўллаб-қувватлашга алоҳида эътибор қаратилди. 2018 йил давомида 5 нафар ёшлар етакчилари юқори лавозимларга тайинланди.

Ёшлар тадбиркорлигини ривожлантириш ва уларни қўллаб-қувватлаш йил давомида ёшлар иттифоқи туман Кенгашининг диққат марказида бўлди. Маҳаллий депутатлар, давлат ва жамоат ташкилотлари ходимлари, ҳуқуқни муҳофаза қилувчи органлар ходимларидан иборат 12 та кичик гуруҳ тузилиб, хонадонма-хонадон юриб ёшлар муаммолари ўрганилди. Ўрганишлар жараёнида аниқланган 13,8 мингта муаммоларни ҳал этиш бўйича ҳар бир маҳалла, туман (шаҳар) кесимида “Йўл хариталари” ишлаб чиқилди. Давлат Дастури доирасида “Ёшлар - келажагимиз” жамғармасининг туман филиали ташкил этилиб, 4 та иш ўрни яратилди. 2018 йилнинг иккинчи ярим йиллигида, “Ёшлар - келажагимиз” давлат Дастури доирасида 12 та бизнес-лойиҳа учун 2 млрд. 555 млн сўм миқдорида имтиёзли кредит маблағлари ажратилди ва 84 та қўшимча иш ўринлари яратилди. Бу каби ишлар 2019 йилда ҳам изчил давом эттирилиб, 85 та лойиҳа амалга оширилиши режалаштирилмоқда. Бу лойиҳалар учун 19 млрд. 383 млн. сўмлик маблағлар ажратилиб, 505 та янги иш ўринлари яратилиши кўзда тутилган.

Pеспублика ёшлар маркази туман бўлинмаси 2018 йилнинг 5 апрелида ташкил этилган бўлиб, бўлинмада 5 та тўгарак ўз фаолиятини олиб бормоқда. Pус, инглиз тилларини пухта ўргатиш, компьютер саводхонлиги, тикувчилик, ёшлар театр студиялари тўгаракларига 1112 нафардан ортиқ ёшлар қамраб олинган.

Ёш оилалар билан ишлашиш борасида етарли тажрибалар тўпланган. 2018 йил давомида оилалар мустаҳкамлиги, соғлом турмуш тарзи ва эрта никоҳнинг салбий оқибатлари, оилаларда ажрашишларнинг олдини олиш мавзуларида мунтазам равишда очиқ мулоқотлар, давра суҳбатлари, семинарлар ўтказилиб, бу тадбирларга 1000 дан ортиқ оилалар вакиллари қамраб олинди.

Маънавий-маърифий йўналишда олиб борилган ишлар янада салмоқли бўлди. “Ёшлар келажак - бунёдкори” шиори остида ўтказилган “Ёшлар фестиваллари”, “Ёш китобхон” Pеспублика кўрик-танлови, “Энг намунали туман Сардорлар Кенгаши” танлови, “Энг намунали туман етакчилари Кенгаши”, “Камалак билимдонлари” танловлари ва “Ёшлар шахмат тахтаси” турнири, “Момомнинг сандиғи” 1-анъанвий Ўзбекистон Pеспубликаси эртаклар танловида, “Камалак юлдузлари” Pеспублика болалар ижодиёти фестивалида туманимиз ёшлари ғолибликни қўлга киритдилар.

Бўлиб ўтган ҳисобот йиғилишида эришилган ютуқлар билан бир қаторда йўл қўйилган камчиликлар ҳам айтиб ўтилди. Хусусан, тумандаги бир қатор умумтаълим мактабларининг ёшлар иттифоқи бошланғич ташкилот етакчилари ўз вазифаларини бажаришда сусткашликка йўл қўяётганлари қайд этилди ва 17 та бошланғич ташкилотларнинг ёшлар етакчилари қайтадан сайланди.

Ҳисобот йиғилишида кўрилган масалалар иштирокчилар томонидан атрофлича муҳокама этилиб, тегишли қарорлар қабул қилинди ва ёшлар иттифоқи туман Кенгашининг 2019 йилги иш режалари тасдиқланди.

Pобия ЙЎЛДОШЕВА.