“Фаровон оила – жамият равнақининг асоси” мавзусида тарғибот ўн кунлиги ўтказилмоқда

Ривожланишлар, барча соҳаларда янгиланишлар шиддат билан кечаётган бугунги даврда оила институтини мустаҳкамлаш, оиланинг репродуктив саломатлиги ва демографик ривожланиши ва фаровонлиги, хотиржамлигини таъминлаш, умуминсоний ва миллий оилавий қадриятларни чуқур сингдириш орқали оилавий низоларнинг, ажримларнинг олдини олиш муҳим аҳамият касб этмоқда.

Муҳтарам Юртбошимизнинг 2018 йил 2 февралда қабул қилган “Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятини тубдан такомиллаштириш чора-тадбирлари тўғрисида”ги Фармонига мувофиқ бунингдек давлат аҳамиятидага молик вазифани ҳал қилишга йўналтирилган чора-тадбирларни амалга оширишга хизмат қилувчи Ўзбекистон хотин-қизлар қўмитаси қошидаги Республика “Оила” илмий-амалий маркази негизида Ўзбекистон Республикаси Вазирлар Маҳкамаси ҳузуридаги “Оила” илмий-амалий тадқиқот маркази, унинг Қорақалпоғистон Республикаси ва вилоятлар, Тошкент шаҳар бошқармалари, туман (шаҳар) бўлимлари ташкил этилди ҳамда фаолияти бошлаб юборилди.

Айтиш жоизки, ўтган даврда мазкур тузилма оилаларда соғлом муҳитни, ўзаро ҳамжиҳатликни, бир-бировга ҳурмат-эътибор, ўзаро ишончни мустаҳкамлашга, турли турмуш ташвишларини биргаликда оқилона ҳал қилишга рағбатлантириш борасида кўпгина саъй-ҳаракатларни амалга оширмоқда.

Ўзбекистон Республикаси Президентининг “Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятини тубдан такомиллаштириш чора-тадбирлари тўғрисида”ги, 2019 йил 9 январдаги “Жамиятда ҳуқуқий онг ва ҳуқуқий маданиятни юксалтириш тизимини тубдан такомиллаштириш тўғрисида”ги Фармонлари ижросини таъминлаш мақсадида “Оила” илмий-амалий тадқиқот маркази 2019 йил 11 январда 2019 йил 25 январдан 5 февралга қадар “Фаровон оила – жамият равнақининг асоси” мавзусида тарғибот ўн кунлигин ўтказиш юзасидан қабул қилган Фармойишига мувофиқ кенг кўламли чора-тадбирлар амалга оширилмоқда.

– Ўн кунлик давомида аҳоли ўртасида ўтказиладиган тушунтириш-тарғибот ишларимиз ўз самарасини беришга интилмоқдамиз. Айни кунда туманимизда арзимаган сабаблар – бир-бировни менсимаслиги , эр-хотин бир-бировининг қарашларини ҳурмат қилмаслиги ё ўзаро ишончсизлик оқибатида ажрашишга қарор қилаётган оилаларнинг кўплиги ташвишланарли ҳол. Марказимиз ташкил этилганидан бери ўзаро низоли 125 оилалардан мурожаатлар келиб тушди, 87 та оила яраштирилди, оила муқаддаслигини тушунтиришга бағишланган 80 дан зиёд тадбирлар ўтказдик, – дейди “Оила” маркази туман бўлими раҳбари Гулшод Юсупова.

“Фаровон оила – жамият равнақининг асоси” мавзусидаги тарғибот ўн кунлиги доирасида ўтказилаётган оилада соғлом ва фаровон турмуш тарзини қарор топтириш, оила муқаддаслиги, никоҳ ёши ва унга амал қилиш аҳамияти, оилавий ажримларнинг олдини олиш, ажрашган оилалар фарзандларига алимент тайинлаш ва тўлаш тартиби, никоҳ олди тиббий кўригининг аҳамияти, соғлом оила бунёд этиш йўл-йўриқлари хусусидаги тадбирлар ҳам оилавий ажрим ва бегуноҳ гўдакларнинг тақдирига лоқайдлик билан қарамасликка, бунингдек салбий ҳолатларнинг олдини олишга барчани бирдек курашишга чорлайди.

Ойгул РАЖАБОВА.