ЎЗБЕКИСТОН МАҲАЛЛАСИДА ЯШОВЧИ PАЙҲОНА ОСИЁ ЧЕМПИОНАТИДА ИШТИPОК ЭТАДИ

Pайҳона Шомуродова Куюк кўпир овулидаги Ўзбекистон маҳалласида жойлашган 44-сонли мактабнинг аълочи ўқувчиси. У фанларни чуқур ўзлаштириш билан бирга спортнинг шахмат тури билан шуғулланади. Дастлаб шахмат доналарини сурганда у 6 ёшида эди. Оилада бобоси билан дадасининг шахмат ўйнашини кузатиб ўтириб, бу спорт турининг сирларини синчковлик билан ўрганишга интилди. Неварасининг қизиқишларига эътибор берган Шомурод ота Ибодуллаев бўш вақтларида Pайҳонага шахмат сирларини ўргата бошлади. У жуда қисқа фурсат ичида оила шахмат тахтасининг ғолибига айланди. Бобоси, дадаси, энаси, опа-сингилларининг ҳаммасини енгди. Ўқишга бўлган иштиёқи баландлигидан 1-синфга боргунига қадар алифбони ўрганиб, бемалол ўқийдиган бўлди.

44-сонли мактаб директори Аминбой Ешимбетов бу жажжи қизалоқнинг иқтидорини ўстириш ва унга имконият яратиб бериш мақсадида мактабда шахмат тўгараги фаолиятини янада жонлантиришга, синфлараро мусобақалар ташкил этишга алоҳида эътибор қаратди. Pайҳона шахмат мусобақаларида аввал ўз синфдошларини, сўнгра бутун мактабдошларини ортда қолдирди. 10 ёшгача бўлган болалар ўртасида ўтказилган мактаблараро ва ҳудудий мусобақаларда унга тенг келадиган шахматчи топилмади. Шахмат спорти бўйича 10 ёшгача болалар ўртасида ўтказилган мусобақаларнинг туман ва Қорақалпоғистон Pеспубликаси ғолиби бўлди.

Яқинда Pайҳона яна бир нуфузли мусобақада иштирок этди. Шахмат бўйича 10 ёшгача бўлган қиз болалар ўртасида Ўзбекистон Pеспубликаси чемпионатининг кумуш медал соҳибаси бўлди ва 2019 йилнинг ёз ойларида бўлиб ўтадиган Осиё чемпионатига йўлланма олди.

Спортдаги бу ютуғи учун 44-сонли мактабнинг 3-синф ўқувчиси Pайҳона Шомуродова Ўзбекистон Pеспубликаси жисмоний тарбия ва спорт вазирлигининг II даражали Дипломи ва қимматбаҳо совғалари билан тақдирланди.

Айни кунларда Pайҳона Шомуродова Осиё чемпионатида иштирок этиш учун пухта тайёргарлик кўрмоқда. Биз Pайҳона Шомуродованинг янада юксак натижаларга эришишига тилакдошмиз.

Pобия ЙЎЛДОШЕВА.