Жуфт қушларнинг олтин айёми

Қорақалпоғистон Республикасида хизмат кўрсатган журналист, устозимиз Саъдулла ака Хўжаниёзовнинг бутун ҳаёти, агар таъбир жоиз бўлса, туманда маънавий-маърифий соҳани ривожлантириш, ёш авлодни келажакка ишонч руҳида тарбиялаш, халқни янги марралар сари руҳлантириш, ижтимоий-маданий ҳамда иқтисодий муаммоларни ҳал этишда ўзининг дадил фикри, ўткир журналистик фаолияти билан боғлиқ вазифани сабр-тоқат ва қаноат ила адо этишдек фидойи меҳнат онларида кечди. 1967 йилда илк журналистлик фаолиятини “Амударё ҳақиқати” (ҳозирги “Тараққиёт кўзгуси”) газетасида оддий мухбирликдан бошлаган Саъдулла ака Хўжаниёзов, 40 йилдан зиёд ҳаётини газета таҳририяти билан боғлади ва туман матуботи соҳасида ўз ижод мактабини ярата олди.

Халқимизда “қанот жуфт бўлади”, деган ҳикмат бор. Отахон журналист умр йўлдоши, матбуот фидойиси Янгилжон опа Ҳамроева билан турмуш қурганларида нафақат унинг қанотлари жуфт бўлди, балки ҳаёт қувончлари ва ташвишларини биргаликда кўтарувчи кифтлари ҳам жуфт бўлди. Икки ижодкор жуфт қушлар каби парвоз қилдилар.

Оила деб аталмиш меҳр-муҳаббат салтанатини қурганларида, бу оила салтанатида ўзига хос муқаддас қадрият ва тутумлар асосида бири-биридан оқибатли фарзандларни тарбиялаб, вояга етказганларида ўзлари ҳаётда ҳамиша амал қилиб яшаган сабр-тоқат ва қаноатнинг ширин меваларини тердилар. Эл-юртга камарбаста тадбиркор фарзандлари Зафаржон, Шарофжон, Абдуллажон, кўплаб ёшларнинг устози Ҳулкарой ва Инобатхон, Иродахонлар, бири-биридан ўқимишли, шоиртабиат, интилувчан неваралари, қолаверса, эл-юрт эъзози билан бугун нуроний ёшга етган отахон журналист Саъдулла Хўжаниёзов ва матбуот фидойиси Янгилжон Ҳамроеваларнинг оила салтанати янада нурафшон, меҳр-оқибат гулшанига айланган.

Бу икки фидойи инсон турмуш қурганларига бугун 50 йил тўлди. 50 йил! Сабр-тоқат, қаноат ва меҳр-муҳаббатнинг олтин айёми. Ўзаро ҳурмат, эътибор, ўзбекона тутумларнинг қадри баланд тутилгани, умр деб аталмиш сер-заҳмат йўлнинг энг чароғон манзили бу! Бу манзилга етгунга қадар ҳаёт осмонида ҳамиша жуфтлашиб парвоз қилган қушлар каби олдинга, келажакка интилиб яшаган фидойи инсонлар – азиз ва муҳтарам устоз Саъдулла ака Хўжаниёзовни ва Янгилжон опа Ҳамроевани турмуш қурганларининг эъзоз ва эҳтиромга муносиб олтин айёми – 50 йиллиги билан чин дилдан тарбиклаймиз. Яна узоқ йиллар қўш қанот бўлиб парвоз қилмоқ, ижодий фаолият юритмоқ насиб этсин, деймиз!

“Минг бир фард”ни тузиб, халққа улашган,

Ҳақиқат йўлида толмаган сира.

Жуфт учган қушлардай аҳил, жуфтлашган,

Кўнгил ошёнлари гўзал, бокира.

“Ҳаёт ҳадялари” бошларида тож,

Фарзандлар меҳридан обод оила.

Бу умр тахтига энг муносиб бож –

Вафо-ю садоқат – олтин қоида.

Шунчалар меҳрибон бобо ва момо,

Хонадоннинг асл фаришталари.

Умрингиз кузагин кўрмангиз асло,

Оила қўрғонин бахт ришталари.

Устоз, Сизга ҳамроз Янгилжон момо,

Умрингиз тахтини ясатиб берган.

Бугун бўлсангиз-да нуроний бобо,

Ҳамон садоқатда эгилиб турган.

Меҳрингиз тафтидан баҳра олиб эл,

Яна даврон суринг Устоз, эллик йил!

Робия ЙЎЛДОШЕВА.