Juft qushlarning oltin ayyomi

Qoraqalpogʻiston Respublikasida xizmat koʻrsatgan jurnalist, ustozimiz Saʼdulla aka Xoʻjaniyozovning butun hayoti, agar taʼbir joiz boʻlsa, tumanda maʼnaviy-maʼrifiy sohani rivojlantirish, yosh avlodni kelajakka ishonch ruhida tarbiyalash, xalqni yangi marralar sari ruhlantirish, ijtimoiy-madaniy hamda iqtisodiy muammolarni hal etishda oʻzining dadil fikri, oʻtkir jurnalistik faoliyati bilan bogʻliq vazifani sabr-toqat va qanoat ila ado etishdek fidoyi mehnat onlarida kechdi. 1967-yilda ilk jurnalistlik faoliyatini “Amudaryo haqiqati” (hozirgi “Taraqqiyot koʻzgusi”) gazetasida oddiy muxbirlikdan boshlagan Saʼdulla aka Xoʻjaniyozov, 40-yildan ziyod hayotini gazeta tahririyati bilan bogʻladi va tuman matuboti sohasida oʻz ijod maktabini yarata oldi.

Xalqimizda “qanot juft boʻladi”, degan hikmat bor. Otaxon jurnalist umr yoʻldoshi, matbuot fidoyisi Yangiljon opa Hamroyeva bilan turmush qurganlarida nafaqat uning qanotlari juft boʻldi, balki hayot quvonchlari va tashvishlarini birgalikda koʻtaruvchi kiftlari ham juft boʻldi. Ikki ijodkor juft qushlar kabi parvoz qildilar.

Oila deb atalmish mehr-muhabbat saltanatini qurganlarida, bu oila saltanatida oʻziga xos muqaddas qadriyat va tutumlar asosida biri-biridan oqibatli farzandlarni tarbiyalab, voyaga yetkazganlarida oʻzlari hayotda hamisha amal qilib yashagan sabr-toqat va qanoatning shirin mevalarini terdilar. El-yurtga kamarbasta tadbirkor farzandlari Zafarjon, Sharofjon, Abdullajon, koʻplab yoshlarning ustozi Hulkaroy va Inobatxon, Irodaxonlar, biri-biridan oʻqimishli, shoirtabiat, intiluvchan nevaralari, qolaversa, el-yurt eʼzozi bilan bugun nuroniy yoshga yetgan otaxon jurnalist Saʼdulla Xoʻjaniyozov va matbuot fidoyisi Yangiljon Hamroyevalarning oila saltanati yanada nurafshon, mehr-oqibat gulshaniga aylangan.

Bu ikki fidoyi inson turmush qurganlariga bugun 50-yil toʻldi. 50-yil! Sabr-toqat, qanoat va mehr-muhabbatning oltin ayyomi. Oʻzaro hurmat, eʼtibor, oʻzbekona tutumlarning qadri baland tutilgani, umr deb atalmish ser-zahmat yoʻlning eng charogʻon manzili bu! Bu manzilga yetgunga qadar hayot osmonida hamisha juftlashib parvoz qilgan qushlar kabi oldinga, kelajakka intilib yashagan fidoyi insonlar – aziz va muhtaram ustoz Saʼdulla aka Xoʻjaniyozovni va Yangiljon opa Hamroyevani turmush qurganlarining eʼzoz va ehtiromga munosib oltin ayyomi – 50-yilligi bilan chin dildan tarbiklaymiz. Yana uzoq yillar qoʻsh qanot boʻlib parvoz qilmoq, ijodiy faoliyat yuritmoq nasib etsin, deymiz!

“Ming bir fard”ni tuzib, xalqqa ulashgan,

Haqiqat yoʻlida tolmagan sira.

Juft uchgan qushlarday ahil, juftlashgan,

Koʻngil oshyonlari goʻzal, bokira.

“Hayot hadyalari” boshlarida toj,

Farzandlar mehridan obod oila.

Bu umr taxtiga eng munosib boj –

Vafo-yu sadoqat – oltin qoida.

Shunchalar mehribon bobo va momo,

Xonadonning asl farishtalari.

Umringiz kuzagin koʻrmangiz aslo,

Oila qoʻrgʻonin baxt rishtalari.

Ustoz, Sizga hamroz Yangiljon momo,

Umringiz taxtini yasatib bergan.

Bugun boʻlsangiz-da nuroniy bobo,

Hamon sadoqatda egilib turgan.

Mehringiz taftidan bahra olib el,

Yana davron suring Ustoz, ellik yil!

Robiya YOʻLDOShEVA.