“ДОНО БИЛИМДОНЛАP” PЕСПУБЛИКА ТАНЛОВИНИНГ ТУМАН БОСҚИЧИ ЎТКАЗИЛДИ

“Доно нашриёти” масъулияти чекланган жамияти, болалар ва ўсмирлар учун чоп этиладиган журналлар таҳририятлари жамият ҳаётида эзгу қадрият ва анъаналарни чуқур қарор топтиришга, халқимиз, айниқса, ёш авлоднинг маънавий-интеллектуал салоҳияти, онгу тафаккури ва дунёқарашини юксалтиришда, она Ватани ва халқига муҳаббат, садоқат билан яшайдиган баркамол шахсни тарбиялашда беқиёс аҳамиятга эга бўлган китобхонлик маданиятини оширишга алоҳида эътибор қаратиб, бу борада ҳамкор ташкилотлар билан турли лойиҳаларни амалга ошириб келмоқда. Хусусан, Ўзбекистон ёшлар иттифоқи, Pеспублика халқ таълими вазирлиги, Ўзбекистон Матбуот ва ахборот агентлиги билан умумтаълим мактаблари ўқувчилари ўртасида миллий ва жаҳон адабиёти дурдоналарини кенг тарғиб этиш мақсадида ўтказилаётган адабиёт йўналишидаги “Доно билимдонлар” республика танлови шулар жумласидандир.

Ўқувчи-ёшлар орасида она тили ва адабиётига бўлган қизиқишни ошириш, давлат тилига ҳурмат руҳини юксалтириш,китобхонлик маданияти, нотиқлик санъати, жамоа бўлиб ишлаш кўникмаларини юксалтириш мақсадида ташкил этилаётган ушбу танлов тўрт босқичда – аввало синфлараро, (синф жамоаси туман, шаҳар босқичига тавсия этилади), кейинчалик туман, вилоят ва республика босқичларида ўтказилади. Ҳар гуруҳда 5 нафардан ўқувчи иштирок этади.

Танлов 5 та шарт бўйича ўтказилади. Биринчи шартда 5-9-синфлар адабиёт дарсликлари асосида ҳар бир жамоа учун 5 та тест саволлари тарқатилади. Жавоблар учун 5 дақиқадан вақт ажратилади. Иккинчи шартда берилган аралаш ҳарфлардан яширин сўз топилиши керак. Топилган сўздаги ҳарфлар иштирокида ва фақат шу ҳарфларни такрор қўллаб, янги сўзлар ҳосил қилиниши керак. Ҳар бир ҳосил қилинган янги сўз 2 балл тизимида баҳоланади. Калит сўзни тополмаган жамоадан 5 та сўз олиб ташланади. Энг кўп сўз топган жамоа ушбу шартда ғолиб ҳисобланади. Учинчи шартда ўқувчилар фақат дарсликка киритилган шоирларимиз ижоди (шеър, ғазал, ва рубоийлар)дан ёддан ифодали ўқиб беришлари керак. Тўртинчи шартда саҳна кўриниши, монолог, қўшиқ, рақс ва бошқаларни (шеър ҳисобга олинмайди) маҳорат билан ижро этишлари, ўқувчиларнинг чиқишлари 10 дақиқадан ошмаслиги керак. Бешинчи шарт эса “Ким кўп шеър билади?” деб номланади. Ушбу шартда ўқувчилар миллий шеъриятимизнинг истаган вакиллари шеърларидан 4 мисрадан ёддан ифодали ўқишлари, бундан аввалги иштирокчи ўқиган шеър қайси ҳарфдан тўхтаган бўлса, навбатдаги иштирокчи шу ҳарфдан бошланадиган мисра билан шеърхонликни давом эттириши керак. Муаллифи маълум бўлган шеърлар ҳисобга олинади. Ўқувчиларнинг ўз ижод намуналари ёки ноаниқ шеърлар ҳисобга олинмайди. Бир шеърни такрор ўқиган ёки беш сониядан ортиқ тўхтаб қолган қатнашчи ўйиндан чиқади, охирида қолган иштирокчи ғолиб ҳисобланади.

Танловнинг мактаблардаги синфлараро босқичи ғолиблари эсдалик совғалари билан, туман босқичи ғолиблари 1 млн. сўмлик сертификат ва диплом, “Миллий энциклопедия” тўплами билан, вилоят босқичи ғолиблари 3 млн. сўмлик сертификат ва диплом, 5 та велосипед, республика босқичи ғолиблари (ушбу босқичда вилоят босқичида фақат биринчи ўринни эгаллаган ғолиб жамоалар иштирок этади) “Дамас” автомашинаси билан тақдирланади.

Шунингдек танловнинг туман, вилоят, республика босқичида иккинчи, учинчи ўринларни эгаллаган жамоалар ҳам муносиб тақдирланадилар.

Шу йилнинг 20 декабрида мазкур танловнинг туман босқичи бўлиб ўтди. Малакали мутахассислардан таркиб топган ҳакамлар ҳайъати ўқувчиларнинг иқтидори ва билимини одилона баҳолаб бордилар.

Қизғин кечган беллашувлар натижасига кўра, 76-сонли мактаб жамоаси биринчи, 29-сонли мактаб жамоаси иккинчи, 12-мактаб жамоаси учинчи ўринларни қўлга киритдилар.

Айтиш жоизки, таълим тизимида илк бора ўтказилаётган “Доно билимдонлар” республика танлови ўқувчилар орасида улкан қизиқиш уйғотмоқда.

Ойгул Pажабова.