Орзу қилдим, аскар бўлдим

Ўзбекистон Республикасини ҳимоя қилиш — Ўзбекистон Республикаси ҳар бир фуқаросининг бурчидир. Фуқаролар қонунда белгиланган тартибда ҳарбий ёки муқобил хизматни ўташга мажбурдирлар.

Ўзбекистон Республикаси Конституциясининг

52-моддаси.

Ҳар гал телевизор орқали ҳарбийлар ҳаётига оид кўрсатувлар намойиш этилса, ич-ичимдан ҳавас қилардим:

- Катта бўлсам, албатта Миллий армия аскари бўламан! – дердим ота-онамга.

- Армияга ҳамманиям олавермайди, ўғлим, танлаб олишади, - отам "шунга тайёрмисан?” - дегандайсиновчан гапирардилар. Мен шунга интилдим. Интилган – орзусига албатта етишаркан. Тинимсиз спорт билан шуғулландим, мактабда ва коллежда илм асосларини чуқур ўзлаштиришга ҳаракат қилдим. Ўтган чақирув мавсумида барча тиббий, назарий ва тактик кўриклардан муваффақиятли ўтиб, 2013 йилнинг 18 февраль куни ҳарбий хизматга жўнаб кетдим.

Мана, салкам бир йилдан бери Андижон шаҳридаги умумқўшин таркибига кирувчи ҳарбий қисмлардан бирида ўз фуқаролик бурчимни адо этаяпман. Шуни қувонч билан айтаманки, ҳарбий хизмат мени энг аввало шахс сифатида ҳар томонлама тоблади: дунёқарашим, фикрлаш қобилиятим кенгайди, ҳатто назарий билимларни, ҳарбий-жисмоний машқларни эгаллаш борасида ҳам ақлан, ҳам жисмонан ва маънан улғайдим. Эндиликда сиёсий мавзудаги машғулотларда ҳам, ҳарбий машқларни бажаришда ҳам, жанговар синов майдонларида ҳам умуман қийинчилик сезмайман. Шундай пайтда муҳтарам Президентимизнинг биз ёшларга қарата айтган даъваткор сўзларини қайта-қайтаэслайман:

" – Аскар кийимини кийиб, ҳарбий хизматни ўтаган матонатли йигитларнинг барчаси менинг болаларимдир!”

Мен аскар бўлиб, ўз Конституциявий бурчимни адо этишга эришаётганимдан, Ўзбекистон Республикаси Давлат рамзлари қаршисида тиз чўкиб, Ўзбекистон байроғини ўпиб, ҳар бир йигит учун орзу бўлган Қасамёдни қабулқилганимдан бахтиёрман. Ҳозирги кунда ҳам ўз постида сергак аскар сифатида дилимда Қасамёдим билан она Ватаним сарҳадларини ҳимоя қилишдек шарафли бурчимни адо этаётирман. Барча тенгдошларимни, она халқимни, азиз Аму элимни, ота-онам ва устозларимни 8 декабрь – Конституция куни билан самимий табриклайман.

Акбаржон Камолов,

оддий аскар.