Уйингиздаги газ жиҳозлари ва мўриконлар созми? Таъмирлатиш учун ёнғинга қарши курашиш жамиятининг туман ҳудудий бўлинмасига қўнғироқ қилинг!

Куз-қиш мавсумида истеъмолчиларнинг табиий газ жиҳозларидан тўғри фойдаланишлари меҳим масала саналади. Носоз ва қўлбола ускуналарни ишлатиш инсон соғлиги ва ҳаёти учун катта хавф туғдиради. Навбатдаги лавҳамиз шу мақсадда ўтказилаётган профилактик ишлар хусусида.

Қишда ёғингарчилик кунлари бошланиб, ҳаво ҳарорати пасайиб боради. Биз хонадонларимизни иситиш чораларини кўра бошлаймиз. Электр иситиш асбоблари, табиий газ тармоқлари ёки ёқилғининг бошқа турларидан фойдаланамиз. Лекин, иситиш тизимлари мавсумга шай ҳолатдами? Иситиш асбоблари, печлар, табиий газ тармоқлари ишлатиш учун хавфсизми? Мўриконлар тозами? Мана шу каби саволларга жавоб излашни эса кўпчилик ҳолларда унутиб қўямиз.

Табиий газнинг тўлиқ ёнмаслиги, бехосдан узилиб қолиши, хона ичида тўпланиши, ёқиб қаровсиз қолдириш, улашда хавфсизлик қоидаларига риоя қилмаслик оқибатида портлаш, ёнғин, ҳамда табиий ва ис газидан заҳарланиш ҳолатлари билан боғлиқ фавқулодда вазиятлар содир бўлиши мумкин. Афсуски, бу ҳол инсонларнинг турли хил тан жароҳати олиши ёки ўлими билан якунланади.

Ўзбекистон Ёнғинга қарши курашиш жамиятининг туман ҳудудий бўлинмаси ходимлари томонидан ушбу ҳолатларнинг келиб чиқиш сабаблари ва манбалари ўрганилиб, таҳлил қилинганида фуқароларнинг табиий газдан нотўғри фойдаланиши, назоратсиз қолдириши, иситиш қурилмалари, газ горелкаларининг бузилиши, трубалар уланган жойнинг тешилиши натижасида газ чикиб кетганида захарланиш ҳамда сўриб олиш мосламаларининг ишлатиши сабабли рўй бераётгани аниқланмоқда. Бундан ташқари, печка билан иситиладиган хоналарда мўри тўлиб қолганида ва ёнғин вақтида ёпиқ, тутунли хоналарда қолган шахсларда ҳам заҳарланиш ҳолатлари кузатилади. Мўриконларни ёзда тўла беркитиб қўйиб, иситиш вақтида очмаслик хонага ис газининг тўлишига олиб келади.

Ис гази хонадонларимизда фойдаланиладиган табиий газнинг тўлиқ ёнмаслиги, кўмир ва органик моддаларнинг чала ёнишидан ҳосил бўладиган газдир. У инсон организмининг нафас йўллари ва аъзоларига кучли таъсир қилади. Организмни, хусусан, марказий асаб тизимини зарарлайди.

Заҳарланиш унинг ҳаводаги миқдори ва таъсир муддатига қараб енгил, ўрта ва оғир даражада бўлади. Бундай ҳолларда бош қаттиқ оғрийди, айланади. Қайт қилиш, ҳушдан кетиш кузатилади ҳамда нафас олиш секинлашади. Баъзан ўлимга олиб келади.

Биринчи ёрдам кўрсатиш учун, аввало, заҳарланган кишини зудлик билан тоза ҳавога олиб чиқиш зарур. Юзаки нафас олишда ёки нафас олиш тўхтаб қолганида сунъий нафас олдириш лозим. Бемор ҳушида бўлса, тананинг юқориси қисиб турувчи кийимлардан бўшатилади, иссиқ чой ва қаҳва ичирилади.

Шуни эслатиб ўтмоқчимизки, хонада табиий газ йиғилиб қолганида зудлик ойна ва деразаларини очиб, шамоллатиш, электр жиҳозларини ёқмаслик, ёқиқ бўлса ўчирмаслик, газ жўмракларини беркитиш, беркитишнинг иложи бўлмаса ёки ёрилган, синган ва тешилган жойлар аниқланса, газ таъминоти авария хизматига хабар бериш лозим. Табиий ва ис газидан заҳарланиш юз берса заҳарланган кишига биринчи тиббий ёрдам кўрсатиш, 103 телефон рақами орқали “Тез тиббий ёрдам”га, 104 телефон рақами орқали газ таъминоти хизматига, 1050 телефон рақами орқали Фавқулодда вазиятлар бошқармасининг Қутқарув хизматига мурожаат қилишни ёдда тутиш зарур.

Аҳолини табиий ва ис газидан заҳарланишининг олдини олиш тадбирлари нафақат мутассади ташкилот, идоралар ҳамда хизматлар тамонидан балки, ҳар бир хонадон эгалари ва барча фуқаролар тамонидан амалга оширилиши лозим.

Айни кунларда Ўзбекистон Ёнғинга қарши курашиш жамиятининг туман ҳудудий бўлинмаси ходимлари томонидан хонадонларда пуллик асосда газ жиҳозларини кўрикдан ўтказиш, созлаш, мўриконларни ва дудбўронларни тозалаш ишлари амалга оширилмоқда. Агар Сиз ҳам бу хизматда эҳтиёж сезсангиз, жамиятнинг 93 619 97 79 рақамли телефонига қўнғироқ қилиб, буюртма беришингиз мумкин. Шу ўринда барча юртдошларимизни газдан заҳарланиш ва чақнаш билан боғлиқ фавқулодда вазиятларнинг олдини олишда огоҳлик ва фаолликка чақирамиз.