ЖИСМОНИЙ ЧИНИҚИШ СОҒЛОМ ҲАЁТ УЧУН ИНТИЛИШДИР
Халқимиз азал-азалдан жисмонан бақувват кишиларга катта эътибор, ҳурмат ва ҳавас билан қараган. Хоразм элининг асл фарзанди, кураги ерга тегмаган полвон Паҳлавон Маҳмуднинг жасорати ва хизмати халқнинг юрагидан шундай жой олганки, бугун у халқ қаҳрамони сифатида эътироф этилиб, унинг охирги қўним топган жойи бутун халқимизнинг севимли зиёратгоҳига айланган.
Бугунги кунда мустақил Ўзбекистонимизда ўсиб келаётган ёшлар учун жуда катта шарт-шароитлар яратилдики, Республикамизнинг энг чекка қишлоқларида ҳам жаҳон андозаларига мос спорт иншоотлари қурилиб, ёшлар ихтиёрига топширилди. Бу масканларда барча ёшлар, аҳоли ўзлари истаган спорт турларига қатнашиб, ўз саломатликларини мустаҳкамламоқдалар.
Жисмоний тарбия – умуминсоний маданиятнинг бир қисми бўлиб, ўз саломатлигини сақлаш ва мустаҳкамлаш мақсадидаги ҳаракатдир.
Жисмоний машқлар билан мунтазам шуғулланиб турувчи киши даволанишга камдан-кам муҳтож бўлади, деб ёзган эди Абу Али ибн Сино .
Жисмоний тарбиянинг соғломлаштирувчи ва тарбиявий аҳамияти кенг қамровли бўлиб, жисмоний ва ақлий етукликни таъминлашга, соғлиқни яхшилашга, организмнинг ташқи муҳит салбий таъсирларига нисбатан қаршилигини оширишга, одамда ҳаракат кўникмаларини шакллантиришга, организмнинг чиниқишини таъминлашга хизмат қилади. Шунингдек, болаларда фаоллик, ташаббускорлик, бирон масалага журъат билан киришиш, қийинчиликдан, оғир меҳнатдан қўрқмаслик, ўртоқлик ва дўстлик ҳиссиётларини шакллантиради.
Мунтазам равишда жисмоний машқлар билан шуғулланиш аҳоли орасида касалланиш ва жароҳатланишнинг олдини олади, орттирилган баъзи ёмон одатлардан воз кечишга олиб келади, организмда мавжуд айрим касалликларни даволайди.
Халқимизда шундай бир ҳикматли сўз бор: “Пул йўқотсанг, ҳали ҳеч нарса йўқотмабсан, вақт йўқотсанг ҳам кам нарса йўқотганинг, аммо соғлиқни йўқотсанг, ҳамма нарсани йўқотганинг”. Соғлиқни йўқотгандан кейин излашдан кўра, уни йўқотмасдан олдин асраш лозим. Бунда жисмоний чиниқишнинг ўрни муҳим. Шундай экан, кекса-ю ёш, эркагу аёл соғлом яшаши учун ҳамиша спортга ошно бўлиши керак.
Жумабой Явқашев, туман Тиббиёт бирлашмасининг
“Саломатлик” бўлими мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
