Ўзбекистон Республикаси Конституциясининг 21 йиллиги олдидан

Ўзбекистон Республикасида барча фуқаролар бир хил ҳуқуқ ва эркинликларга эга бўлиб, жинси, ирқи, миллати, тили, дини, ижтимоий келиб чиқиши, эътиқоди, шахси ва ижтимоий мавқеидан қатъи назар, қонун олдида тенгдирлар.

Ўзбекистон Республикаси Конституциясининг 18-моддасидан.

Ўзбек қардошим, қозоқ бавурим дейди

Туманимизда кўп минг сонли қозоқлар ўзбек, қорақалпоқ, туркман, рус, татар каби турли миллат вакилларибилан бир ота-она фарзандларидай аҳил-иноқ яшашмоқда. Уларнинг ота-оналари Аму соҳилида жойлашган шу маконда асрлар оша бирга умргузаронлик қилишиб, барча халқлар билан қувончни ҳам, қайғуни ҳам бирга тотиб келишган. Тўй маъракаси бир, орзу-интилишлари бир одамлар турли миллат вакиллари орасида муносабатларни чегараловчи ҳеч бир омил йўқлиги боис, ҳатто кўпчилиги қиз олишиб, қиз беришиб қариндош бўлиб кетишган.

Шуниси қувонарлики, юртимизда ўзбек қозоққа қардошим деса, қозоқ ўзбекка бавурим дейди. Ўзаро ҳамжиҳатлик, шу юрт равнақи йўлидаги орзу-интилишлари нечоғ-лик ҳамоҳанг, турмуш тарзи бир хил бўлса-да қозоқлар ўз ота мерос анъаналарини, урф-одатларини ҳам унутгани йўқ. Булар айниқса келин тушириш тўйларида, бешик тўйларда ва бошқада маросимларида айниқса яққол намоён бўлади. Шунингдек фарзанднинг, келиннингота-она билан муносабатларида ҳам ўзгачаликлар бор. Қозоқ миллати вакилларининг уруғи бир бўлса, туғишган қариндош ҳисобланади. Улар бир-бири билан қиз олишмайди. Она биринчи фарзандининг исмини айтмайди, келин қайниси, бекачларининг исмини айтмайди, қайнона-қайнотасига-эна, ота деб мурожаат қилса, қайниси, бекачларига эркалатиб ўзича исмлар қўйиб олади.

Турли миллат вакиллари орасида яшасада қозоқлар бир-бирига меҳр-оқибатли, урф-одат, анъаналарига садоқатли. Асрлар оша ўзбек заминида яшаб келаётган қозоқларнинг бу урф-одатларини шу маконда истиқомат қилувчи барча халқлар ҳам ҳурмат қилишади. Умуман Ўзбекистон Республикаси барча фуқаролар бир хил ҳуқуқ ва эркинликларга эга бўлиб, жинси, ирқи, миллати, тили, дини, ижтимоий келиб чиқиши, эътиқоди, шахси ва ижтимоий мавқеидан қатъи назар, қонун олдида тенгдирлар, дея Асосий қонунимизда таъкидлангани ҳаётимизда ҳар лаҳзада ўз исботини топиб турибди. Фикримнинг исботи сифатида туманимизда оз сонли қозоқлар орасида раҳбар ходимлари, мулкдорлар, депутатлар борлигини айтишим мумкин. Шунингдек иккита қозоқ тилида ўқитиладиган умумтаълим мактаблари бор ва уларда болаларнинг ўқиб илм олишлари учун чексиз ғамхўрликлар қилинаётир.

Ҳа, Ўзбекистонимизда яшовчи халқларнинг миллати, тили турлича бўлсада мақсадлари бир: мустақил Ватанимизнинг тинчлиги, осойишталиги ва фаровонлигига ҳисса қўшиш, шу заминни авлодларига гуллаб-яшнаган ўлкага ай-лантириб мерос қилиб қолдириш.

Озод Алмуродов,

туман қозоқ миллий маданияти маркази раиси.

(Фото-http://adolat.uz)