"Тоза ҳудуд" ДУК туман филиали қандай фаолият олиб бормоқда? (+видео)

Президентимизнинг 2017 йил 21 апрелдаги "2017-2021 йилларда маиший чиқиндилар билан боғлиқ ишларни амалга ошириш тизимини тубдан такомиллаштириш ва ривожлантириш чора-тадбирлари тўғрисида"ги қарори ижроси доирасида ташкил этилган “Тоза ҳудуд” давлат унитар корхоналари ҳудудларда экология ва санитария муҳитини янада яхшилаш, шаҳар ва қишлоқларнинг обод ва кўркам бўлишида муҳим аҳамиятга эга. “Тоза ҳудуд” давлат унитар корхонасининг туман филиали ҳам бу борада самарали фаолият олиб бормоқда.

Корхона махсус техника ва контейнерлар билан таъминланган бўлиб, полигонлар ҳамда махсус автогаражлар қуриш чоралари кўрилмоқда. Юридик ва жисмоний шахслар билан маиший чиқиндиларни йиғиш ва олиб чиқиш хизмати кўрсатиш бўйича шартнома тузишда қишлоқ ҳудудлари ҳам қамраб олинмоқда. Ҳозиргача юзлаб юридик ташкилотлар ва жисмоний шахслар билан шартномалар тузилди ва корхонанинг туман филиали томонидан мавжуд имкониятлардан тўла фойдаланган ҳолда ҳудудни тоза сақлаш борасида кенг кўламли ишлар амалга оширилаяпти.

Корхона жамоасининг мавжуд 12 та махсус техникалардан унумли фойдаланиши натижасида туман маркази ва Манғит шаҳри атрофида жойлашган 4 минг 177 та хонадонлардан қаттиқ маиший чиқиндиларнинг ўз вақтида олиб кетилиши таъминланмоқда.

Шунингдек, корхона 12 та бюджет, 138 та хўжалик ҳисобидаги корхоналарга ҳам шартнома асосида хизмат кўрсатмоқда. Шу йилнинг охиригача тумандаги барча овул ва маҳаллалар аҳолисига ҳам корхона томонидан хизмат кўрсатишни ташкил этиш режалаштирилмоқда.

Шу кунгача “Тоза ҳудуд” Давлат унитар корхонасининг туман филиали томонидан аҳолига 191 миллион сўмлик, юридик ташкилотларга 42 миллион сўмлик, бюджет ҳисобидаги ташкилотларга эса 105 миллион сўмлик хизматлар кўрсатилди.

Айни кунда Манғит шаҳридаги барча маҳаллалар кўчаларида йиғилган қаттиқ маиший чиқиндиларнинг шартнома асосида тасдиқланган жадвал бўйича олиб чиқиб кетилиши таъминланмоқда.

Шу ўринда барча юртдошларимизни, жисмоний ва юридик шахсларни қаттиқ маиший чиқиндиларни олиб чиқиб кетиш бўйича “Тоза ҳудуд” давлат унитар корхонаси туман филиали билан шартнома тузишга чақириб қоламиз. Ўзимиз яшаётган ҳовли, ўзимиз меҳнат қилаётган корхона ҳудудининг тозалиги экология ва атроф-муҳит тозалигининг асосий шартларидан бири эканлигини унутмайлик!