Овул ободонлиги йўлида

"Куюк кўпир” овулида айни кунда 715 та хонадонда 4500 нафардан зиёд аҳоли истиқомат қилади. Овул фуқаролар йиғини томонидан хонадонларда соғлом турмуш тарзининг кенг тарғиб қилиш, тиббий маданиятни ошириш ва шу баробарида аҳолининг турмушини яхшилаш борасида кўпгина ишлар қилинмоқда.

Аҳолининг турмуш фаровонлигини ошириш ҳақида гап кетганида, аввало уларнинг бандлигини таъминлаш лозимлиги ўз-ўзидан аён. Ахир бирор тирикчилик манбаига эга бўлмаган оилада тўкин турмуш ҳақида гап бўлиши мумкинми?

Шуларни инобатга олган ҳолда ишга яроқли фуқароларнинг иш билан бандлигини таъминлашга эътибор қаратмоқдамиз. Фуқароларимизнинг 2200 нафари иқтисодиёт тармоқларида, 5 нафари ММТПда, 650 нафари фермер хўжаликларида, 20 нафари деҳқон хўжаликларида, 125 нафари таълим, 58 нафари соғлиқни сақлаш, 5 нафари маданият муассасаларида, 32 нафари саноатда, 20 нафари қурилишда ва бошқада фаолият турлари билан 1285 нафар фуқароларимиз банд. Ишга яроқли ишсиз 150 нафар фуқароларимизнинг ҳам иш билан таъминланишига ҳаракат қилаяпмиз.

Овулимизда барча хонадонлар ўз томорқа ерларига эга бўлиб, ўзларига керакли полиз маҳсулотлари ва сабзавотларни етиштириб, ўз эҳтиёжларидан ортганини бозорга олиб чиқиб сотиб, юртдошларимиз дастурхонининг тўкин-сочинлигига ҳам ҳисса қўшишаётир. Барча хонадонлар ўз қорамолларига, паррандаларига, қўй-эчкиларига эга.

Куюк кўпирликлар йил бошидан бери атроф-муҳитни ободонлаштириш, кўкаламзорлаштириш, мевали ва манзарали дарахтлар, гуллар экиб, чор-атрофни обод ва гўзал масканга айлантиришга алоҳида эътибор беришаётир. Айниқса оила иқтисодини яхшилашни таъминловчи мевали дарахтларнинг ҳар бир томорқада бўлишини ҳамда улардан юқори ҳосил олиш йўл-йўриқларини аҳолига кенг тушунтирмоқдамиз ва ижобий натижаларга эришаяпмиз. Эндиликда томорқа кони фойда эканлигини улар яхши англаб етишаяпти. Бизнинг мақсадимиз ҳам шу: чор-атроф боғ-роғларга буркансин, хонадонлар дастурхони тўкин-сочин бўлсин.

Рашид ЕРЛАПАСОВ,

"Куюк кўпир” овул фуқаролар йиғини раиси.