СОFЛИГИМИЗ МАСЪУЛИЯТИ
Камҳаракатлилик ва семизлик турли касалликларни, биринчи навбатда юрак қон-томир тизими касалликларини, шунингдек, ички касалликларни, ҳаракат таянч ва бўғин касалликларини ойлар, йиллар давомида аста-секин келтириб чиқаради. Камҳаракатлилик ва семизлик бир-бирлари билан жуда узвий боғланган бўлиб, бир-бирларини келтириб чиқараверади. Камҳаракатликка эса асосан ўзимиз сабабчи бўламиз. Атиги бир-икки чақирим оралиғидаги манзилга етиб олиш учун ҳам такси чақирамиз ёки ҳаракатдаги мавжуд таксилардан фойдаланамиз. Ваҳоланки, ҳар бир соғлом бўлишни истовчи одам ҳар куни камида беш километр пиёда юриши, имкони бўлса эрталаб югуруши керак. Қадимги юнон донишмандларидан бири соғлом бўлай десанг югур, узоқ умр кўрай десанг ҳам югур, деган экан.
Юрак қон-томир тизими касалликлари тез кўпаяётган ва ер юзида бу касалликларнинг тез кўпайиши жиҳатидан биринчи ўринга чиқаётган бир даврда ўз соғлигимизга ўзимиз масъул бўлишимиз, айниқса бутун организмимизнинг ҳаёт-мамоти ҳисобланган юрагимизни авайлаб асрашимиз зарур. Касал бўлсак шифокор тузатади, деган ақидадан воз кечиб, ўзимизни ўзимиз алдаб юпатмаслигимиз лозим. Ўз соғлигимиз ўзимизга керак, ўз соғлигимизга ўзимиз масъулмиз. Фақат соғлом одамларгина ширин орзуларига, эзгу ниятларига эришадилар ва бахтли-саодатли бўладилар.
Энди бўлимимиз ҳақида гапирадиган бўлсам, бўлимимиз 35 ўринли бўлиб, беморлар учун барча қулай шарт-шароитлар яратилган. Қабулимизга келган беморларга аниқ, тўғри ва сифатли ташхис қўйишда энг сўнгги замонавий тиббий асбоб ускуналардан: электро-кардиограмма, ультра товушли текширув тиббий асбоб ускуналаридан унумли фойдаланмоқдамиз. Аниқ ва сифатли ташхис эса беморни самарали даволашда жуда қўл келади. Бу муҳим ишда менга малакали ва тажрибали кардиолог шифокорлардан Омонбой Қурбониёзов ва Муҳаббат Ёқубовалар ҳамда истеъдодли ёш кардиолог шифокорлардан Шодибек Давлетов ва Фахриддин Ибодуллаевлар яқиндан ёрдам берадилар, доимо беморлар орасида бўлиб, уларнинг дардларига малҳам бўлмоқдалар.
Бизга мурожаат қилаётган беморларнинг кўпчилигини қон босими касаллигига дучор бўлганлар ташкил этади. Ҳеч яширмасдан гапнинг очиғини айтганда гипертония, яъни содда қилиб айтганда қон босими касаллиги сўнгги йилларда жуда тез, кўпаяётган касалликлар сирасига киради. Ҳатто ёшлар орасида ҳам бу касалликнинг учраётганлиги биз шифокорларни ажаблантирмоқда. Бу касалликнинг кўпайишига ҳам кўпроқ ўзимиз сабабчимиз. Камҳаракатлиликдан ташқари соғлом турмуш тарзи тамойиллари ва қоидаларига амал қилмасдан алкоголли ичимликларга ружу қўйиб, сигарета ва нос чекиш каби зарарли иллатларга илакишиб қолаётганлар анчагина. Бундай зарарли иллатлар ҳар қанча соғлом бўлмайлик барибир бора-бора юрак қон-томир тизимимизга салбий таъсир кўрсатиб, касалликларга мубтало қилади.
Яна кўп учраётган касалликлардан орттирилган ревматик юрак пороги ва туғма юрак пороги касалликларидир. Юрак ишемия касалликларидан миокард инфаркти, зўриқиш стенокардия касаллиги, юрак аритмик касаллиги, инфарктдан кейинги кардио склероз касаллиги ҳам тез-тез учраётган касалликлар сирасига киради. Юрак қон-томир тизими касалликлари таркибига кирувчи бу касалликлар ўзининг ўта нозиклиги, инжиқлиги ва мураккабликлари билан бошқа касалликлардан алоҳида ажралиб туради. Шу боис мазкур касалликларга чалинган беморлар ижтимоий кундалик ҳаётида учраб турадиган қалтис ва кескин ҳаракатлардан ва стресслардан йироқ бўлиб, шифокорнинг доимий диққат марказида ҳамда назоратида бўлиши керак.
Депутатлик фаолиятимга тўхталадиган бўлсам, менинг бу борадаги фаолиятим халқимизнинг соғлигини сақлашга, репродуктив саломатлигини мустаҳкамлашга, она ва бола соғлигини муҳофаза қилишга, соғлом авлодни шакллантиришга йўналтирилган бўлади, қаердаки жисмонан ва маънан соғлом кишилик жамияти шаклланса, ўша жамият гуллаб яшнайди, тараққий қилади ва обод бўлади. Соғлом авлод шакллантирилиб вояга етказилса, бундай жамиятнинг бугуни ва келажаги порлоқ бўлади.
Ҳам депутатлик ваколатим, ҳам туман тиббиёт бирлашмаси топшириғи бўйича менга "Оқ олтин” ҚВП шифокорлари билан ҳамкорликда ишлаб, қишлоғимиз аҳолисининг соғлигини яхшилаш, репродуктив саломатлигини мустаҳкамлаш, қолаверса туғиш ёшидаги аёллар, айниқса ҳомиладор аёллар ва ёш оналар соғлигини, болалар соғлигини муҳофаза қилиш, аҳолининг тиббий саводхонлигини, маданиятини ошириш каби муҳим масалалар, долзарб вазифалар давлат аҳамиятига эга бўлган умумдавлат, умумхалқ масалалари ва вазифаларидир. Зеро, бу масалалар ва вазифалар замирида бизнинг бугунимиз ва келажагимиз истиқболини барпо қилиш ҳамда мустаҳкамлаш масаласи ётибди.
Икром ЙЎЛДОШЕВ,
ТТБ кардиология бўлими мудири, халқ депутатлари Амударё туман Кенгаши депутати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
