Боболар мардлиги ва жасорати ибрат қилиб кўрсатилди

Ватан ва халқ учун жонини фидо қилган мард ўғлонлар ёди мангу яшайди. Айниқса, уларнинг юрт озодлиги йўлидаги курашларда кўрсатган жасорати асло унутилмайди. Биз биламизки, тинчликка раҳна солиб, элга кулфат келтирган душманларга қарши мардона жанг қилган ота-боболаримизнинг фидойиликлари туфайли Ватан озодлигига эришилган.

Ёш авлодга ота-боболаримизнинг Ватан озодлиги ва ободлиги йўлидаги қаҳрамонликларини, жасоратини ибрат қилиб кўрсатиш ҳамда ёш авлод қалбида ифтихор туйғуларини уйғотиб, ватанпарварлик ҳиссини мустаҳкамлаш мақсадида тумандаги 69-сонли мактабда “Мардлик ва жасорат” дарслари ўтказилди. Дарсга ташриф буюрган 9202 “К” қисм ҳарбийлари капитан И. Ҳайдаров, оддий аскарлар С. Норматов ва И. Ғуломовлар ўқувчиларга Иккинчи жаҳон урушидаги оғир йиллар, урушда жанг қилган жасур юрт ҳимоячилари ва фронт орқасида меҳнат қилган халқнинг фидойилиги ҳақида фахр билан айтиб бердилар. Шунингдек, аждодлардан қолган обод юртни янада юксалтиришга ҳисса қўшишни ҳар ким ўз бурчи деб билиши лозимлиги, ватанпарварлик олий туйғулиги ҳақида ўқувчиларга кенг тушунчалар бердилар.

Шунингдек, чегара ҳудудда жойлашган 9202 “К” қисм ҳарбийлари ҳамда Қиличбой овули оқсоқоли А. Жуманиёзов, хотин-қизлар билан ишлаш ва оилаларда маънавий-ахлоқий қадриятларни мустаҳкамлаш бўйича мутахассис Қ. Давлетовлар билан биргаликда овулда яшайдиган уруш йилларида фронт орқасида меҳнат қилган фахрийлар Т. Саидова, Ж. Хидирова, P. Шарипова, Й. Pажабов, М. Ўрозовалар хонадонларига бориб, уларни байрам билан қутладилар ва совғалар топширдилар.

Фахрийлар ўзларига кўрсатилаётган эътибор ва ғамхўрликлардан беҳад шод бўлдилар.

Е. Аляминов, сержант,

9202 “К” ҳарбий қисм йўриқчиси.