СЕМИНАР ТАДБИРКОРЛАРНИНГ ҲУҚУҚИЙ БИЛИМИ ОШИШИГА ХИЗМАТ ҚИЛАДИ

Мамлакатимиз иқтисодиётининг тез суръатлар билан ривожланишида тадбиркорликка, хусусий бизнесга қаратилаётган эътибор, хусусан, тадбиркорларнинг ҳуқуқларини ҳимоя қилиш борасида қабул қилинаётган қатор меъёрий ҳужжатларнинг муҳим ўрни бор.

Ўзбекистон Республикаси Президентининг 2005 йил 14 июль кунги “Тадбиркорлик субъектларини ҳуқуқий ҳимоя қилиш тизимини янада такомиллаштириш чора-тадбирлари тўғрисида” ги Фармони жамиятни демократлаштириш ва янгилаш, мамлакатни ислоҳ қилиш ҳамда модернизациялаш, суд-ҳуқуқ тизимини янада эркинлаштириш, назорат органларининг тадбиркорлик субъектлари фаолиятига аралашувини камайтириш, уларнинг ҳуқуқ ва манфаатлари ҳимоя қилинишини таъминлаш, тадбиркорлик фаолияти асоссиз чекланишига йўл қўймаслик каби мақсадларни ўзида мужассам этганлиги билан аҳамиятлидир.

Соҳа ривожи учун қабул қилинаётган қарор ва бошқа ҳуқуқий – меъёрий ҳужжатлар билан тадбиркорларни таништириб бориш, ҳуқуқий маданиятни ошириш ҳам жуда муҳим.

Шу мақсадда 19 апрель куни туман Давлат солиқ инспекциясида туман иқтисодий суди томонидан семинар ташкил этилди.

Тадбирда туман Иқтисодий суди раиси У. Собиров иштирокчиларга соҳага доир янги қабул қилинган ҳуқуқий-меъёрий ҳужжатлар ҳақида, шунингдек, тадбиркорликнинг банкрот ҳолатига тушиб қолишининг олдини олиш, молиявий жарималарни қўллаш тартиблари ҳақида маъруза қилди.

Семинарда тадбиркорлик субъектлари ўз фаолиятида учраётган айрим муаммолар ҳақида гапириб, зарур йўл-йўриқларни олдилар.

Ўтказилган тадбир солиқ соҳаси ходимлари ва тадбиркорларнинг ҳуқуқий билимлари ошишига хизмат қилгани билан ҳам аҳамиятли бўлди.

О. Ражабова.