НАВРЎЗИМ

Қизлар қилиб сочига, тол баргагин чамбарак,

Бугун байрам-ла қутлар, Ер-у осмонлар – фалак

Қозонларда биқирлаб, қайнар тансиқ сумалак,

Элнинг ардоғидасан, ой, қуёшим, юлдузим –

Бизга асрлар оша етиб келган Наврўзим!

Наврўз – асли Янги кун – йилнинг боши, дегани,

Келинг сомса, сумалак, кўк чучвара егани.

Тиллар лолдир шаънингга, ширин бир сўз дегани,

“Очил дастурхон”ингга, тушиб кетса гар кўзим -

Кўзни қамаштиради, ноз-неъматинг, Наврўзим!

Тарқалади қайғу-ғам, тарқалар алам бугун,

Таърифингни ёзишга, ожиздур қалам бугун.

Дўстлар ўйнаб-кулинглар, Наврўзи олам бугун,

Меҳмон келса кутгумдир, қўлимда нон-у тузим–

Умидим, насибамсан ҳам ризқимсан, Наврўзим!

Неча асрларга тенг, сенинг мўътабар ёшинг,

Бугун қайта осмонда, порлаб турар қуёшинг.

Элимизда табаррук бўлган сумалак ошинг,

Навбаҳор келинчаги –Янги кун – ризқу-рўзим –

Мустақиллик даврида, қайта келган Наврўзим!

Кишилар орасидан, меҳр-оқибат кетди,

Қатағон-у турғунлик йиллар бошингга етди...

Ниҳоят, эркин даврон, озодлик насиб этди,

Асрлик пардангни оч, оч энди юз-у кўзинг –

Мунофиқлар куйсинлар, шаънинг кўриб, Наврўзим!

Мустақиллик даврида, тозаланиб, покланиб,

Истагимиз, юргайсан, туҳматлардан сақланиб.

Олдда турар қанчалар, муаммолар тахланиб,

Режаларни ечишда, маёқ–йўлчи юлдузим –

Паҳлавоним, ботирим, забардастим, Наврўзим!

Куй-қўшиқлар тинмасин, юртимиз бўлсин обод,

Жаҳон аҳлин уйғотсин, бўлсин эллар озод, шод.

Шаънингга ғазал битди, ғазалхонинг Шомурод,

Токи танда жоним бор, куйлагайман чин сўзим –

Халқим ардоғида бўл, халқ байрами – Наврўзим!

Шомурод ХЎЖАНОВ,

“Дўрман” овули.