МЕН САМИМИЯТДАН КУЧ ОЛДИМ
Мамлакатимизда юз бераётган ўзгаришлар, халқимиз ҳаётига кириб келаётган янгиланишларни кузатиб, ич-ичимдан қувониб кетаман. Ҳақиқатдан ҳам қувонгулик. Юртимиз қиёфаси кун сайин чирой очаётир. Айниқса, одамларнинг руҳиятидаги кўтаринки кайфият, эртанги кунга ишонч туйғуси, ҳар бир қалбга манзур меҳр-оқибат, тотувлик кўнгилларга хотиржамлик бағишлайди. Мен шулар ҳақида ўйлаганимда ҳар гал муҳтарам Президентимиз Ш.М.Мирзиёевнинг: “Ҳар бир давлат хизматчиси ҳар куни ўзининг меҳнати билан эгаллаб турган лавозимига лойиқлигини исботлаши шарт”, деган сўзлари ёдимга тушади. Назаримда, Президентимиз ҳар бир давлат хизматчиси учун олтин қоида сифатида қатъий белгилаб берган бу таомил туфайли масъул раҳбарми, оддий хизматчими, деярли барча идора ва ташкилотларда соғлом маънавий муҳит яратилмоқда.
Мен, кексалик аломатими, ҳаёт ташвишларидан чарчадимми, ҳарқалай маълум муддат туман тиббиёт бирлашмасига қарашли марказий шифохонанинг асаб касалликлари бўлимида даволандим. Юқоридаги фикрларимнинг исботи сифатида айтаманки, мен дори-дармонлардан ҳам кўра, кўпроқ шифокорларнинг самимий муомалаларидан шифо топдим ва фарзандларим, оилам бағрида бардам-бақувватман. Шифокорлар Шукурулло Болтаев, Малоҳатхон Холимбетова, Баҳромжон Тиловов, Муҳаббат Мадаминова, Мақсудахон Шайдиева ҳамда ҳамшира қизлар ўзларининг ширин муомалалари билан дардларимга дармон бўлишди. Улар нафақат мени соғлом ҳаётга қайтаришди, балки фарзандларим, яқинларим учун ҳам хотиржам яшаш бахтини ҳадя этишди. Чунки оилада бир кишининг бетоблиги, беморнинг ўнлаб яқинлари кўнглига нотинчлик солади.
Мен табиатда уйғониш, яшнаш ва яшариш, яратиш фаслини бошлаб келаётган Наврўзи айём билан ҳар куни ўз меҳнати, беминнат хизмати, гўзал хулқ-атвори туфайли эгаллаб турган вазифаларини виждонан уддалаётган меҳридарё шифокорларни чин дилдан табриклайман. Илоҳим, қўлларингиз асло дард кўрмасин, эл-у юрт соғлиги йўлидаги фидойилигингиз учун Аллоҳнинг беназир мукофотига сазовор бўлинг, дейман.
Ойимжон ЎPОЗАЛИЕВА, меҳнат фахрийси,
Беруний номли маҳалла фаоли.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
