“Энг яхши иншо” танловига

КОНСТИТУЦИЯ МЕНИНГ ТАҚДИРИМДА

Ўзбек халқининг азалий орзуларидан бири бўлган мустақилликка эришилгач, 1992 йил 8 декабрь куни Ўзбекистон Республикаси Конституцияси қабул қилинди. Ушбу ҳуқуқий ҳужжатнинг қабул қилиниши инсон манфаатларини мустаҳкамлаш ва тараққиёт сари муҳим қадам бўлди, десак муболаға бўлмайди.

Конституция бизнинг бош қомусимиздир. Ушбу китоб инсоннинг ҳуқуқ ва эркинликларини мустаҳкамлаш билан бирга уларнинг зиммасига бурч ва маъсулият юклайди. Биз ҳаётимизда дуч келадиган кўплаб масалаларга ушбу китобдан жавоб топамиз.

Конституциямизнинг 18-моддасида: "Ўзбекистон Республикасида барча фуқаролар бир хил ҳуқуқ ва эркинликларга эга бўлиб, жинси, ирқи, миллати, тили, дини, ижтимоий келиб чиқиши, эътиқоди, шахси ва ижтимоий мавқеидан қатъий назар қонун олдида тенгдирлар” дейилади.

Бундан кўриниб турибдики, ҳар бир фуқаронинг ҳуқуқи ва қадр-қиммати қонун билан ҳимоя қилинади.

40-моддасида "Ҳар бир инсон малакали тиббий хизматдан фойдаланиш ҳуқуқига эга” эканлиги, 41-моддасида эса бепул умумий таълим олиш давлат томонидан кафолатланганлиги кўрсатилган. Мамлакатимизда ёшларга қаратилган эътибор қанчалик кучли эканлигини ушбу моддалардан билиб олишимиз мумкин.

Мустақил Ўзбекистон учун муқаддас бўлган давлат размлари Конституциянинг 5-моддасида мустаҳкамлаб қўйилган. Булар  мадҳия, герб ва байроқдир.

Бизнинг Конституциямиз ҳақида хорижликлар ҳам ўз баҳоларини берганлар. Масалан, франциялик профессор О.Шмидт Ўзбекистон ва Франция Республикалари Конституцияларини қиёслаб, шундай деган эди: "Ўзбекистон Конституцияси мутлақо мустақил ва айнан халқингиз ва жамиятингиз талабларига ҳамда анъаналарига жавоб беради. Конституциянгиз давлат ҳамда фуқаролик жамияти Конституцияси ҳисобланади. Чунки у ана шу икки муҳим ҳуқуқий соҳани тартибга солади”.

Қадимда яшаб ўтган аждодларимиз ҳам қонун билан иш кўрилса, давлат ўз қудратини йўқотмаслигини айтган. Буюк саркарда Амир Темур шундай фикрни билдирган:

"Давлат агар қонун асосида қурилмас экан, ундай салтанатнинг шукуҳи, қудрати ва тартиби йўқолади. Бундай салтанат кас-у нокас тап тортмай кириб чиқадиган томсиз, эшиги – тўсиғи йўқ уйга ўхшайди”.

Шундай экан, Конституция олға интилишимизга куч бахшида этувчи ҳуқуқий ҳужжатдир. Унга риоя қилиш эса ҳар бир  фуқаронинг бурчидир.

Юртимизда биз ёшлар учун имкониятлар ҳамиша  очиқдир. Айрим мамлакатларда ёшларнинг ўқиш, билим олиш тугул тўйиб овқат ейишларига ҳам имкониятлари йўқ. Дунёда тўйиб овқат ея олмай, очликдан ўлиб кетаётган болалар сони қанчадан-қанча. Шу бечора болаларга раҳминг келади. Бизнинг юртимизда эса давлатимиз ҳар бир боланинг жисмонан ҳам маънан баркамол бўлиб вояга етишлари учун ғамхўрлик қилади ва ҳар бир бола учун давлат қайғуради.

Шундай жаннатмакон, бағрикенг юрт фарзандлари ўз юртига муносиб бўлишлари шарт. Зеро, юртимизнинг келажаги биз ёшларнинг қўлида.

Севара ИСМОИЛОВА,

Амударё академик лицейи ўқувчиси.