“Eng yaxshi insho” tanloviga

KONSTITUTsIYa MENING TAQDIRIMDA

Oʻzbek xalqining azaliy orzularidan biri boʻlgan mustaqillikka erishilgach, 1992-yil 8-dekabr kuni Oʻzbekiston Respublikasi Konstitutsiyasi qabul qilindi. Ushbu huquqiy hujjatning qabul qilinishi inson manfaatlarini mustahkamlash va taraqqiyot sari muhim qadam boʻldi, desak mubolagʻa boʻlmaydi.

Konstitutsiya bizning bosh qomusimizdir. Ushbu kitob insonning huquq va erkinliklarini mustahkamlash bilan birga ularning zimmasiga burch va maʼsuliyat yuklaydi. Biz hayotimizda duch keladigan koʻplab masalalarga ushbu kitobdan javob topamiz.

Konstitutsiyamizning 18-moddasida: "Oʻzbekiston Respublikasida barcha fuqarolar bir xil huquq va erkinliklarga ega boʻlib, jinsi, irqi, millati, tili, dini, ijtimoiy kelib chiqishi, eʼtiqodi, shaxsi va ijtimoiy mavqeidan qatʼiy nazar qonun oldida tengdirlar” deyiladi.

Bundan koʻrinib turibdiki, har bir fuqaroning huquqi va qadr-qimmati qonun bilan himoya qilinadi.

40-moddasida "Har bir inson malakali tibbiy xizmatdan foydalanish huquqiga ega” ekanligi, 41-moddasida esa bepul umumiy taʼlim olish davlat tomonidan kafolatlanganligi koʻrsatilgan. Mamlakatimizda yoshlarga qaratilgan eʼtibor qanchalik kuchli ekanligini ushbu moddalardan bilib olishimiz mumkin.

Mustaqil Oʻzbekiston uchun muqaddas boʻlgan davlat razmlari Konstitutsiyaning 5-moddasida mustahkamlab qoʻyilgan. Bular  madhiya, gerb va bayroqdir.

Bizning Konstitutsiyamiz haqida xorijliklar ham oʻz baholarini berganlar. Masalan, frantsiyalik professor O.Shmidt Oʻzbekiston va Frantsiya Respublikalari Konstitutsiyalarini qiyoslab, shunday degan edi: "Oʻzbekiston Konstitutsiyasi mutlaqo mustaqil va aynan xalqingiz va jamiyatingiz talablariga hamda anʼanalariga javob beradi. Konstitutsiyangiz davlat hamda fuqarolik jamiyati Konstitutsiyasi hisoblanadi. Chunki u ana shu ikki muhim huquqiy sohani tartibga soladi”.

Qadimda yashab oʻtgan ajdodlarimiz ham qonun bilan ish koʻrilsa, davlat oʻz qudratini yoʻqotmasligini aytgan. Buyuk sarkarda Amir Temur shunday fikrni bildirgan:

"Davlat agar qonun asosida qurilmas ekan, unday saltanatning shukuhi, qudrati va tartibi yoʻqoladi. Bunday saltanat kas-u nokas tap tortmay kirib chiqadigan tomsiz, eshigi – toʻsigʻi yoʻq uyga oʻxshaydi”.

Shunday ekan, Konstitutsiya olgʻa intilishimizga kuch baxshida etuvchi huquqiy hujjatdir. Unga rioya qilish esa har bir  fuqaroning burchidir.

Yurtimizda biz yoshlar uchun imkoniyatlar hamisha  ochiqdir. Ayrim mamlakatlarda yoshlarning oʻqish, bilim olish tugul toʻyib ovqat yeyishlariga ham imkoniyatlari yoʻq. Dunyoda toʻyib ovqat yeya olmay, ochlikdan oʻlib ketayotgan bolalar soni qanchadan-qancha. Shu bechora bolalarga rahming keladi. Bizning yurtimizda esa davlatimiz har bir bolaning jismonan ham maʼnan barkamol boʻlib voyaga yetishlari uchun gʻamxoʻrlik qiladi va har bir bola uchun davlat qaygʻuradi.

Shunday jannatmakon, bagʻrikeng yurt farzandlari oʻz yurtiga munosib boʻlishlari shart. Zero, yurtimizning kelajagi biz yoshlarning qoʻlida.

Sevara ISMOILOVA,

Amudaryo akademik litseyi oʻquvchisi.